ކިންގްސް ކަޕްގެ ގަދަ 16 ވަނަ ބުރުގައި ވާދަވެރި އަލް އިއްތިހާދުއާ ދެކޮޅަށް ކުޅުނު މެޗުން ބަލިވެ، އަލް ނަޞްރު މުބާރާތުން ކަޓައިފި އެވެ.

އަންގާރަ ދުވަހުގެ ރޭ ކުޅުނު މެޗު އަލް އިއްތިހާދުން ކާމިޔާބު ކުރީ 2-1 އިންނެވެ. މެޗުގައި އަލް އިއްތިހާދުން ލަނޑު ޖަހައި ކުރި ހޯދާފައި ވަނިކޮށް، އަލް ނަޞްރުން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ލަނޑެއް ޖަަހައިގެން އަލް އިއްތިހާދު ވަނީ މެޗުން މޮޅުވެފަ އެވެ.

މެޗު ފަށައިގެން 15 ވަނަ މިނެޓުގައި އަލް އިއްތިހާދުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ފްރާންސްގެ ކަރީމް ބެންޒީމާ އެވެ. އޭގެ 15 މިނެޓު ފަހުން އެންޖެލޯ ގެބްރިއެލް ވަނީ ލަނޑު ޖަހައި އަލް ނަޞްރަށް ނަތީޖާ ހަމަހަމަ ކޮށްދީފަ އެވެ. މެޗުގެ ފުރަތަމަ ހާފުގެ އިތުރު ވަގުތުގައި ހޮސެމް އޮއާރް ވަނީ ލަނޑު ޖަހައި އަނެއްކާ ވެސް އަލް އިއްތިހާދަށް ކުރި ހޯދައިދީފަ އެވެ.

މެޗަށް ފަހު ވާހަކަ ދައްކަމުން އަލް އިއްތިހާދުގެ ކޯޗު ސާޖިއޯ ކޮންސެއިސާއޯ ބުނެފައި ވަނީ، އަލް ނަޞްރުގެ ކޯޗު ޖޯޖް ޖީސަސް އަކީ މޮޅު މީހެއް ކަމަށާއި، އޭނާ ވަނީ ޕޯޗުގަލް އަށް ނިސްބަތްވާ ކޯޗުންގެ ތެރެއިން އެންމެ މޮޅު ފަސް ކޯޗުންގެ ތެރޭގައި ހިމެނޭ ކޯޗެއް ކަމަށެވެ. ކޮންސެއިސާއޯ ބުނީ، އޭނާގެ ފަރާތުން ޖޯޖް އަށް އޮތީ ފުރިހަމަ އިޙުތިރާމް ކަމަށެވެ.

މީގެ އިތުރުން އަލް ނަޞްރުގެ ކޯޗު ޖޯޖް ބުނެފައި ވަނީ އެ ޓީމުގެ އެންމެ މުހިންމު އަމާޒަކަށް އޮތީ ސައުދީ ޕްރޯ ލީގު ކަމަށެވެ. އަދި ކިންގްސް ކަޕަކީ އެ ޓީމުގެ ދެ ވަނަ އަމާޒު ކަމަށް ވީ ނަމަވެސް، އެ މުބާރާތަކީ ވެސް ވަރަށް ބޮޑު މުބާރާތެއް ކަމަށް އޭނާ ބުންޏެވެ. އެ މުބާރާތް ކާމިޔާބު ކުރަން ވެސް އަލް ނަޞްރުން ބޭނުންވި ކަމަށާއި، ނަމަވެސް އެކަމުގައި ފެއިލް ވެފައިވާ ކަމަށް އޭނާ ބުންޏެވެ.

މިއީ އަލް އިއްތިހާދާ ދެކޮޅަށް ކުޅުނު ތިން ވަނަ މެޗުކަން ފާހަގަކޮށް ޖޯޖް ބުނީ، އޭގެ ތެރެއިން ދެ މެޗުން އަލް ނަޞްރު މޮޅުވެފައިވާ ކަމަށާއި، އަނެއް މެޗުން ބަލިވެފައިވާ ކަމަށެވެ. އޭނާ ބުނީ މެޗުގެ ފުރަތަމަ ހާފުގައި ރަނގަޅަށް ކުޅެވުނު ކަމަށާއި، އަލް އިއްތިހާދަށް ދެއްކި ރަތް ކާޑަށް ފަހު، އަނެއްކާ ވެސް ނަތީޖާ ހަމަހަމަ ކުރަން އަލް ނަޞްރުން ވަރަށް މަސައްކަތް ކުރި ކަމަށެވެ. އެހެން ނަމަވެސް، އެކަން ކާމިޔާބު ނުކުރެވި، މެޗުން ބަލިވީ ކަމުގައި އޭނާ ބުންޏެވެ.

އަލް ނަޞްރު ބަލިކޮށް އަލް އިއްތިހާދުން މުބާރާތުގެ ކުއާޓާ ފައިނަލްގެ ފުރުސަތު ހޯދިއިރު، އެ ޓީމަކީ އެންމެ ފަހުން މުބާރާތް ކާމިޔާބު ކޮށްފައިވާ ޓީމެވެ. އަލް އިއްތިހާދުން ވަނީ މިހާތަނަށް ހަ ފަހަރު ކިންގްސް ކަޕް ކާމިޔާބު ކޮށްފަ އެވެ.