އަލް ތައާވޫން އަތުން ހޯދި މޮޅާ އެކު، އަލް ނަޞްރުން ފަރަގު ކުޑަ ކޮށްފި

ސައުދީ ޕްރޯ ލީގުގައި އަލް ތައާވޫންއާ ދެކޮޅަށް ކުޅުނު މެޗުން މޮޅުވެ، އަލް ނަޞްރުން ލީގު ތާވަލްގެ ދެ ވަނައިގައި ފަރަގު ކުޑަ ކޮށްފި އެވެ.

ހޯމަ ދުވަހުގެ ރޭ އަލް ތައާވޫންއާ ދެކޮޅަށް ކުޅުނު މެޗު އަލް ނަޞްރުން ކާމިޔާބު ކުރީ 1-0 އިންނެވެ. މެޗުގައި އަލް ނަޞްރުގެ ހަމައެކަނި ލަނޑަކީ މެޗުގެ ފުރަތަމަ ހާފުގައި ޖެހި ލަނޑެވެ. 

މެޗު ފަށައިގެން އަލް ނަޞްރުން ވަނީ ރަނގަޅަށް ކުޅެން މަސައްކަތް ކޮށްފަ އެވެ. މެޗުގެ ކުރީ ކޮޅު އަލް ނަޞްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަށް ލިބުނު ފުރުސަތުގައި އޭނާ ފޮނުވާލި ބޯޅަ ދިޔައީ، ހުރަސް ދަނޑި މަތިން ބޭރަށެވެ.

އޭގެ ފަހުން އަލް ނަޞްރަށް ލިބުނު ހިލޭ ޖެހުމެއްގައި ރޮނާލްޑޯ ހުރަސްކޮށްދިން ބޯޅަ މުޙައްމަދު ސިމަކާން ބޮލުން ޖަހައި ގޯލަށް ވައްދާލި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށް ފަހު އޮފްސައިޑުގައި ހުރުމުން އެ ލަނޑު ބަލައި ނުގަންނަން ވަނީ ނިންމައިފަ އެވެ. 

މެޗުގެ ފުރަތަމަ ހާފުގެ ފަހު ވަގުތުގައި އަލް ނަޞްރަށް ލީޑު ލިބުނީ، އެ ޓީމުގެ ސަޑިއޯ މާނޭ ހުރަސްކޮށްދިން ބޯޅަ އަށް ކުޅެން އުޅުމުގެ ތެރޭގައި އަލް ތައާވޫންގެ މުޙައްމަދު އަލް ދައުސަރީގެ ބޮލުގައި ޖެހި ބައި ކޮޅަށް ވަތް ލަނޑުންނެވެ.

މޮޅާ އެކު، އަލް ނަޞްރުން ވަނީ އެއް ވަނައިގައި އޮތް އަލް ޙިލާލްއާ ދެމެދު އޮތް ފަރަގު ފަސް ޕޮއިންޓަށް ކުޑަ ކޮށްފަ އެވެ. އެއް ވަނައިގައި އަލް ޙިލާލް އޮތީ 17 މެޗުން 45 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި އަލް ނަޞްރަށް ލިބެނީ 40 ޕޮއިންޓެވެ.