20 އަހަރުން ދަށުގެ ސާފް ޗެމްޕިއަންޝިޕް މާޗު މަހު ރާއްޖޭގައި

ރާއްޖޭގައި ބޭއްވުމަށް ހަމަޖެހިފައިވާ 20 އަހަރުން ދަށުގެ ސާފް ޗެމްޕިއަންޝިޕް، އަންނަ މާޗު މަހުގެ ތެރޭގައި ފަށަން ނިންމައިފި އެވެ.

ދެކުނު އޭޝިއާގެ ޤައުމު ތަކުގެ މެދުގައި އޮންނަ، 20 އަހަރުން ދަށުގެ ސާފް ޗެމްޕިއަންޝިޕް ރާއްޖޭގައި ކުރިއަށް ދާނީ އަންނަ މާޗު މަހުގެ 23 ވަނަ ދުވަހުން ފެށިގެން، އޭޕްރީލް މަހުގެ ތިން ވަނަ ދުވަހުގެ ނިޔަލަށެވެ. 

މުބާރާތުގައި ހަތް ޤައުމު ބައިވެރިވެފައިވާއިރު، މުބާރާތް ކުރިއަށް ގެންދާނީ ހަތް ޤައުމު ދެ ގުރޫޕަކަށް ބަހާލައިގެންނެވެ. އެގޮތުން ގުރޫޕް އޭގައި ހިމެނެނީ ރާއްޖޭގެ އިތުރުން، ނޭޕާލް އާއި، ބޫޓާން އަދި ސްރީ ލަންކާ އެވެ. މީގެ އިތުރުން ގުރޫޕް ބީގައި ހިމެނެނީ ބަންގްލަދޭޝް އާއި، އިންޑިއާ އަދި ޕާކިސްތާން އެވެ. 

ގުރޫޕް ސްޓޭޖުގެ ކުޅުމަށް ފަހު، ކޮންމެ ގުރޫޕެއްގެ އެއް ވަނަ ޓީމާއި، ދެ ވަނަ ޓީމަށް ސެމީ ފައިނަލްގެ ޖާގަ ލިބޭނެ އެވެ. އެގޮތުން ފުރަތަމަ ސެމީ ފައިނަލްގައި ބައްދަލު ކުރާނީ ގުރޫޕް އޭގެ އެއް ވަނަ އާއި، ގުރޫޕް ބީގެ ދެ ވަނަ އެވެ. ދެ ވަނަ ސެމީ ފައިނަލްގައި ބައްދަލު ކުރާނީ، ގުރޫޕް ބީގެ އެއް ވަނަ އާއި، ގުރޫޕް އޭގެ ދެ ވަނަ އެވެ.

މުބާރާތުގައި ރާއްޖޭގެ ފުރަތަމަ މެޗުގައި ނިކުންނާނީ ލަންކާއާ ދެކޮޅަށެވެ. ދެ ވަނަ މެޗުގައި ބޫޓާންއާ ދެކޮޅަށް ކުޅުމަށް ފަހު، ތިން ވަނަ މެޗުގައި ނިކުންނާނީ ނޭޕާލްއާ ދެކޮޅަށެވެ.

20 އަހަރުން ދަށުގެ ސާފް ޗެމްޕިއަންޝިޕަށް ތައްޔާރުވުމުގެ ގޮތުން ރާއްޖެ އިން ވަނީ ސްކޮޑު އެކުލަވާލުމުގެ މަސައްކަތް ފަށައިފަ އެވެ. އެގޮތުން ޤައުމީ ޓީމަށް ކުޅުންތެރިން ނެގުމަށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަނީ ޚާއްސަ ޓްރަޔަލްއެއް ގެންދަން ފަށައިފަ އެވެ.