ކަނޑު މަގުން ރާއްޖެ އެތެރެކުރަން އުޅުނު 10،800 ވޭޕް ކާޓްރިޖް ހުރި ބޮޑު ޝިޕްމަންޓެއް އަތުލައިގެންފި

ކަނޑު މަގުން ރާއްޖެ އެތެރެކުރަން އުޅުނު ބޮޑު ވޭޕް ޝިޕްމަންޓެއް ކަސްޓަމްސްއިން އަތުލައިގެންފި އެވެ.

ކަސްޓަމްސް އިން ބުނީ ކަނޑު މަގުން ރާއްޖެއަށް ގެނައި މުދާ ޝިޕްމެންޓެއްގައި ގާނޫނާ ގަވާއިދާ ޚިލާފް ތަކެތި ހުރެދާނެ ކަމަށް ކަސްޓަމްސް އަށް ފާހަގަކުރެވިގެން 2025 ޑިސެންބަރު 04 ވަނަ ދުވަހު ޚާއްސަ އޮޕަރޭޝަނެއް ހިންގައި އެ ޝިޕްމަންޓް ބަލާފާސް ކޮށްފައިވާ ކަމަށެވެ.

މި އޮޕަރޭޝަން ގައި ބަލާފާސްކުރެވުނު ޝިޕްމަންޓުގެ ތެރެއިން ގިނަ އަދަދެއްގެ ވޭޕް ފޮރުވާފައި ހުއްޓާ ފެނިފައިވާ ކަމަށް ކަސްޓަމްސް އިން ބުނެ އެވެ.

އެގޮތުން ޖުމްލަ 10800 ވޭޕް ކާޓްރިޖް ހޯދައި، ކަސްޓަމްސްގެ ބެލުމުގެ ދަށަށް ގެނެސްފައިވާ ކަމަށެވެ.

މީގެ އިތުރުން ކަސްޓަމްސް އިން ބުނީ، މި ވޭޕް ކާޓްރިޖް ގެ މަގުމަތީ އަގު 2.7 މިލިއަން ރުފިޔާއަށް އަރާނެ ކަމަށް ލަފާ ކުރެވޭ ކަމަށެވެ.

މިއީ ވޭޕާއި އިލެކްޓްރޯނިކް ސިނގިރޭޓް ރާއްޖެ އަށް އެތެރެ ކުރުން މަނާ ކުރުމަށް ސަރުކާރުން ނިންމި ތާރީހު ކަމަށްވާ 15 ނޮވެންބަރު 2024 ގެ ފަހުން ރާއްޖެއަށް އެތެރެ ކުރަން އުޅެނިކޮށް ކަސްޓަމްސް އިން ހިފަހައްޓާފައިވާ އެންމެ ބޮޑު ވޭޕް ޝިޕްމަންޓެވެ.

މި ތާރީޚުގެ ފަހުން ކަސްޓަމްސް އިން މިހާތަނަށް ޖުމްލަ 66000ށް ވުރެ ގިނަ ވޭޕް ހިފަހައްޓާފައިވެ އެވެ.

މި މައްސަލަ ކަސްޓަމްސްއިން ދަނީ އިތުރަށް ތަހުގީގު ކުރަމުންނެވެ.

މަސްތުވާތަކެއްޗާއި ވޭޕް ކުރަން ބޭނުންކުރާ އާލާތްތައް ފަދަ ރާއްޖެ އަށް އެތެރެކުރުން މަނާ ތަކެތި އެތެރެވުން ހުއްޓުވާ ދިވެހި މުޖުތަމައު އަކީ އަމާން ރައްކާތެރިތަނެއްގެ ގޮތުގައި ދެމެހެއްޓުމަށް ޚާއްސަ މަސައްކަތްތަކެއް ކުރަމުންދާ ކަމަށް ކަސްޓަމްސް އިން ބުނެ އެވެ.