ރާއްޖޭގެ މިނިވަންކަމާ ސިޔާދަތައް ގެއްލުންވާ ގޮތަށް ހުރި އެއްބަސްވުންތައް އިސްލާހު ކޮށް ނިމިފައިވާ ކަމަށް ވިދާޅުވެ ރައީސް މުއިއްޒު ހެއްދެވީ ބޮޑު އިތުރުފުޅެއްކަން ފަޅާ އަރައިފި
ރައީސް މުއިއްޒު ރާއްޖޭގެ މިނިވަންކަމާ ސިޔާދަތައް ގެއްލުންވާ އެއްބަސްވުންތައް އިސްލާހުކޮށް ނިމިފައިވާ ކަމަށް ވިދާޅުވި ނަމަވެސް ރައީސް އޮފީހުން ބުނީ އެ އެއްބަސްވުންތަކުގެ މަޝްވަރާތައް އަދިވެސް ދަނީ ކުރިއަށް ކަމަށް. އަސްކަރީ އެއްބަސްވުންތައް ހާމަކުރުމަކީ ރައީސް ވެވަޑައިގެންފައިވާ ވައުދެއް ކަމުގައިވީ ނަމަވެސް ވެރިކަމަށް ވަޑައިގެން 3 ވަނަ އަހަރު ގުނަމުންދާއިރު އެ އެއްބަސްވުންތައް ހާމަކުރުމުގައި މިހާރު ބަހަނާ ދައްކަމުންދާ ކަން ފާހަގަކުރެވޭ.
އިންޑިއާ އާއި ރާއްޖޭގެ އަސްކަރިއްޔާ ހިމެނިގެން ކުރިއަށް ގެންދިޔަ އަސްކަރީ ތަމްރީންތައް - ދޯސްތީ17 ގެ ހަރަކާތެެއްގެ ތެރެއިން. | އެމްއެންޑީއެފް
ރާއްޖޭގެ މިނިވަންކަމާ ސިޔާދަތައް ގެއްލުންވާ ގޮތަށް ހުރި އެއްބަސްވުންތައް އިސްލާހު ކޮށް ނިމިފައިވާ ކަމަށް ވިދާޅުވެ ރައީސް މުއިއްޒު ހެއްދެވީ ބޮޑު އިތުރުފުޅެއްކަން ފަޅާ އަރައިފި އެވެ.
މިކަން ފަޅާ އެރީ ރައީސް އޮފީހުން އެ އެ އެއްބަސްވުންތަކުގެ މަޝްވަރާތައް އަދިވެސް ދަނީ ކުރިއަށް ކަމަށް ބުނެ ފޮނުވާފައިވާ ލިޔުމަކުންނެވެ.
ބޭރު ގައުމުތަކާ އެކު ވެފައިވާ އެއްބަސްވުންތަކުގެ ތެރެއިން ދިވެހި ރާއްޖޭގެ މިނިވަން ކަމާ ސިޔާދަތު ގެއްލިދާ ފަދަ ކަންކަން ހުރި އެއްބަސްވުންތަކަކަށް އިސްލާހު ގެނެސްފައިވާ ކަމަށް 3 މެއި 2025 ވަނަ ދުވަހު ބޭއްވި ނޫސްވެރިންގެ ބައްދަލުވުމެއްގައި ރައީސް ޑރ. މުހައްމަދު މުއިއްޒު ވަނީ ވިދާޅުވެފަ އެވެ. އެ ބައްދަލުވުމުގައި ވެސް އެއީ ކޮން އެއްބަސްވުންތަކެއް ކަން މުއިއްޒު ވިދާޅުވެފަ އެއް ނުވެ އެވެ.
ރައީސް މުއިއްޒު މިހެން ވިދާޅުވުމާ ގުޅިގެން މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަމިއްލަ ފަރާތަކުން ވަނީ ރައީސް އެ ވިދާޅުވި އެއްބަސްވުންތަކަކީ ކޮބައިކަން ސާފު ކުރުމަށް އެދި ރައީސް އޮފީހަށް ހުށަހަޅާފަ އެވެ.
އެ ހުށަހެޅުމުގެ ޖަވާބުގައި މި ހިނގާ ޖެނުއަރީ މަހުގެ 27 ވަނަ ދުވަހު ފޮނުވި ލިޔުމުގައި ރައީސް އޮފީހުން ބުނެފައި ވަނީ، "އެއްބަސްވުންތަކާ ގުޅޭ މަޝްވަރާތައް މިހާރުވެސް ދަނީ ކުރިއަށް،" ކަމަށެވެ.
