ޕީއެންސީ ގެ ބޮޑު ޖަލްސާ އަށް މީހުން އުފުލުމަށް އެމްޓީސީސީގެ ބަސްތައް ބޭނުން ކުރި ގޮތް ސާފު ކުރަން އެދުމުން ސީދާ ޖަވާބެއް ނުދީ މަސައްކަތް ކުރީ އޮޅުވާލަން!

ރައީސް މުއިއްޒު ވެރިކަން ކުރައްވާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން މާލޭ ގައި ހުސްވި އަހަރުގެ ނޮވެމްބަރު 10 ވަނަ ދުވަހުގެ ރޭ ބޭއްވި ބޮޑު ޖަލްސާ އަށް މީހުން އުފުލުމަށް އެމްޓީސީސީގެ ބަސްތައް ބޭނުން ކުރި ގޮތް ސާފު ކުރަން ރާއްޖެޓީވީ އިން ހުށަހެޅުމުން ސީދާ ޖަވާބެއް ނުދީ ވާހަކަ އޮޅުވާލަން އެ ކުންފުނިން މަސައްކަތް ކޮށްފި އެވެ.

އާރުޓީއައި ގެ ދަށުން ރާއްޖެޓީވީ އިން ހުށަހެޅީ އެމްޓީސީސީ ގެ ބަސްތައް ޕްރައިވެޓް ހަޔަރގެ ގޮތުގައި އެ އިވެންޓަށް ބޭނުން ކުރީ ކޮން އިންތިޒާމެއްގެ ދަށުންތޯ އާއި އެކަމަށް ކިތައް ބަސް ބޭނުން ކުރިތޯ އާއި އެ ފައިސާ ލިބުނުތޯ އާއި ފައިސާ ދެއްކީ ކޮން ފަރާތަކުންތޯ ސާފު ކުރުމަށެވެ.

ޖަލްސާ އަށް މާލެ އައި މީހުން އެއަރޕޯޓުން އުފުލުމަށާއި އަދި ޖަލްސާ އަށް މީހުން ގެންދިއުމަށް ފުޅާ ދާއިރާ އެއް ގައި އެމްޓީސީސީ ގެ ބަސްތައް ބޭނުން ކުރި މަންޒަރު ފެނިފައިވާއިރު، ޕީއެންސީ ގެ މީހުން އުފުލުމަށް އެ ދުވަހު ހިނގި ޚަރަދުގެ ކަންކަން ސާފު ކުރުމަށް އެދުމުން ދިން ޖަވާބު ގައި ބުނެފައިވަނީ "އާންމު އުސޫލުން ކޮންމެ ފަރާތަކަށް ވެސް ޕްރައިވެޓް ޚިދުމަތް މެދުވެރިކޮށް އެމްޓީސީސީ ގެ ބަސް ކުއްޔަށް ހިފުމަށް އެދުމުގެ ފުރުސަތު އޮންނާނެ،" ކަމަށެވެ.

"ވީމާ މި ކުންފުނިން އެ ދުވަހެއްގައި ޝެޑިއުލް ކުރެވިފައިވާ ދަތުރުތަކަށް އެއްވެސް ދަތިކަމެއް ކުރިމަތި ނުވާނޭހެން ކުންފުނީގެ އުސޫލުތަކާ އެއް ގޮތަށް އެދިފައިވާ ފަރާތްތަކަށް ޕްރައިވެޓް ހަޔަރ ގެ ޚިދުމަތް ފޯރުކޮށްދެވޭނެ ކަމުގައި،" ދަންނަވާ ކަމަށް އެމްޓީސީސީ އިން ބުނެފައިވެ އެވެ.

އޭގެ އިތުރުން ކޮށްފައިވާ ސުވާލަށް ޖަވާބެއް ދިނުމުގެ ބަދަލު ގައި ދެންވެސް އެމްޓީސީސީ އިން އިތުރަށް ދައްކާފައިވަނީ ކޮށްފައިވާ ސުވާލާ ސީދާ ގުޅުމެއް ނެތް ވާހަކަތަކެވެ.

"ކުންފުނިން ޕްރައިވެޓް ހަޔަރ ގެ ޚިދުމަތް ދެނީ ކަނޑައެޅިފައިވާ ވަކި ރޭޓެއްގަ އެވެ. މި ރޭޓްތަކުގެ މައުލޫމާތު މި ކުންފުނީގެ ހޮޓްލައިން....އާ ގުޅާލުމުން ކޮންމެ ބޭފުޅަކަށް ވެސް ލިބޭނެއެވެ."

ކުންފުނިން ޕްރައިވެޓް ހަޔަރ އުސޫލުން ޚިދުމަތް ހޯދާ ފަރާތްތަކުން ފައިސާ ދައްކަން ޖެހޭނެ ކަމަށް ވެސް ޖަވާބުގައި އިތުރަށް ބުނެފައިވެ އެވެ. އަދި ފައިސާ ނުދައްކާ ފަރާތްތަކުގެ އަތުން ފައިސާ ހޯދުމަށް ކުރަން ޖެހޭ މަސައްކަތް ކުންފުނީގެ އުސޫލުތަކާއި އެއްގޮތައް ކުރެވިގެންދާނެ ކަމަށް ވެސް ލިޔެފައިވެ އެވެ.

ސަރުކާރުން ހިންގާ ކުންފުނިތަކުގައި ކަރަޕްޝަން އަށަގަނެފައިވާ ކަމުގެ ވާހަކަތައް އާއްމު ކޮށް އިވެމުންދާއިރު، ކުންފުނިތައް އާންމު ރައްޔިތުންނަށް ޖަވާބުދާރީ ވުމުގައި ވެސް އެއްވެސް ޒިންމާދާރުކަމެއް ނެތް ކަން ވަނީ ފާހަގަ ކުރެވިފަ އެވެ. މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން މައުލޫމާތު ހޯދުމަށް ހުށަހަޅާ ސުވާލުތަކަށް އެތައް ދުވަހެއް ފަހުން އަންނަ ޖަވާބުގައި ހޯދަން އެދޭ މައުލޫމާތު ނުހިމަނައި އެހެން ވާހަކަތައް ދައްކައިގެން ވާޖިބު އަދާކުރެވުނީ ކަމަށް ދުށުން ވެސް ވަނީ މިހާރު އާންމު ކަމަކަށްވެފައެވެ.

ރައީސް މުއިއްޒު ވެރިކަމަށް ވަޑައިގަންނަވުން ވިދާޅުވެފައި ވަނީ އެ މަނިކުފާނުގެ ސަރުކާރެއް ގައި ފޮރުވާނެ އެއްވެސް އެއްޗެއް ނޯންނާނެ ކަމުގައެވެ. އެހެން ނަމަވެސް ވެރިކަމުގެ ތިންވަނަ އަހަރަށް އަޅާފައިވާއިރު ސަރުކާރުގެ މިނިސްޓްރީތަކާއި ކުންފުނިތަކުން މައުލޫމާތު ހޯދާ ލިބިގަތުމަކީ ރާއްޖޭގައި އެންމެ އުނދަގޫ އެއް ކަންތަކުގެ ގޮތުގައި ވަނީ ފާހަގަ ކުރެވިފަ އެވެ.