މުއިއްޒޫ ހެޔޮ ނުވާނެ. ތިގޮތަށް ދެފުށް ނުދެއްކިއްޔާ ރަނގަޅީ.!

މުއިއްޒުއަށް

ހާސަރުތަކެއް ނުދަމާ ސީދާ މުތުލަގަށް މިފަހަރު ބުނެލާނަމެވެ. އޭގެ ކުރިން ފުރަތަމަ އައްވަލަށްވެސް އެއް ކަމެއް ހަނދާން ކޮށްލަ ދީފަ އެވެ.

މުއިއްޒޫ އެވެ. ދޭތެރެ ދޭތެރެއިން މިހެން ސިޓީއެއް ލިޔެލާ ކަންކަން ހަނދާންކޮށްލަ މިދެނީ މުއިއްޒުވެސް މާ ބޮޑަކަށް އިހު ވާހަކަތައް އެފުށް މިފުށަށް ޖަހާ އޮޅުން ބޮޅުންކޮށް ތައްމިނަށް ބަސްފުޅު ވިދާޅުވާތީ އެވެ. މަށާ މަގޭ އެކުވެރިންގެ ޒިންމާއަކީ މުއިއްޒަށް ހަނދާން ކޮށްދިނުން ކަމަށް ލޮލުން ބޮލުން ގަބޫލު ކުރާތީ އެވެ.

މުއިއްޒޫ އެވެ. އަނެއްކާވެސް އެއްކަލަ ވާހަކަގަނޑު ތިޔަދައްކާންފެށީ މާ ގަދައަކަށެވެ. ދެފުށް ފެންނާނެޔޭ، ފޮރުވާނެ އެއްޗެއް ނުބާއްވާނަމޭ، ހާމަކުރުމުގައި ގެންގުޅުއްވާނީ އިންތިހާއޭ ވިދާޅުވެ އެ ހާސަރުގަނޑު އަނެއްކާވެސް ތިޔަފެށްޓެވީ ދަންމަވާށެވެ.

މުއިއްޒޫއެވެ. އަހަރަމެން މުއިއްޒު ހޮވީ ލައްކަ ތިޔަ ކަހަލަ ހާމަކުރުން ހާމަކުރާން ވައުދުވީމަ އެވެ. އިބުރާހީމުމެން ނުކުރީއޭ ބުނެ މުއިއްޒު ދެއްކި ވާހަކަތައް އަޑު އަހައިގެންނެވެ. ފޮރުވާނެ އެކައްޗެއްވެސް ނުބާއްވާނަމޭ ވިދާޅުވީމާ އޭގައިވެސް އެލިގަނެގެންނެވެ.

މުއިއްޒޫ އެވެ. އެކަމަކު ވެރިކަން ދެބަޔަށް އެޅެންދާއިރު އަދިވެސް ތިޔަ ދައްކަވަނީ ހަމަ އެހޮޅި ވާހަކަ އެވެ. މިހާރުވެސް ތިޔަ ވިދާޅުވަނީ އޭރު ކެންޕޭނުގައިވެސް ދެއްކެވި ވާހަކަތަކެވެ. އަދިވެސް ތިޔަ ވިދާޅުވަނީ ކުރާނެ ވާހަކައެވެ. ކުރައްވާތަނެއް ހަމަ އެއްގޮތަކަށްވެސް ނުފެންނަނީ އެވެ.

މުއިއްޒޫ އެވެ. ނިކަން ކުޑަކުޑަކަމަކުން ފަށާނަމެވެ. ތިޔަ އުޅެނީ މުއިއްޒަށް އަތްގާތްކޮށްލަދޭން ލައްވާފަވާ ސިޔާސީ ކުދިންކޮޅުގެ އަދަދު ސީދާ ސީދަލަށް ވިދާޅުވެލަން ނުކުރިގެންނެވެ. މީގެ ކުރީގައި އައި ސަރުކާރުތަކުން އެމީހުންނާ އެމީހުންގެ ވަނަވަރުތައް ރައީސް އޮފީހުގެ ވެބްސައިޓުގައިވެސް ބަހައްޓަ އެވެ. އެކަމަކު އެވަރު ކޮށްލާންވެސް ކެރިވަޑައި ނުގަންނަވާއިރު މުއިއްޒަށްވެސް މުއިއްޒަށް ލެއްވުނު މީހުން ނޭނގޭހާ ގިނަވެއްޖެކަން ނުދަންނަ މީހަކު މި ގައުމަކު ނޫޅޭނެ އެވެ.

މުއިއްޒޫ އެވެ. އިންޑިޔާ އެއްބަސްވުން ތަކާ ތިޔަ ހައްދަވާ ޑްރޯން ޑީލާ ފަޅުތަކާއި ރަށްތައް ބަހާލާ އެއްބަސްވުންތަކުގެ ވާހަކަ މަށަކު ދައްކާކަށް ނެތީމެވެ. އޭރު ގައުމީ ސަލާމަތެއް އޮވެގެން ފޮރުވާނެ އެއްޗެއް ނޯންނާނެއޭ ވިދާޅުވިއަސް އެފަދަ ކޮންމެ ކަމެއްގައި މުއިއްޒުގެ ސިއްކައަކީ ގައުމީ ސަލާމަތް ކަމަށް މިހާރު ތިޔަވަނީ ހައްދަވާފަ އެވެ. އެހެންވެ މަވެސް ގައުމީ ސަލާމަތާ މަގޭ ސަލާމަތަކަށް އެވާހަކައެއް އިތުރަކަށް ނަގަނަގައިގެނެއް ނުދައްކާނަމެވެ.

