ޑރ. ވަހީދު އެޕްސްޓީން އަށް: މިއުޅެނީ މުސްކުޅި ރައީސް މައުމޫނަށް ރަނގަޅު ފިލާވަޅެއް ދޭން، ސިޔާސީ ކަންކަމުން ދުރަށް ގޮސް، ރިޓަޔަރ ކޮށްގެން ހުންނަވަން ދަސްކޮށްދޭން!
އެމެރިކާ ސަރުކާރުން ޖެފްރީ އެޕްސްޓީން އާ ގުޅުން ހުރި މިލިއަން އާ ފައިލްތައް އާންމުކުރި އިރު ކުރީގެ ރައީސް ޑރ. ވަހީދާއި އެޕްސްޓީން އާ ދެމެދު ހިނގި އީމެއިލްތައް އާންމުވެއްޖެ. 2013 ގައި ވަހީދު އެޕްސްޓީން އަށް ފޮނުވި އީމެއިލްގައި ރައީސް މައުމޫނަށް ރަނގަޅު ފިލާވަޅެއް ދީ ސިޔާސީ ކަންކަމުން ދުރުވެ ރިޓަޔަރކުރައްވަން ދަސްކޮށްދޭނެ ކަމަށް ވަނީ ވިދާޅުވެފައި.
ޑރ. މުހައްމަދު ވަހީދު ހަސަން މަނިކު އަދި މައުމޫނު އަބްދުލް ގައްޔޫމް. | ސޯޝަލް މީޑިއާ
ކުރީގެ ރައީސް ޑރ.މުހައްމަދު ވަހީދު ހަސަން މަނިކުގެ ގާތް އެކުވެރިޔާ ޖެފްރީ އެޕްސްޓީން އަށް ފޮނުއްވި އީމެއިލް އެއް ގައި އޭނާ މި އުޅުއްވަނީ "މުސްކުޅި ރައީސް މައުމޫނަށް" ރަނގަޅު ފިލާވަޅެއް ދޭން ކަމަށާއި ސިޔާސީ ކަންކަމުން ދުރަށް ގޮސް، ރިޓަޔަރ ކޮށްގެން ހުންނަވަން ދަސްކޮށްދޭން ކަމަށް ވިދާޅުވި ކަން ހާމަ ވެއްޖެ އެވެ.
މިކަން ހާމަވީ އެޕްސްޓީން އަށް, މެއި 15، 2013 ގައި ޑރ. ވަހީދު ފޮނުއްވި އީމެއިލަކުން ނެވެ.
އެމެރިކާގެ ޖަސްޓިސް ޑިޕާޓްމަންޓުން، ޖިންސީ ކުށްވެރިޔާ ޖެފްރީ އެޕްސްޓީން އާ ގުޅުންހުރި އެތައް މިލިއަން އާ ފައިލްތަކެއް އާންމުކުރި އިރު ރާއްޖޭގެ ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ އާއި އެޕްސްޓީން އާ ދެމެދު ހިނގާފައިވާ ގިނަ އަދަދެއްގެ އީމެއިލްތަކެއް ވަނީ އާންމު ވެފަ އެވެ.
މިއީ މިދިޔަ އަހަރު ފާސްކުރި ގާނޫނެއްގެ ދަށުން، އެމެރިކާ ސަރުކާރުން މިހާތަނަށް އާންމުކުރި އެޕްސްޓީން އާ ގުޅޭ އެންމެ ގިނަ އަދަދެއްގެ ލިޔެކިޔުންތަކެވެ.
މިދިޔަ ހުކުރު ދުވަހު އާންމުކުރި މި މައުލޫމާތުތަކުގެ ތެރޭގައި ތިން މިލިއަން ސަފުހާގެ ލިޔެކިޔުމާއި، 180،000 ފޮޓޯ އަދި 2،000 ވީޑިއޯ ހިމެނެ އެވެ. މި ތަކެތި އާންމުކޮށްފައި ވަނީ، އެޕްސްޓީން އާ ގުޅުންހުރި ހުރިހާ ލިޔެކިޔުންތަކެއް ހާމަކުރުމަށް އެމެރިކާގެ ރައީސް ޑޮނަލްޑް ޓްރަމްޕް ސޮއިކުރެއްވި ގާނޫނެއްގެ ދަށުންނެވެ.
އެމެރިކާ ސަރުކާރުން ހާމަ ކުރި ލިޔުންތަކަށް ބަލާއިރު ރައީސް ޑރ. މުއިއްޒުގެ ޚާއްޞަ މަންދޫބުގެ މަޤާމު ދެއްވާފައިވާ، ކުރީގެ ރައީސް ޑރ. ވަހީދު އާ އެޕްސްޓީން އާ ދެމެދު ވަރަށް ގާތް ގުޅުމެއް އޮތް ކަން ވަނީ ހާމަވެފަ އެވެ.
"އަޅުގަނޑުމެން މިދަނީ އިތުރު ދެ ޕާޓީ އެއް އަޅުގަނޑުމެންނާ ގުޅުމަށް މަސައްކަތް ކުރަމުންނެވެ. އަދި އިންތިޚާބުގެ ފުރަތަމަ ބުރުން ކާމިޔާބު ހޯދޭނެކަމުގެ ފުރިހަމަ އިތުބާރު އެބައޮތެވެ. ކުރީގެ ރައީސް މައުމޫން އަބްދުލްގައްޔޫމް އެމަނިކުފާނުގެ އާއިލީ ބޭފުޅުންނަށްޓަކައި މި އިންތިޚާބު ކާމިޔާބު ކުރައްވަން ކުރައްވާ މަސައްކަތުން، މިފަހަރު ރަނގަޅު ފިލާވަޅެއް ލިބިވަޑައިގަންނަވާނެއެވެ. އެއީ ސިޔާސީ ކަންކަމުން ދުރުވެ، ރިޓަޔަރ ކުރައްވައިގެން ހުންނަވަންވީ ވަގުތު ޖެހިއްޖެކަން މިފަހަރު ހާމަވެގެންދާނެއެވެ." ރައީސް ވަހީދު އެޕްސްޓީން އަށް ފޮނުއްވި އީމެއިލް ގައިވެ އެވެ.
އެޕްސްޓީން ވަހީދަށް ފޮނުވި ޖަވާބު ގައި ކޯލިޝަން އަށް މަރުހަބާ ކިޔާ ކަމަށް ބުނެފައިވެ އެވެ.
