ޕީއެސްއެމްގެ އެމްޑީ އަށް ރައީސް އޮފީހުން އެލަވަންސް އެއް ދޭ ކަމުގެ އަޑު ގަދަވެ، ފާޑުކިޔުން ބޮޑުވެފައި ވަނިކޮށް ސަރުކާރުން އެކަން ދޮގުކޮށްފި
ބައެއް މީޑިއާތަކާއި މީސްމީޑިއާގައި ޕީއެސްއެމްގެ އެމްޑީ އަހްމަދު ޝަކީބަށް ރައީސް އޮފީހުން ޚާއްސަ އެލަވަންސްއެއް ދޭ ކަމަށް އަޑު ފެތުރުމުން ސަރުކާރަށް ވަރަށް ބޮޑަށް ފާޑުކިޔުން އަމާޒުވި.
ދައުލަތުގެ މީޑިއާ، ޕަބްލިކް ސާވިސް މީޑިއާ، ޕީއެސްއެމްގެ މެނޭޖިން ޑިރެކްޓަރުގެ މަގާމަށް އައްޔަންކޮށްފައިވާ އަހުމަދު ޝަކީބު | ގޫގުލް
ދައުލަތުގެ މީޑިއާ، ޕަބްލިކް ސަރވިސް މީޑިއާ (ޕީއެސްއެމް) ގެ މެނޭޖިން ޑިރެކްޓަރުގެ މަގާމަށް އައްޔަންކޮށްފައިވާ އަހުމަދު ޝަކީބު އަށް ރައީސް އޮފީހުން ޚާއްސަ އެލަވަންސް އެއް ދޭ ކަމަށް ބުނާ ވާހަކަ ސަރުކާރުން ދޮގުކޮށްފި އެވެ.
ބައެއް މީޑީއާތަކާއި މީސްމީޑިއާގައި ދައުރުވަމުންދާ ގޮތުން ރައީސް އޮފީހުން ޝަކީބު އަށް ޚާއްސަ އެލަވަންސް އެއް ދޭ ކަމަށް ވަނީ ބުނެފަ އެވެ. ޝަކީބް ޕީއެސްއެމްގެ އެމްޑީ އަކަށް އައްޔަން ކުރުމުގެ ކުރިން ލިބެމުން ދިޔަ އެލަވަންސް އާއި އެކު އޭނާ އަށް ގާތްގަނޑަކަށް 70،000 ރުފިޔާ ލިބެމުންދާ ކަމަށް ވަނީ އަޑު ފެތުރިފަ އެވެ.
އެ އާއި އެކު އާއްމުން ވަނީ ސަރުކާރަށް ވަރަށް ބޮޑަށް ފާޑުކިޔަން ފަށާފަ އެވެ. ޕީއެސްއެމް އަކީ އެއްވެސް ބައެއްގެ ނުފޫޒު ފޯރާފައި ނުވާ ތަނަކަށް ވާން ޖެހޭ އިރު ރައީސް އޮފީހުން ޚާއްސަ އިނާޔަތެއް ޝަކީބް އަށް ލިބުމަކީ ޤާނޫނާއި ޚިލާފު ކަމެއް ކަމަށާއި އެއީ ކޮރަޕްޝަން ކަމަށް އާއްމުން އައީ ބުނަމުންނެވެ. މީގެ ކުރިން ވެސް މަޖިލީހުގެ މެމްބަރުންގެ ތެރެއިން ބައެއް މެމްބަރުންނަށް ސަރުކާރުން އެލަވަންސް އެއް ދޭ ކަމަށް ވަނީ އަޑު ފެތުރިފަ އެވެ. އެހެންކަމުން މިއީ ސަރުކާރުން އިދާރާތަކާއި މުއައްސާތައް ކޮންޓްރޯލް ކުރުމަށް ކުރާ ކަމެއް ކަމަށް ބުނެ އާއްމުން އައީ އެކަމަށް ފާޑު ކިޔަމުންނެވެ.
ރާއްޖެއެމްވީ އިން އެކަމާއި މެދު ސުވާލު ކުރުމުން ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ އެފަދަ ކަމެއް ހިނގަމުން ނުދާ ކަމަށެވެ. ރައީސުލްޖުމްހޫރިއްޔާގެ އޮފީހުން އެއްވެސް ކުންފުންޏެއްގެ އެމްޑީ އަކަށް ވެސް މުވައްޒަފަކަށް ވެސް އެލަވަންސް އެއް ދެމުން ނުދާ ކަމަށް ހީނާ ވަނީ ވިދާޅުވެފަ އެވެ.
ސަރުކާރުން މިފަދަ އެލަވަންސް އެއް ދެމުން ނުދާ ކަމަށް ބުނެފައިވާ އިރު އަޑު ފެތުރިފައި ވާ ގޮތުން ޝަކީބް އަށް 31000 ރުފިޔާ ގެ އެލަވަންސް އެއް ދެ އެވެ. އެ އެލަވަންސް ދެނީ ރައީސް ދެއްވާ އެލަވަންސް އެއްގެ ގޮތުގަ އެވެ. އެކި އިދާރާތަކާއި މުއައްސާތަކުގައި ތިބި މީހުން ކޮންޓްރޯލް ކުރުމަށް ބޮޑެތި އަދަދުތަކުން ސަރުކާރުން ފައިސާ ދޭ ކަމަށް އިދިކޮޅު ފަރާތްތަކުން ދަނީ ތުހުމަތުކުރަމުންނެވެ.
