ރޯދަ އާ ދިމާކޮށް ނޯތު ހާބަރު ބަންދުކުރީ އޮޑިވެރިންނާ ކުރި މަޝްވަރާއާ ދިމާ އިދިކޮޅަށް، އޮޑިވެރިންގެ ކަންބޮޑުވުން ބަންޑުން ކޮށްލައިފި!

މާލޭ ނޯތު ހާބަރު މި ސަރުކާރުން ބަންދު ކޮށްފައިވަނީ އޮޑިވެރިންނާ އެތައް ފަހަރެއްގެ މަތިން ކުރި މަޝްވަރާއާ ދިމާ އިދިކޮޅަށް ކަމަށާ ކުރިއަށް އޮތީ ބަރަކާތްތެރި ރަމަޟާން މަސް ކަމަށް ވާއިރު އޮޑިވެރިންނަށް މި ސަރުކާރުން އިންތިހާ އަށް ތަކުލީފު ޖައްސާފައިވާ ތީ އޮޑިވެރިންގެ ކަންބޮޑުވުންތައް ބަންޑުން ކޮށްލައިފި އެވެ. 

ނޯތު ހާބަރުން ފަސޭހަކަމާއެކު ޚިދުމަތް ލިބޭނެހެން އެ ސަރަހައްދު އިތުރަށް ތަރައްގީ ކުރުމުގެ މަސައްކަތް މި ސަރުކާރުން ކުރާނީ ތިން ފިޔަވައްސަކަށް ބަހާލައިގެން ކަމަށް ސަރުކާރުން ބުނި ނަމަވެސް އަމަލީ މަސައްކަތް ފަށާފައި ވަނީ ތިން މަރުހަލާ އެއްކޮށެވެ. މިއާއެކު މިކަމުގެ ކަންބޮޑުވުން އޮޑިފަހަރުތަކުގެ ވެރިން ވަނީ ރާއްޖެޓީވީ އާ ހިއްސާ ކޮށްފަ އެވެ.

ރާއްޖެޓީވީ އާ ވާހަކަދެއްކި އޮޑިވެރިން ބުނީ މި މަޝްރޫއު ކުރިއަަށް ދާ ގޮތް އޮޑިވެރިންނާ ސަރުކާރުން ހިއްސާ ކުރި އިރު ބުނި އެއްވެސް ކަމެއް އެގޮތަށް ނުހިނގާ ކަމަށެވެ. އެގޮތުން ސަރުކާރުން ވަނީ މި މަސައްކަތް ކުރާނީ ބޯޓުތަކަށް ދަތި ނުވާގޮތަށް ތިން ފިޔަވައްސަށް ބަހާލައިގެން ކަމަށް ބުނި ކަމަށާ ނަމަވެސް މިހާރު މުޅި ނޯތު ހާބަރު އެއްކޮށް ބަންދު ކޮށްފައިވާއިރު ސަރުކާރުން އަމަލު ކޮށްފައިވަނީ މަޝްވަރާއާ ދިމާ އިދިކޮޅަށް ކަމަށެވެ. 

ކުރިއަށް އޮތީ ބަރަކާތްތެރި ރަމަޟާން މަސް ކަމަށްވާއިރު، އޭގެ މަހެއްހާ ދުވަސް ކުރިން ނުވަތަ ދޮޅުމަސް ކުރިން ރަށްރަށަށް ބޭނުންވާ މުދާ ސަޕްލައިކޮށް ނިންމަން ޖެހޭ އިރު އެކަން ވެސް އޮތީ ނުކުރެވި ކަމަށާ އޭގެ ސަބަބުން އަތޮޅުތެރޭގެ ރައްޔިތުން ނިކަމެތިވެގެން ދާނެ ކަމަށް އޮޑިވެރިން ފާހަގަކޮށްފައި ވެ އެވެ. 

މަހަކު އެއް ދަތުރު ކޮށްގެން އަތޮޅު ތެރޭގެ ރައްޔިތުންނަށް ބޭނުންވާ ކާބޯތަކެތި ގެންދެވޭނެ ފޯމިއުލާއެއް އަޅުގަނޑުމެންނަކަށް ނުފެނޭ. ށ. އަތޮޅަށް އެކަނި އަލުގަނޑުމެން ބަލައިލި ނަމަވެސް 6 ބޯޓު މި އޮންނަނީ. ދުވާލަކު ބޯޓެއް ކަހަލަ ގޮތަކަށް އެރަށް ރަށަށް ދަތުރު ކުރާނެ. ފީވަކުން ވެސް އަޅުގަނޑުމެން އެބަ ގެންނަން ހަފްތާއަކު އެއް ދުވަހު އެކޮޅުން މިކޮޅަށް އަންނަ އިރު އަޅުގަނޑުމެން ގެންނަން އެބަ ޖެހޭ 6 އެއްކަ ޓަނު މޭވާއާ ތަރުކާރީ. މިހާރު އަޅުގަނޑުމެން މިކޮޅުގަ ތިބޭތާ 15 ދުވަސް. އަދި 15 ދުވަސް ފަހުން ރަށަށް ދެވޭނެ ކަމަށް މި ބަލަނީ. އެހެން ވެއްޖެޔާ އެކޮޅުން ވެސް އަންނަ ހުރި އެއްޗެހި ނާންނާނެތާ.

ކަންބޮޑުވުން ހިއްސާކުރި އޮޑިއެއްގެ ވެރި އެއް

އޭގެ އިތުރުން ސަރުކާރުގެ މި އަމަލުތަކާއެކު ބޯޓުފަހަރުތަކުގައި މަސައްކަތް ކުރާ މީހުންގެ އާމްދަނީ އިންތިހާ އަށް ދަށް ވެގެން ދާނެ ކަމަށާ އޮޑިފަހަރުތަކުގައި މަސައްކަތް ކުރާ ފަރާތްތަކުން ތިބީ ނުހަނު ހާލުގައި ތަކުލީފުގައި ކަމަށް ވެސް ކަންބޮޑުވުން ހިއްސާކުރި އޮޑިތަކުގެ ވެރިން ބުންޏެވެ. 

އަޅުގަނޑުމެންގެ އާމްދަނީ އިންތިހާއަށް ދަށަށް ދާނެ. ބޯޓު ތަކުގަ މަސައްކަތް ކުރާ މީހުންގެ މުސާރަ ނުދެވޭ. އަޅުގަނޑުމެންގެ އާމްދަނީ އިންތިހާ އަށް ދަތިވާ އިރުގަ އަތޮޅުތެރޭގެ ރައްޔިތުންނަށް ކާބޯތަކެތީގެ ދަތިކަން އިންތިހާއަށް ބޮޑުވެގެން ދާނެ. 

ކަންބޮޑުވުން ހިއްސާކުރި އޮޑިއެއްގެ ވެރި އެއް

އެހެން ކަމުން އޮޑިވެރިން ވަނީ މިކަމަށް ހައްލެއް ހޯދައިދިނުމަށް ސަރުކާރަށް ގޮވާލާފަ އެވެ. އަދި މާލޭގެ ކޮންމެވެސް ތާކުން މަދުވެގެން 50 ބޯޓަށް ޖާގަ ލިބޭ ގޮތަށް އިންތިޒާމުތައް ހަމަޖައްސައި ނުދީފި ނަމަ ކުރިއަށް އޮތް ރަމަޟާން މަހު ރައްޔިތުން ވަރަށް ނިކަމެތި ހާލަކަށް ދާނެ ކަމަށް ވެސް އެ ފަރާތްތަކުން ވަނީ ބުނެފަ އެވެ.