ރައީސް އޮފީހުގެ ހަރަދު، ބަޖެޓަށް ވުރެ 7 މިލިއަން ރުފިޔާ އިތުރުވެއްޖެ
ފިނޭންސް މިނިސްޓްރީގެ ރިޕޯޓުން ދައްކާ ގޮތުން ރައީސް އޮފީހުން 2025 ވަނަ އަހަރަށް ކަނޑައަޅާފައިވާ 206.8 މިލިއަން ރުފިޔާގެ ބަޖެޓަށްވުރެ 7.1 މިލިއަން ރުފިޔާ އިތުރަށް ޑިސެމްބަރު 11 ވަނަ ދުވަހުގެ ނިޔަލަށް ހަރަދުކޮށްފައިވޭ. މުވައްޒަފުންގެ އަދަދު ބޮޑުވުމާއި ރައީސް މުއިއްޒު އަތޮޅުތަކަށް ކުރައްވާ ދަތުރުތަކާއި ކޮމިއުނިޓީ މީޓިންގްތައް ބާއްވަވުމަކީ ހަރަދު އިތުރުވުމުގެ މައިގަނޑު ސަބަބުތަކެއް ކަމަށް ބެލެވޭ. ބަޖެޓަށްވުރެ އިތުރަށް ހަރަދުކުރުމަކީ ފިސްކަލް ޑިސިޕްލިން ދަށްވުމުގެ ނިޝާނެއް ކަމަށް ފާހަގަކުރެވޭ.
ރައީސުލްޖުމްހޫރިއްޔާ ގެ އޮފީސް
ރައީސް އޮފީހަށް 2025 ވަނަ އަހަރަށް ފާސްކުރި ބަޖެޓަށް ވުރެ އިތުރަށް، މިމަހުގެ 11 ވަނަ ދުވަހުގެ ނިޔަލަށް 7 މިލިއަން ރުފިޔާ ހަރަދުކޮށްފައިވާ ކަމަށް، ފިނޭންސް މިނިސްޓްރީ ގެ ތަފާސްހިސާބުތަކުން ދައްކައިފި އެވެ.
ފިނޭންސް މިނިސްޓްރީން ނެރުނު ހަފްތާގެ ފިސްކަލް ޑިވެލޮޕްމަންޓް ރިޕޯޓުގައިވާ ގޮތުން ޑިސެމްބަރު 11 ވަނަ ދުވަހުގެ ނިޔަލަށް ރައީސް އޮފީހުން ހަރަދުކޮށްފައިވަނީ 213.9 މިލިއަން ރުފިޔާ އެވެ. ނަމަވެސް މި އަހަރަށް ރައީސް އޮފީހަށް ބަޖެޓުގައި ކަނޑައަޅާފައިވަނީ 206.8 މިލިއަން ރުފިޔާ އެވެ.
މިއިން ދައްކާ ގޮތުން ރައީސް އޮފީހުން ބަޖެޓަށްވުރެ 7.1 މިލިއަން ރުފިޔާ އިތުރަށް ހަރަދުކޮށްފައިވާ ކަން ފާހަގަކުރެވެ އެވެ.
ރައީސް އޮފީހުގެ ހަރަދު ބަޖެޓަށްވުރެ އިތުރުވެފައިވީ ނަމަވެސް، މިދިޔަ އަހަރުގެ މި މުއްދަތާ އަޅާބަލާއިރު މި އަހަރުގެ ހަރަދު މަދުވެފައިވާ ކަން ފާހަގަކުރެވެ އެވެ. މިދިޔަ އަހަރުގެ މި މުއްދަތުގައި ރައީސް އޮފީހުން ހަރަދުކޮށްފައިވަނީ 222 މިލިއަން ރުފިޔާ އެވެ.
ރައީސް އޮފީހުގައި މަސައްކަތްކުރާ މުވައްޒަފުންގެ އަދަދު ވަރަށް ބޮޑުކަމަށާއި، އަދި ދަތުރުތަކަށް ވެސް ވަރަށް ބޮޑަށް ހަރަދުކުރާ ކަމަށް ބެލެވެ އެވެ. ލޯކަލް ކައުންސިލް އިންތިހާބު ކައިރިވަމުން އަންނައިރު، ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު އަތޮޅުތަކަށް ކުރައްވާ ދަތުރުތައް ވެސް ދަނީ އިތުރު ކުރައްވަމުންނެވެ.
މީގެ އިތުރުން ރައީސް މުއިއްޒު މާލޭގައި ވެސް ރައްޔިތުންނާ ބައްދަލުކުރައްވައި، ކޮމިއުނިޓީ މީޓިންގްތައް ބާއްވަވަމުން ގެންދަވަ އެވެ. މި ހުރިހާ ހަރަކާތްތަކަކީ ރައީސް އޮފީހުގެ ހަރަދު އިތުރުވުމަށް މައިގަނޑު ސަބަބުތަކެއް ކަމަށް ބެލެވެ އެވެ.
ސަރުކާރުގެ އިދާރާތަކުން ބަޖެޓަށްވުރެ އިތުރަށް ހަރަދުކުރުމަކީ ފިސްކަލް ޑިސިޕްލިން ދަށްވުމުގެ ނިޝާނެއްގެ ގޮތުގައި ފާހަގަކުރެވެ އެވެ. ނަމަވެސް ރައީސް އޮފީހުން މި މައްސަލައާ ގުޅޭ ގޮތުން އަދި އެއްވެސް ވާހަކައެއް ދައްކާފައެއް ނުވެ އެވެ.
