ރޯދަމަހު ސުކޫލުތަކުގައި ކިޔެވުން އޮންނާނީ ފުރަތަމަ ހަފްތާ އެކަނި
އެޑިއުކޭޝަން މިނިސްޓްރީން ދިރާސީ އާ އަހަރުގެ ކަލަންޑަރު އާންމު ކޮށްފައިވާއިރު، ރޯދަމަހު ސްކޫލްތަކުގެ ކިޔެވުން އޮންނާނީ ފެބްރުއަރީ 22 އިން 26 އަށް، ފުރަތަމަ ހަފުތާގައި އެކަނި.
ދިރާސީ އައު އަހަރުގެ ފުރަތަމަ ދުވަސް | ރާއްޖެއެމްވީ
ފެބުރުއަރީ 18 ގައި ފެށޭ ރޯދަމަހު ސްކޫލްތަކުގައި ކިޔެވުން އޮންނާނީ ފުރަތަމަ ހަފުތާގައި އެކަނި ކަމަށް އެޑިއުކޭޝަން މިނިސްޓްރީން ބުނެފި އެވެ.
މިނިސްޓްރީ އަލުން އާންމު ކުރި ދިރާސީ އާ އަހަރުގެ ކަލަންޑަރު ގައި ވާގޮތުން ރޯދަމަހު ސުކޫލުތަކުގެ ކިޔެވުން އޮންނާނީ ފެބްރުއަރީ 22 ވަނަ ދުވަހުން ފެށިގެން 26 ވަނަ ދުވަހަށެވެ. އަދި ފެބުރުއަރީ 27 ވަނަ ދުވަހުން ފެށިގެން މާރިޗު 22 ވަނަ ދުވަހާއި ހަމަ އަށް ސުކޫލުތަކުގެ ކިޔެވުން ބަންދުވަނެ އެވެ.
ކަލަންޑަރުގައިވާ ގޮތުން އަންނަ އަންގާރަ ދުވަހު ދިރާސީ އާ އަހަރު ފަށައި ކިޔެވުން ކުރިއަށް ގެންދާނީ އެއް މަސް ދުވަހަށެވެ. އޭގެ ތެރެއިން ކިޔަވައިދޭ ފަހު ހަފުތާ ވަނީ ރޯދަ މަހުގެ ފުރަތަމަ ހަފުތާއަށެވެ.
އެއަށް ފަހު ޖެހިގެން އަންނަ ހުކުރާއި ހޮނިހިރަށް ފަހު މާޗް 1 ވަނީ ޓީޗަރުންގެ ޕީޑީ ދުވަހަށެވެ. ޓީޗަރުންނަށް ހާއްސަ އެ ދުވަސް އެއް ހަފުތާގެ ނިޔަލަށް ކުރިއަށް ގެންގޮސް ނިންމާލާނީ އެ މަހުގެ 8 ގަ އެވެ. އެ ދުވަސްތަކުގައި ދަރިވަރުން ކިޔަވަން ސްކޫލަށް ދާން ނުޖެހޭ ދުވަސްތަކެއްގެ ގޮތުގައި މިނިސްޓްރީން ވަނީ ކަނޑައަޅައިފަ އެވެ.
އަދި މާރިޗު ނުވައަކުން 19ގެ ނިޔަލަށް ވަނީ ރޯދައިގެ ފަހު ދިހައަކަށެވެ. އެ ދުވަސްތަކަކީ ސަރުކާރު ބަންދު ދުވަސްތަކަކަށްވާތީ، ސުކޫލުތައް ހުޅުވޭނީ މާރިޗު 23 ގައެވެ.
އެހެންވެ، ދަރިވަރުންނަށް ރޯދަ މަހު 26 ދުވަހުގެ ދިގު ޗުއްޓީއެއް ލިބޭނެ އެވެ.
