ލީބިޔާގެ ކުރީގެ ލީޑަރު މުއައްމަރުލް ގައްޒާފީގެ ދަރިކަލުން ސައިފުލް އިސްލާމް ގައްޒާފީގެ ގަޔަށް ބަޑި ޖަހާ އަވަހާރަކޮށްލައިފި

ލީބިޔާގެ ކުރީގެ ލީޑަރު މުއައްމަރުލް ގައްޒާފީގެ ދަރިކަލުން ސައިފުލް އިސްލާމް ގައްޒާފީ، ހަތަރު މީހެއްގެ ގުރޫޕަކުން ދިން ހަމަލާއެއްގައި އަވަހާރަކޮށްލާފައިވާ ކަމަށް ގައްޒާފީގެ އާއިލާއާ ގާތް ގުޅުމެއް އޮންނަ މަސްދަރަކުން އަންގާރަ ދުވަހު އަލް އަރަބިއްޔާ ނިއުސްއަށް މައުލޫމާތު ދީފި އެވެ.

އުމުރުން 53 އަހަރުގެ ސައިފުލް އިސްލާމް އަވަހާރަކޮށްލާފައި ވަނީ ލީބިޔާގެ ވެރިރަށް ޓްރިޕޮލީއާ 136 ކިލޯމީޓަރު (85 މޭލު) ދުރުގައި އޮންނަ ޒިންތާން ނަމަކަށް ކިޔާ ރަށެއްގަ އެވެ.

އާއިލީ މަސްދަރުން މައުލޫމާތު ދިން ގޮތުގައި، ހަމަލާދިން މީހުން ސައިފުލް އިސްލާމްގެ ގަޔަށް ބަޑިޖަހައި މަރާލާފައިވަނީ އެމަނިކުފާނު ދިރިއުޅުއްވާ ގޭގެ ބަގީޗާ ތެރޭގައެވެ. އަދި ހަމަލާ ދިނުމަށްފަހު އެ މީހުން އެ ސަރަހައްދުން ފިލާފައިވާ ކަމަށާއި، މި ހަމަލާގެ ޒިންމާ އުފުލަނީ ކޮން ބައެއްކަން އަދި ސާފުނުވާ ކަމަށްވެސް އެ މަސްދަރުން ބުނެފައިވެ އެވެ.

ލީބިޔާގެ ދައުލަތުގެ މީޑިއާ، ލާނާ އިން ވެސް ވަނީ ސައިފުލް އިސްލާމްގެ މަރުގެ ޚަބަރު ރިޕޯޓުކޮށްފަ އެވެ. އެ އެޖެންސީން މި ޚަބަރު ފެތުރީ ސައިފުލް އިސްލާމްގެ އެޑްވައިޒަރު އަބްދުﷲ އުޘްމާން އާ ހަވާލާދީ އެވެ.

ސައިފުލް އިސްލާމްގެ ސިޔާސީ ޓީމުގެ މަސްދަރުތަކުން އަލް އަރަބިއްޔާއަށް މައުލޫމާތު ދިން ގޮތުގައި، ހަތިޔާރު އެޅި ހަތަރު މީހަކު އެމަނިކުފާނު ދިރިއުޅުއްވާ ގެއަށް ވަދެގަތީ އެ ގޭގައި ހަރުކޮށްފައި ހުރި ސެކިއުރިޓީ ކެމެރާތައް މަސައްކަތް ނުކުރާ ގޮތް ހެދުމަށްފަހުގަ އެވެ.

ސައިފުލް އިސްލާމަކީ އޭނާގެ ބައްޕާފުޅު މުއައްމަރުލް ގައްޒާފީގެ ފަހުން ލީބިޔާގެ ވެރިކަމަށް ވަޑައިގަންނަވާނެ ބޭފުޅެއްގެ ގޮތުގައި ގިނަ ބަޔަކު ގަބޫލުކުރި ބޭފުޅެކެވެ. އެމަނިކުފާނު ވަނީ 2021 ވަނަ އަހަރު ބޭއްވުމަށް ހަމަޖެހުނު ރިޔާސީ އިންތިޚާބުގައި ވާދަކުރައްވާނެކަން އިއުލާނުކުރައްވާފަ އެވެ. ނަމަވެސް އެ އިންތިޚާބު ވަނީ ވަކި މުއްދަތެއް ނެތް ގޮތަށް ފަސްކޮށްފަ އެވެ.