ބެންޒެމާ، އަލް ޙިލާލް އަށް ބަދަލުވެއްޖެ

ސައުދީ ޕްރޯ ލީގުގެ އަލް އިއްތިހާދަށް ކުޅެމުން އައި ފްރާންސްގެ ކަރީމް ބެންޒެމާ، އެ ކުލަބު ދޫކޮށް ވާދަވެރި އަލް ޙިލާލް އަށް ބަދަލުވެއްޖެ އެވެ.

އުމުރުން 38 އަހަރުގެ ކުޅުންތެރިޔާ އަލް ޙިލާލް އަށް މިހާރު ބަދަލުވެފައިވާއިރު، އެ ކުލަބުން ވަނީ ރަސްމީކޮށް އެކަން އިއުލާން ވެސް ކޮށްފަ އެވެ. އަލް ޙިލާލް އަށް ބެންޒެމާ ބަދަލުވެފައިވާއިރު، އޭނާ އާއި އަލް އިއްތިހާދާ ދެމެދު އޮތީ ގުޅުން ވެސް ގޯސްވެފަ އެވެ. 

ރެއާލް މެޑްރިޑް ދޫކޮށްލުމަށް ފަހު ބެންޒެމާ އަލް އިއްތިހާދަށް ބަދަލުވީ 2023 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައި އޮތީ ތިން އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު 2026 ވަނަ އަހަރުގެ ޖޫން މަހުގެ ނިޔަލަށް ހަމަވާން އޮތްއިރު ވެސް، އެއްބަސްވުން އައު ކުރުމާ މެދު ގޮތެއް ނުނިމެ އެވެ.

އެހެންވެ ޖެހުނު މައްސަލައިގައި ބެންޒެމާ ވަނީ އަލް އިއްތިހާދުގެ މެޗުތައް ކުޅުން ވެސް މަޑު ޖައްސާލައިފަ އެވެ. އެއަށް ފަހު އޭނާ ވާދަވެރި އަލް ޙިލާލް އަށް ބަދަލުވީ އެއް އަހަރާ ބައިގެ އެއްބަސްވުމެއްގެ ދަށުންނެވެ. އަލް ޙިލާާލް އަކީ ބެންޒެމާގެ ކެރިއަރުގައި އޭނާ ކުޅޭނެ ހަތަރު ވަނަ ކުލަބެވެ.

އަލް އިއްތިހާދުގައި ހޭދަ ކުރި މުއްދަތުގެ ތެރޭގައި ބެންޒެމާ ވަނީ އެ ކުލަބަށް ކުޅެދިން 87 މެޗުގައު 57 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ ސައުދީ ޕްރޯ ލީގުގެ އިތުރުން، ކިންގްސް ކަޕް ވެސް ކާމިޔާބު ކޮށްފަ އެވެ.