އުމްރާ އަށް ގެންދާނެ ކަމަށް ބުނެ އަސްކޮއި ގްރޫޕުން ލަނޑުދީފައިވާ އާއިލާއަކަށް 185،250ރ. ދޭން ހުކުމްކޮށްފި
ސިވިލް ކޯޓުން ޙުކުމްކޮށްފައި ވަނީ އުމްރާ އަށް ގެންދާނެ ކަމަށް ބުނުމުން ދައްކާފައިވާ 155،250ރ. އާއި ޝަރީއަތުގެ ހަރަދުގެ ގޮތުގައި ހޭދަ ކުރި 30،000ރ. ދެއްކުމަށް.
ސިވިލް ކޯޓު | ރާއްޖެއެމްވީ
އުމްރާ އަށް ގެންދާނެ ކަމަށް ބުނެ އަސްކޮއި ގްރޫޕުން ލަނޑުދީފައިވާ އާއިލާއަކަށް 185،250ރ. ދޭން ހުކުމްކޮށްފި އެވެ.
ސިވިލް ކޯޓުން އެ ހުކުމް އިއްވާފައި ވަނީ މިދިޔަ ބުރާސްފަތި ދުވަހު އެވެ. އެ ހުކުމްގައި ބުނެފައި ވަނީ އަސްކޮއި ޓްރެވަލް ސާވިސަސް ޕްރައިވެޓް ލިމިޑެޓާ ދެކޮޅަށް މައްސަލަ ހުށަހަޅާފައި ވަނީ 5 މީހަކު އުމްރާ އަށް ގެންދަން، 155،250ރ. ދެއްކުމުން ލަނޑު ދީފައިވާތީ އެ ފައިސާ އާއި ލިބުނު ގެއްލުން ހޯދުމަށެވެ.
ސިވިލް ކޯޓުން ޙުކުމްކޮށްފައި ވަނީ އުމްރާ އަށް ގެންދާނެ ކަމަށް ބުނުމުން ދައްކާފައިވާ 155،250ރ. އާއި ޝަރީއަތުގެ ހަރަދުގެ ގޮތުގައި ހޭދަ ކުރި 30،000ރ. ދެއްކުމަށެވެ. އެ ފައިސާ ހަތް ދުވަހުގެ ތެރޭގައި ދެއްކުމަށް އަސްކޮއި ކުންފުނި އަދި އެ ކުންފުނީގެ ވެރިޔާ މއ. ފައިންޝޭޑް، އަބްދުﷲ ރަޝީދު ވަނީ އެއްބަސްވެފަ އެވެ.
އަސްކޮއި ގްރޫޕުން ވަނީ އުމްރާއަށް ގެންދާނެ ކަމަށް 28 މީހެއްގެ އަތުން ފައިސާ ނެގުމަށް ފަހު އޮޅުވާލާފަ އެވެ. މި މައްސަލަ އާއި ގުޅިގެން އިސްލާމިކް މިނިސްޓްރީން ވަނީ އަސްކޮއި ގްރޫޕްގެ ހުއްދަ ބާތިލުކޮށް، އަސްކޮއި ގްރޫޕާއި މެދު ފިޔަވަޅު އަޅާފަ އެވެ.
