އާދިއްތަ ދުވަހުގެ ރޭ ހުޅުމާލެ ފޭސް 1 ގެ ރައްޔިތުންނާ ރައީސް ބައްދަލުކުރައްވަނީ
ރައީސް މުއިއްޒު މާލޭގެ އަވަށްތަކުގެ ރައްޔިތުންނާ ބައްދަލުކުރައްވަމުން ގެންދަވާ ސިލްސިލާ ބައްދަލުވުންތަކުގެ ތެރެއިން ހުޅުމާލޭ ފުރަތަމަ ފިޔަވަހީގެ ރައްޔިތުންނާ އާދިއްތަ ދުވަހުގެ ރޭ ބައްދަލުކުރައްވާނެ އެވެ. މިހާތަނަށް ބޭއްވުނު ބައްދަލުވުންތަކުގައި ގިނަ އަދަދެއްގެ ރައްޔިތުން ވައުދު ނުފުއްދުމާއި މާލީ ހާލަތު ދައްވަމުންދާތީ ސަރުކާރާ މެދު ކަންބޮޑުވުންތައް ހިއްސާކުރަމުން އަންނައިރު ގިނަ ސުވާލުތަކަށް ޖަވާބު ނުލިބޭކަން ފާހަގަކުރެ އެވެ.
ރައީސް ޑރ މުހައްމަދު މުޢިއްޒު
މާލޭ ގެ އެކި އަވަށްތަކުގެ ރައްޔިތުންނާ ބައްދަލު ކުރެއްވުމަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބާއްވަވަމުން ގެންދަވާ ސިލްސިލާ ބައްދަލުވުންތަކުގެ ތެރެއިން ހުޅުމާލޭ ފުރަތަމަ ފިޔަވަހީ ގައި ދިރިއުޅޭ ރައްޔިތުންނާ އާދިއްތަ ދުވަހުގެ ރޭ ބައްދަލުކުރައްވާނެކަން އިއުލާން ކޮށްފި އެވެ.
ރައިސް އޮފީހުގެ ތަރުޖަމާނު ހީނާ ވަލީދު ވިދާޅުވި ގޮތުގައި، މި ބައްދަލުވުން އޮންނާނީ ބުރާސްފަތި ދުވަހު ގެ ރޭގަނޑު 20:30 ގައި ހުޅުމާލެ ފޭސް 1 ގެ ރެހެންދީ ސްކޫލްގަ އެވެ.
ހުޅުމާލެ އާއި ވިލިމާލެ ހިމެނޭހެން މާލޭގެ ހުރިހާ އަވަށްތަކުގެ ރައްޔިތުންނާ ބައްދަލު ކުރައްވާނެ ކަން ރައީސް އިއުލާން ކުރެއްވީ މި ސަރުކާރަށް ދެ އަހަރު ފުރުން ފާހަގަކުރަން މިދިޔަ މަހުގެ 17 ވަނަ ދުވަހުގެ ރޭ ބޭއްވި ހާއްސަ ޖަލްސާގަ އެވެ.
ރައްޔިތުންގެ ޚިޔާލާ މަޝްވަރާ އަދި ހުރި ކަންބޮޑުވުންތައް އަޑު އެއްސެވުމަށް ކަމަށް ވިދާޅުވެ ރައީސް މުއިއްޒު ބާއްވަމުން ގެންދަވާ މި ބައްދަލުވުން ތަކުގައި މިހާތަނަށް ވިލިމާލެ، މައްޗަންގޮޅި، މާފަންނު، ހެންވޭރު، ގަލޮޅުގެ އަދި ހުޅުމާލެ ފޭސް 2 ގެ ރައްޔިތުންނާ ވަނީ ބައްދަލުކުރައްވާފަ އެވެ. މީގެ އިތުރުން ބުދަ ދުވަހުގެ ރޭ ރައީސް ވަނީ ކުދި އަދި މެދުފަންތީގެ ވިޔަފާރިވެރިންނާ ވެސް ބައްދަލުކުރައްވާފަ އެވެ.
ފާހަގަކޮށްލެވޭ ގޮތުގައި، ކޮންމެ ބައްދަލުވުމެއްގައި ވެސް ގިނަ އަދަދެއްގެ ރައްޔިތުން ދަނީ ރައީސް މުއިއްޒު އާއި ސަރުކާރުގެ ނާޤާބިލްކަން ފާހަގަކޮށް ފާޑުކިޔަމުންނެވެ. ވައުދު ނުފުއްދާތީ އާއީ މާލީ ހާލަތު ދައްވަމުން ދާތީ އެ ކަންބޮޑުވުންތައް އާއްމުން ދަނީ ކެނޑިނޭޅި ހިއްސާކުރަމުންނެވެ. އެހެންކަމުން މި ބައްދަލުވުންތައް ވެފައި ވަނީ ސަރުކާރަށް ވަރަށް ބޮޑަށް ޕްރެޝަރ ބޮޑުވެގެންދާ ބައްދަލުވުންތަކަށެވެ.
މި ބައްދަލުވުންތަކުގައި ރައްޔިތުން އެތައް ބައިވަރު ސުވާލެއް ކުރި ނަމަވެސް ގިނަ ސުވާލުތަކަށް ޖަވާބު ނުލިބޭ ކަމަށް ބައްދަލުވުންތަކަށް ދާ މީހުން ފާހަގަ ކުރެ އެވެ.
