އައިކޮމް މުވައްޒަފުންނަށް ދިން ލިވިންގ އެލަވަންސް އަތުލަން އެންގި މައްސަލަ މާލިއްޔަތު ކޮމިޓީ އިން ބަލަނީ

އިންފޮމޭޝަން ކޮމިޝަނަރުގެ އޮފީސް (އައިކޮމް) ގެ މުވައްޒަފުންނަށް ދެމުން އައި ލިވިންގ އެލަވަންސް ހުއްޓާލައި، ވޭތުވެދިޔަ އެއް އަހަރާއި 10 މަސްދުވަހުގެ ތެރޭގައި ލިވިންގ އެލަވަންސްގެ ގޮތުގައި މުވައްޒަފުންނަށް ދިން ފައިސާ އެ މުވައްޒަފުންގެ އަތުން ނެގުމަށް ފިނޭންސް މިނިސްޓްރީން އަންގާފައިވާ މައްސަލަ އެއް ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހުށަހަޅައިފި އެވެ.

އަމިއްލަ ފަރާތަކުން މާލިއްޔަތު ކޮމިޓީ އަށް ހުށަހެޅި މި މައްސަލަ އާއި ބެހޭ ގޮތުން، ބުދަ ދުވަހު ބޭއްވުނު އެ ކޮމިޓީ ގެ ޖަލްސާގައި ވަނީ މަޝްވަރާކޮށްފަ އެވެ. މި މައްސަލައަކީ ސަރުކާރުގެ މުވައްޒަފުންގެ މުސާރަ އާއި އިނާޔަތްތަކާ ގުޅޭ މުހިންމު މައްސަލައަކަށްވުމުން، ކޮމިޓީން ވަނީ މި މައްސަލަ ބަލައި ދިރާސާކުރުމަށް ނިންމާފަ އެވެ.

މި މައްސަލައާ ބެހޭގޮތުން ވާހަކަ ދައްކަވަމުން ކެލާ ދާއިރާގެ ޕީއެންސީ މެންބަރު އަބްދުﷲ ޝަރީފް ވިދާޅުވީ، އައިކޮމް މުވައްޒަފުންގެ އިހުމާލެއް ނެތި އެ މުވައްޒަފުންނަށް އިތުރަށް ދީފައިވާ ލިވިންގ އެލަވަންސްގެ ފައިސާ، މުވައްޒަފުންގެ އަތުން އިއާދަކުރުމަކީ ހަމަ އެއް ނޫންކަމަށެވެ. މުވައްޒަފުންނަށް މި އިނާޔަތް ދީފައިވަނީ އެ މުވައްޒަފުންގެ ފަރާތުން އެއްވެސް ގޯހެއް ނުވަތަ އިހުމާލެއް ނެތި، އޮފީހުގެ ފަރާތުން ކަމަށްވާތީ، މުވައްޒަފުންގެ އަތުން އެ ފައިސާ އަތުލުމަކީ އިންސާފުވެރި ކަމެއް ނޫންކަމަށް ޝަރީފް ވިދާޅުވި އެވެ.

އެހެންކަމުން، މި މައްސަލާގައި، ކޮމިޝަނުގެ ފަރާތުން އިހުމާލުވެފައިވާ މުވައްޒަފުން ދެނެގަތުމަށްޓަކައި މައްސަލާގައި ކަން ހިނގާފައިވާ ގޮތް ބެއްލެވުމަށް އެ އޮފީހަށް އެންގުމަށާއި، މައްސަލާގައި މިނިސްޓްރީ އޮފް ފިނޭންސް އެންޑް ޕްލޭނިންގެ ލަފާއެއް ހޯދުމަށް ޝަރީފް ހުށަހަޅުއްވި އެވެ. މި ހުށަހެޅުމުގެ މައިގަނޑު މަގްސަދަކީ، މައްސަލާގައި ޒިންމާވާން ޖެހޭ ފަރާތްތައް ދެނެގަތުމާއި، މުވައްޒަފުންގެ ހައްގުތައް ރައްކާތެރި ކުރުމެވެ.

ޝަރީފް ގެ މި ހުށަހެޅުމަށް މަޖިލީހުގެ ފުނަދޫ ދާއިރާގެ ޕީއެންސީ މެމްބަރު މުހައްމަދު މަމްދޫހް ތާއީދު ކުރެއްވުމުން، ކޮމިޓީ އިން ވަނީ އެ ހުށަހެޅުން ފާސްކޮށްފަ އެވެ. މި ހުށަހެޅުން ފާސްކުރުމާ އެކު، މާލިއްޔަތު ކޮމިޓީން މި މައްސަލަ ތަހުގީގުކޮށް، ކަން ހިނގާފައިވާ ގޮތް ބަލައި، ހައްލެއް ހޯދުމަށް މަސައްކަތް ކުރާނެ ކަމަށް ބެލެވެ އެވެ.