މަޝްވަރާތައް ކުރިއަށް ދާ ކަމަށް ބުނެ ރައީސް އޮފީހުން ޖަވާބު ދިން އިރު، ހުސްވި އަހަރުގެ މެއި މަހުގެ 3 ވަނަ ދުވަހު ނޫސްވެރިންނާ ބައްދަލު ކުރައްވާ ދެއްކެވި ވާހަކަ ފުޅުގައި އެއްބަސްވުންތަކުގައި މިނިވަންކަމާ ސިޔަދަތައް ގެއްލުންވާ ކަމެއް މިހާރު "ނޯންނާނެ" ކަމަށް މުއިއްޒު ވަނީ ވިދާޅުވެފަ އެވެ.
"ޢަސްކަރީ އެއްބަސްވުންތައް ހާމަކުރުން. އަޅުގަނޑުވީ ވަޢުދެއް ދޮގެއްތޯ؟ ޢަސްކަރީ އެއްބަސްވުންތައް އަޅުގަނޑުމެން ބެލިން. އަޅުގަނޑު ދޭން ބޭނުންވާ މައިގަނޑު ޔަޤީންކަމަކީ، އަޅުގަނޑުމެންގެ ޤައުމަށް، ކުރިން މި ދެންނެވި މިނިވަންކަމާއި، ސިޔާދަތު ޙިމާޔަތްކުރުމުގައި، ގެއްލުންވާނެ ކަމެއް އޮތިއްޔާ، މިހާރު އެކަމެއް ނޯންނާނެ." ކަމަށް ރައީސް މުއިއްޒު ވިދާޅުވެފައިވެ އެވެ.
ދިވެހިރާއްޖެ އިން ބޭރުގެ ގައުމުތަކާ އެކު ހަދާފައިވާ އަސްކަރީ އެއްބަސްވުންތައް ހާމަ ކުރުމަކީ ރައީސް މުއިއްޒު ދިވެހި ރައްޔިތުންނަށް ވެވަޑައިގެންފައިވާ ވައުދެއް ކަމުގައިވީ ނަމަވެސް ވެރިކަމަށް ވަޑައިގެން 3 ވަނަ އަހަރު ގުނަމުންދާއިރު އެ އެއްބަސްވުންތައް ހާމަ ކުރުމުގައި މިހާރު ބަހަނާ ދައްކަމުންދާ ކަން ފާހަގަ ކުރެވެ އެވެ.
ރައީސް އޮފީހުން ފޮނުވި ޖަވާބުގައި އިތުރަށް ބުނެފައިވަނީ 2025 މެއި ވަނަ ދުވަހު ނޫސްވެރިންނާ ބައްދަލު ކުރައްވާ ދެއްކެވި ވާހަަކަފުޅުގައި ވިދާޅުވެފައިވާ އެއްބަސްވުން ތަކަކީ ބައިލެޓްރަލް އެއްބަސްވުން ތަކަކަށް ވެފައި، އެއެއްބަސްވުންތަކުގެ ސިއްރު ހިފެހެއްޓުމަކީ މުހިންމު ކަމެއްކަން ފާހަގަ ކުރާ ކަމަށެވެ.
ނޫސްވެރިންގެ ބައްދަލުވުމުގައި މުއިއްޒު ވިދާޅުވެފައި ވަނީ އެއްބަސްވުންތައް ހާމަ ނުކޮށް ހުރީ އޭގައި އެއްވެސް މައްސަލަ އެއް ހުރެގެން ނޫން ކަމަށެވެ.
"އޭގެ އިޝޫޒްތަކެއް ހުރެގެނެއް ނޫން. އެހެންނަމަވެސް، ހާމަކުރާނެ ކަމަށް އަޅުގަނޑު ވަޢުދުވެފައިވާތީ، މަސައްކަތް ކުރަމުން އެބަދަން. ބައިލެޓްރަލް ޑިސްކަޝަންސްތަކުގެ ތެރެއިން، އެ ހާމަކުރުމުގެ މަސައްކަތް ކުރެވޭތޯ. ކަންބޮޑުވާންޖެހޭ ކަންތައްތަކެއް އޭގައި ހުރެގެނެއް ނޫން. އެކަމަކު އަޅުގަނޑުގެ ވަޢުދު ފުއްދުމަށްޓަކައި،" މުއިއްޒު ވިދާޅުވެފައިވެ އެވެ.
ސަރުކާރުގެ ތެރޭގައި ފޮރުވާނެ އެއްވެސް އެއްޗެއް ނޯންނާނެ ކަމަށް ވައުދުވެ ވެރިކަމަށް ވަޑައިގެންނެވި ރައީސް މުއިއްޒު ވަނީ "މި ސަރުކާރަކީ ދެފުށް ފެންނަ ރައްޔިތުންނަށް ޖަވާބުދާރީވާ" ސަރުކާރެއް ކަމަށް ޖުމްހޫރީ ދުވަހާ ގުޅިގެން 2024 ވަނަ އަހަރު ބޭއްވި ރަސްމީ ޖަަލްސާ ގައި ވާހަކަފުޅު ދައްކަވަމުން ވަނީ ވިދާޅުވެފަ އެވެ.
