ސައުދީ ޕްރޯ ލީގުގައި އަލް އިއްތިހާދާ ދެކޮޅަށް ކުޅުނު މެޗުން މޮޅުވެ، އަލް ނަޞްރުން ލީގު ތާވަލްގެ އެއް ވަނަ މަގާމަށް ޖެހިލައިފި އެވެ.

ހުކުރު ދުވަހުގެ ރޭ ކުޅުނު މެޗު އަލް ނަޞްރު އިން ކާމިޔާބު ކުރީ 2-0 އިންނެވެ. މެޗުގައި އަލް ނަޞްރު އިން އެ ޓީމުގެ ދެ ލަނޑު ވެސް ޖަހާފައި ވަނީ ފުރަތަމަ ހާފުގަ އެވެ. '

މެޗު ފަށައިގެން ނުވަ ވަނަ މިނެޓުގައި އަލް ނަޞްރު އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ސަޑިއޯ މާނޭ އެވެ. އޭގެ ފަހުން ފުރަތަމަ ހާފުގެ 35 ވަނަ މިނެޓުގައި އަލް ނަޞްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗަށް ފަހު ވާހަކަ ދައްކަމުން އަލް ނަޞްރުގެ ކޯޗު ޖޯޖް ޖީސަސް ބުނެފައި ވަނީ، އަލް ނަޞްރު އަންނަނީ މަޑު މަަޑުން ކުރިއަށް އަރަމުން ކަމަށާއި، އޭނާގެ ޓީމުގެ ވަރަށް ގިނަ ކަންކަން ރަނގަޅު ކޮށްފައިވާ ކަމަށެވެ. އެގޮތުން ފާއިތުވި ތިން މަސް ދުވަހުގެ ތެރޭގައި ވެސް ޓީމުން އެކަން ފެނިފައިވާ ކަމަށް އޭނާ ބުންޏެވެ.

މީގެ އިތުރުން އޭނާ ބުނެފައި ވަނީ އަލް އިއްތިހާދު މެޗުގައި ޓީމުގެ ކުޅުންތެރިން ދެއްކި ކުޅުމާ މެދު ހިތްހަމަ ޖެހޭ ކަމަށާއި، ވާދަވެރި ޓީމެއް އަތުން ތިން ޕޮއިންޓު ލިބުމަކީ ވަރަށް ބޮޑު ހިތްހަމަ ޖެހުމެއް ކަމަށެވެ. އޭނާ ބުނީ އަލް އިއްތިހާދުން މިހާރު ކުރިއަށް ގެންދާ ޕްރޮޖެކްޓުގައި ވެސް މަސައްކަތް ކުރަމުން އަންނަތާ ތިން އަހަރުވެފައިވާއިރު، އަލް ނަޞްރު އަދި ވީ ތިން މަސް ދުވަސް ކަމަށެެވެ.

އަލް ނަޞްރުގެ ކޯޗަކަށް ޖީސަސް ހަމަޖެއްސީ މިއަހަރުގެ ޖުލައި މަހުގެ ތެރޭގަ އެވެ. އޭނާ ބުނީ ބޭނުން ވަނީ އެ ޓީމާ އެކު ކާމިޔާބު ހޯދަން ކަމަށާއި، ކުރަން ޖެހޭ މަސައްކަތް ފަސޭހަ ނުވާނެ ކަމަށެވެ. މިވަގުތު އޮތް ރޫޙުގައި ޓީމު ކުރިއަށް ދާން ބޭނުންވާކަން ފާހަގަކޮށް އޭނާ ބުނީ، އަލް ނަޞްރަކީ މިހާރު ވެސް ލީގުގައި އެންމެ ވަރުގަދަ އެއް ޓީމު ކަމަށެވެ.

ލީގުގައި މިހާތަނަށް ކުޅެފައިވާ ހަތަރު މެޗުން ވެސް މޮޅުވެ، އަލް ނަޞްރު އެއް ވަަނައިގައި އޮތީ 12 ޕޮއިންޓާ އެކު އެވެ. ދެ ވަނައިގައި އަލް އިއްތިހާދަށް ލިބެނީ ނުވަ ޕޮއިންޓެވެ.