މުއިއްޒޫ އެވެ. މިހާތަނަށް މާލީ ބަޔާންތަކާއި އެހެނިހެން ހާމަކުރުންތައް ހާމަ ނުކުރުމުގެ ރެކޯޑް ތިޔައޮތީ މުއިއްޒު އަތްޕުޅުގަ އެވެ. ކިތައްމެ ވަރަކަށް މުއިއްޒު ރެކޯޑް ހެއްދެވުމުގެ ޝައުގު ގެންގުޅުއްވިއަސް އެކަމުން ރެކޯޑް ހެއްދެވުމަކީ ވިޔާދާ ކަމެއް ނޫނެވެ. ގާނޫން އަސާސީގައި ކަޅާހުދުން މުތުލަގަށް އެހެން އެކަން ނުކުރެވޭނެ ކަމަށް ބުނެފައިވާއިރުވެސް މުއިއްޒާ މުއިއްޒުގެ ވަޒީރު ބޭފުޅުންނާ، ހަންމަތަ ކޮށްގެން ގެންގުޅޭ މަޖިލިސް ކުދިންކޮޅުގެ މާލީ ބަޔާން ހުށަނާޅުއްވަންވެސް ތިޔަ ހުންނަވަނީ ހާމަކުރެއްވުމުގައި ހިއްޕަވައިގެންނެވެ.

މުއިއްޒޫ އެވެ. ކޮރަޕްޝަނޭ ފޮރުވާނެ އެއްޗެއް ނުބާއްވާނަމޭ ވިދާޅުވެ ތިޔަދައްކާ ވާހަކަތަކަށް މީހުން އެތިބެނީ ހީނހީ ބަނޑުގައި ގޮށްލާ ހިސާބުގައެވެ. އެމީހުން އެކިޔާކުދި އަޑު އަހާކަށް މަށަކަށް ހަމަ ލާހިކު ކުޅަދާނައެއް ނޫނެވެ. މާ މަޝްރޫއުތައް ހިންގޭ ރައީސަކަށް ވެވަޑައިގަންނަވަން އެކީ އެއްފަހަރާ ބިޑަކާ ނުލައި ކާފަގެ މަސްބެހުމަށް ގާތްމީހުންނަށް ތިޔަ ބައްސަވާލި ޕްރޮޖެކްޓްތަކުގެ ވާހަކަ ނުދައްކާނެ މީހަކު މިގައުމު ކީއްކުރަން ހެއްޔެވެ. ބޭރު ކަރަޔަކުވެސް ނުހުންނާނެ އެވެ.

މުއިއްޒޫ އެވެ. އަހަރެން މާ ބޮޑަކަށް ދެން އިތުރަކަށް މިވާހަކައެއް ނުދައްކާނަމެވެ. އަހަރެން މިދެއްކީ ހަގީގަތްކަން މުއިއްޒު އަމިއްލައަށް ވިސްނާލަން ހަމަ އެންމެ މިސާލެއް ދޫކޮށްލާފައި މިފަހަރަށް ނިންމާލާނަމަމެވެ. ނިކަން ރަނަގަޅަށް އަޑުއައްސަވާށެވެ. މައުލޫމާތު ހާމަކުރުމަށް ބާރު އެޅުމަށާއި އެކަން ކުރޭތޯ ބެލުމަށް ގާނޫނު އަސާސީން ބާރު ލިބިދީގެން އުފައްދާފައިވާ ކޮމިޝަނެއް އޮވޭ ނޫންތޯއެވެ. އެމީހުން އެބުނަނީ މުއިއްޒުގެ ހާމަކުރުން ނެތް ވާހަކައެވެ. ޚުދު މުއިއްޒު އިންނަވާ ރައީސް އޮފީހުން ހާމަކުރާން ޖެހޭ މައުލޫމާތު ހާމަ ނުކޮށްގެން އެކޮމިޝަނުން އެއުޅެނީ އަބަދު އެކަމެއްގަ އެވެ. އާރުޓީއައިއަށް ރައީސް އޮފީހުން އަމަލު ނުކުރާތީ އެމައްސަލަ ބަލަބަލައެވެ. ނުވިތާކަށް ކޯޓަށްވެސް އެދަނީ ހުށަހަޅަމުންނެވެ.

މުއިއްޒޫ އެވެ. މިބުނި ކޮމިޝަނުން އެވަރަށް އެވާހަކަ ދައްކާނީވެސް ލައްކަވަރު ވީމަތާ އެވެ. ވީމާ ގެންގުޅުއްވާނީ ދެފުށް ފެންނަ ސިޔާސަތޭ، ފޮރުވާނެ އެއްޗެއް ނުބާއްވާނަމޭ، ޅަފޮޅޮލޭ ވިދާޅުވާނެ ޖާގައެއް ނެތެވެ. ރަނގަޅުވާނީ ތިޔަގޮތައް ދެފުށް ނުދެއްކިއްޔާ އެވެ. މަވާ ސަލާމެވެ.