މުބާރާތުގެ ހުރިހާ ކަމެއްވެސް ދިޔައި ޕްލޭން އާއި އެއްގޮތަށް: ރިލޭ

ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2022 އާއި މެދު ވަރަށް ހިތްހަމަޖެހޭ ކަމަށާއި، ހުރިހާ ކަމެއްވެސް ދިޔައީ ޕްލޭން އާއި އެއްގޮތަށް ކަމަށް ގޯލްޑަން ފުޓްސަލް އެސޯސިއޭޝަންގެ ރައީސް ރިލްވާން މޫސާ (ރިލޭ) ބުނެފިއެވެ.

ރިލޭ ބުނީ މުބާރާތް މިހާ ކާމިޔާބުކަމާއެކު ނިންމާލެވުނީ މުބާރާތް ހިންގުމަށްޓަކައި އެކުގައި މަސައްކަތްކުރި ފަރާތްތަކުގެ ވަރަށް ބޮޑު އެހީތެރިކަމަކާއެކު ކަމަށެވެ. އެހެންކަމުން އެފަރާތްތަކަށް ރިލޭ ވަނީ ޚައްސަ ޝުކުރެއް އަދާކޮށްފައެވެ.

މިފަހަރުގެ މުބާރާތުގައި އެންމެ ތަފާތު ކަމަކަށް ފެނިފައިވާނީ މުބާރާތުގެ ހުޅުވުމުގެ ރައްސމިއްޔާތާއި ނިންމުމުގެ ރަސްމިއްޔާތުކަން ރިލޭ ފާހަގަކުރިއެވެ. މިފަހަރުގެ މުބާރާތުގެ ހުޅުވުމުގެ ރަސްމިއްޔާތާއި ނިންމުމުގެ ރަސްމިއްޔާތު ވަނީ ވަރަށް ކުލަ ގަދަކޮށް ފާހަގަކޮށްފައެވެ. މީގެ ތެރެއިންވެސް މުބާރާތުގެ އެންމެ މޮޅު ކުޅުންތެރިޔާއަށް "ފުޓްސަލް ކިންގް" ގެ ލަގަބު އެރުވި ޝާހީގޮތް ފާހަގަކޮށްލެވެއެވެ.

މިއީ ގޯލްޑަން ފުޓްސަލްގައި އެންމެ ގިނަ ޓީމު މިހާތަނަށް ބައިވެރިވި އަހަރެވެ. ރާއްޖޭގެ އެކި ކަންކޮޅުތަކުން ޖުމްލަ 91 ޓީމު މިފަހަރުގެ މުބާރާތުގައި ބައިވެރިވިއެވެ. މުބާރާތުގައި ބައިވެރިވާ ޓީމުތަކުގެ އަދަދު އިތުރުވުމަކީ މުބާރާތުގެ ހައިބަތު ބޮޑުވެ، ލިބޭ އިތުރު ކުރިއެރުމެއްގެ ގޮތުގައި ރިލޭ ފާހަގަކުރެއްވިއެވެ.

މިފަހަރުގެ މުބާރާތުގައި މާގިނަ ދަތިތަކަކާއި ކުރިމަތިލާން ނުޖެހޭކަން ފާހަގަކުރަމުން ރިލޭ ބުނީ އަބަދުވެސް އެންމެ ބޮޑު ދަތިކަމަކާއި ކުރިމަތިލާން ޖެހެނީ ޚަރަދުތައް ފޫބެއްދުމަށް ކަމަށެވެ. އަދި ކުރިއަށް އޮތް ތަނުގައި އިތުރު ސްޕޮންސަރުން ލިބިއްޖެނަމަ މުބާރާތް އިތުރަށް ފުރިހަމަ ވާނެކަން ރިލޭ ފާހަގަކުރިއެވެ.

މުބާރާތުގެ ލައިވް ފެށިއިރު ގިނަ ދަތިތަކަކާއި ކުރިމަތިލާން ޖެހުނު ކަމަށް ރިލޭ ބުންޏެވެ. އެގޮތުން ފުރަތަމަ ލައިވްތައް ފެށީ ރާއްޖެ ނޫން ހުރިހާ ގައުމެއް ބްލޮކް ކޮށްލައިގެން ކަމަށް ރިލޭ ބުންޏެވެ. ނަމަވެސް އެހުރިހާ ދަތިތަކަކާއި އެކުވެސް ގޯލްޑަން ފުޓްސަލްއިން ވަނީ ގާތްގަނޑަކަށް 3 މިލިއަން ވިއުސް ހަމަކޮށްފައެވެ. މިއީ އުންމީދު ކުރިވަރަށްވުރެ މާ ރަނގަޅު ނަތީޖާއެއްކަން ރިލޭ ފާހަގަކުރިއެވެ.

ރާއްޖޭގައި ފުޓްސަލް އިންޑޯއެއް ގާއިމުކުރާނެ ކަމުގެ ފެހި ސިގްނަލެއް ކުޅިވަރާއި ބެހޭ ވަޒިރު ދެއްވާފައި ވާއިރު، ފުޓްސަލްގެ އަސްލާއި އެއްގޮތަށް އިންޑޯ ކޯޓެއްގައި މުބާރާތް ބޭއްވުމުގެ އުންމީދު ރިލޭގެ އެބައޮތެވެ. އެހެންކަމުން އެފުރުސަތު ލިބިއްޖެނަމަ އޭގެ ބޭނުން ހިފާނެކަމަށް ރިލޭ ބުންޏެވެ.

މީގެ އިތުރުން މިއަހަރުގެ މުބާރާތުގައި މާލެތެރޭގެ ޓީމުތަކުން ލިބުނު ތަރުހީބު ކުޑަކަން ރިލޭ ފާހަގަކުރިއެވެ. އަދި ކުރިއަށް އޮތް ތަނުގައި ކުރަންޖެހޭ ޚަރަދުތަކަށް ބަލައި، ޒޯންތަކުގެ މެޗުތައް އަތޮޅުތަކުގައި ކުޅުމުގެ ވިސްނުން ގެންގުޅޭކަމަށް ރިލޭ ބުންޏެވެ. މީގެ ސަބަބުން އަތޮޅުތަކުން އަންނަ ޓީމުތަކުން ކުރަން ޖެހޭ ޚަރަދު ބޮޑުތަނުން ކުޑަވާނެއެވެ.