"މައުސޫމާގެ މުސާރަ އަކީ ސިއްރެއް"
ޑީޖޭއޭގެ ޑިރެކްޓަރ ލީގަލް ކޮމްޕެލަޔަންސް މައުސޫމާ ފާރޫޤުގެ މުސާރަ އާއި އިނާޔަތްތައް ހާމަކުރަން އާރުޓީއައި ރިކުއެސްޓެއް ހުށަހަޅުމުން ޑީޖޭއޭ އިން ވަނީ އެ މައުލޫމާތު ދިނުމަށް ދެކޮޅު ހަދާފައެވެ. މިކަން ހިނގާފައިވަނީ ދައުލަތުގެ އާ ޕޭ ފްރޭމްވޯކަށް ޝަރުއީ ދާއިރާގެ މުވައްޒަފުން މެޕްކުރި ގޮތާ މެދު ބޮޑެތި ތުހުމަތުތަކެއް ކުރަމުން ދާ ދަނޑިވަޅެއްގައި.
ޗީފް ޖުޑީޝަލް އެޑްމިނިސްޓްރޭޓަރ އަމްޖަދު މުސްތަފާ އަދި މައުސޫމާ ފާރޫގު
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖީއޭ) ގެ ޑިރެކްޓަރ ލީގަލް ކޮމްޕެލަޔަންސް މައުސޫމާ ފާރޫޤުގެ މުސާރަ އާއި އިނާޔަތްތައް ހާމަ ކުރަން އެ އޮފީހުން ދެކޮޅު ހަދައިފިއެވެ.
މައުސޫމާގެ މުސާރައާއި އިނާޔަތްތައް ހޯދަން، ޑީޖޭއޭއިން ދެކޮޅު ހަދާފައި މި ވަނީ ދައުލަތުގެ އާ ޕޭ ފްރޭމްވޯކަށް، ޝަރުއީ ދާއިރާގެ މުވައްޒަފުން މެޕްކޮށްފައިވާ ގޮތާއި މެދު، ޖުޑީޝަރީގެ މުވައްޒަފުންގެ މެދުގައި އުފެދިފައިވާ ނުތަނަވަސްކަމާ އެކު ސީރިއަސް ތުހުމަތުތަކެއް މުވައްޒަފުން ކުރަމުންދާ ދަނޑިވަޅެއްގަ އެވެ.
އެގޮތުން ޑީޖޭއޭގެ ވަކި ބަޔަކު ބޭނުންވާ ގޮތަށް، މުވައްޒަފުން މެޕްކޮށްފައިވާ ކަމަށް ބައެއް މުވައްޒަފުން ދަނީ ތުހުމަތު ކުރަމުންނެވެ. އެގޮތަށް އެކަން ހިންގުމުގައި އިސްކޮށް ހުރި ކަމަށް އެ މުވައްޒަފުން ތުހުމަތުކުރާ މައުސޫމާގެ މުސާރަ އާއި އިނާޔަތްތައް އަދި މައުސޫމާ ހިޖުރަކޮށްފައިވާ އޮނިގަނޑު ހޯދުމަށް، ޑީޖޭއޭ އަށް އާރުޓީއައި ރިކުއެސްޓެއް ވަނީ ހުށަހަޅާފަ އވެެ،
މައުސޫމާގެ މުސާރައާއި އިނާޔަތްތައް ހޯދަން، ޑީޖޭއޭ އަށް ހުށަހެޅި ރިކުއެސްޓްގައި އެދިފައިވަނީ ޑިރެކްޓަރ ލީގަލް ކޮމްޕެލަޔަންސް މައުސޫމާ ފާރޫޤު، ދައުލަތުގެ މުސާރައިގެ ސިޔާސަތުގެ ގާނޫނުގެ ދަށުން އެކުލަވާލާފައިވާ "ދައުލަތުގެ ޕޭ ފްރޭމް ވޯރކް" ގެ ދަށުން ހަދާފައިވާ ޝަރުއީ ދާއިރާ އަށް ހާއްސަ ޖޮބް މެޓްރިކްސްގެ ތެރެއިން ހިޖުރަ ކުރައްވާފައިވަނީ ކޮން މެޓްރިކްސްއަކަށްތޯ އަދި އެ ކަމަނާގެ މުސާރަ އާއި އެންމެހައި އިނާޔަތްތައް ހާމަކޮށްދިނުމަށެވެ.
އެހެންނަމަވެސް އެ ރިކުއެސްޓްގައި އެދިފައިވާ މައުލޫމާތު ދިނުމަށް ޑީޖޭއޭ އިން ވަނީ ދެކޮޅު ހަދާފަ އެވެ. ޑީޖޭއޭ އިން ދިން ޖަވާބުގައި ބުނެފައިވަނީ އެ މައުލޫމާތަކީ ތިންވަނަ ފަރާތެއްގެ ޒާތީ މައުލޫމާތު ކަމަށެވެ. އެހެންކަމުން އެ މައުލޫމާތު ޑީޖޭއޭ އިން ސިއްރުކުރަން ނިންމީ ކަމަށް އެ ޖަވާބުގައި ބުނެފައި ވެ އެވެ.
ޑީޖޭއޭ އިން، ދައުލަތުގެ ޕޭ ރޯލްގައި ހުރި މުވައްޒަފެއްގެ މުސާރަ އާއި އިނާޔަތްތައް ހާމަކުރަން ދެކޮޅު ހަދާފައި ވާއިރު އެ މައުލޫމާތަކީ ގާނޫނު ބުނާ ގޮތުން އަމިއްލަ އިސްނެގުމުގައި ވެސް ހާމަ ކުރަން ޖެހޭ ފަދަ މައުލޫމާތެއްކަން ފާހަގަކޮށްލެވެ އެވެ. އަދި އެ ފަދަ މައުލޫމާތު ނުދީގެން މީގެ ކުރިން ކޯޓަށް ހުށަހަޅާފައިވާ މައްސަލަތަކުގައި އެ މައުލޫމާތަކީ ސިއްރު މައުލޫމާތެއް ނޫން ކަމަށާއި އެ މައުލޫމާތު ހާމަ ކުރަން ޖެހޭނެ ކަމަށްވަނީ ކަނޑައަޅައިފައެވެ.
ދައުލަތުގެ އާ ޕޭ ފްރޭމްވޯކަށް، ޝަރުއީ ދާއިރާގެ މުވައްޒަފުން މެޕްކޮށްފައިވާ ގޮތާއި މެދު ޖުޑިޝަރީގެ މުވައްޒަފުންގެ ބޮޑެތި ކަންބޮޑުވުންތަކެއް އެބަ ހުއްޓެވެ. އަދި އެކަމާ ގުޅިގެން ރައީސުލް ޖުމްހޫރިއްޔާ އަށާއި ދައުލަތުގެ ކަމާބެހޭ ފަރާތްތަކަށް، ޕެޓިޝަނެއް ވެސް ޝަރުއީ ދާއިރާގެ މުވައްޒަފުން ވަނީ ހުށަހަޅައިފައެވެ. އަދި ކަޅު ހެދުމުގައި ނުކުމެ ނުރުހުން ހުރިކަން މުވައްޒަފުން ވަނީ މީގެ ކުރިން ވެސް ހާމަކޮށްފަ އެވެ.
