ލިބިޔާގެ ގައްޒާފީ އަތުން ނާޖާއިޒް ގޮތުގައި އެތައް މިލިއަން ޑޮލަރު ހޯދި ކަމަށް ފްރާންސްގެ ކުރީގެ ރައީސް ސާކޯޒީ ގެ މައްޗަށް ކުށް ސާބިތުވެ 5 އަހަރުގެ ޖަލު ހުކުމެއް އިއްވައިފި
25 ސެޕްޓެމްބަރު 2025 | ބުރާސްފަތި 12:34ހުކުމް ކުރުމާ އެކު ކުރިއަށް ދެތިން ދުވަހުގެ ތެރޭގައި ސާކޯޒީ ޖަލަށް ގެންދެވޭނެއެވެ. އެއާއެކު އޭނާ ވެގެންދާނީ ޖަލުގައި ބަންދުގައި ބެހެއްޓޭ ފުރަތަމަ ފަރަންސޭސި ކުރީގެ ރައީސް ކަމުގައެވެ.
ކުރީގެ ފްރާންސްގެ ރައީސް ނިކޮލަސް ސާކޯޒީ، ލީބިޔާގެ އޭރުގެ ލީޑަރު ކާނަލް މުއައްމަރު އަލް ގައްޒާފީއާ އެކު 2007 ވަނަ އަހަރު.
ލިބިޔާގެ ކުރީގެ ލީޑަރ ކާނަލް މުއައްމަރުލް ގައްޒާފީގެ އަތުން އެތައް މިލިއަން ޔޫރޯގެ ނާޖާއިޒު ފައިސާ ހޯދި ކަމަށް ކުރީގެ ފަރަންސޭސި ރައީސް ނިކޮލަސް ސާކޯޒީ ގެ މައްޗަށް ކުށް ސާބިތު ވެއްޖެއެވެ.
އެއާއެކު އޭނާގެ މައްޗަށް ވަނީ 5 އަހަރުގެ ޖަލު ހުކުމެއް އިއްވާފައެވެ.
ސާކޯޒީ ވިދާޅުވީ މިއީ ސިޔާސީ ދައުވާއެއް ކަމުގައެވެ.
ޕެރިހުގެ ޖިނާއީ ކޯޓުން ބެލި މި މައްސަލައިގައި ސާކޯޒީ އަށް ތުހުމަތު ކުރެވުނީ 2007 ވަނަ އަހަރުގެ އިންތިޚާބުގެ ކެމްޕޭނަށް ގައްޒާފީގެ ފައިސާ ބޭނުންކުރި ކަމަށެވެ. އޭގެ ބަދަލުގައި، ޕްރޮސިކިއުޓަރުން ބުނާ ގޮތުގައި ސާކޯޒީ ވަނީ ގައްޒާފީ އަށް ހުޅަނގުގެ ގައުމުތަކުގެ ކުރިމަތީގައި އޭނާގެ ނަން ރީތި ކުރުމަށް އެހީތެރިވާނެ ކަމުގެ ހުވަފެން ދައްކާފައެވެ.
އުމުރުން 70 އަހަރުގެ ސާކޯޒީ ވަނީ 2007 އިން 2012 އަށް ފްރާންސްގެ ރައީސްކަން ކޮށްފައެވެ.
މި ތަޙްޤީޤު ފެށުނީ 2013 ގައެވެ. އެއީ އޭރުގެ ލިބިޔާގެ ލީޑަރުގެ ދަރިފުޅު ސައިފް އަލް-އިސްލާމް، ސާކޯޒީ ކެމްޕޭން ފައިސާގެ ގޮތުގައި އޭނާގެ ބައްޕަގެ އަތުން އެތައް މިލިއަން ހޯދި ކަމަށް ފުރަތަމަ ތުހުމަތު ކުރިތާ ދެ އަހަރު ފަހުންނެވެ. ޖެހިގެން އައި އަހަރު، ފްރާންސް އާއި މެދު އިރުމައްޗާ ދެމެދު ގިނަ ދުވަހު މެދުވެރިއެއްގެ ގޮތުގައި މަސައްކަތް ކުރި ލުބުނާނުގެ ވިޔަފާރިވެރިއެއް ކަމުގައިވާ ޒިޔާދު ތަކީއްދީން ބުނެފައިވަނީ ސާކޯޒީގެ ކެމްޕޭން އަށް "ބޮޑު އަދަދަކުން" ޓްރިޕޮލީން ފައިސާ ދިން ކަމުގެ ހެކި އޭނާގެ އަތުގައި ހުރި ކަމަށާއި، 50 މިލިއަން ޔޫރޯ (43 މިލިއަން ޕައުންޑް) އޭނާ ރައީސް ކަމަށް ހޮވުމަށްފަހު ވެސް ދީފައިވާ ކަމަށެވެ. އޭގެ އިތުރުން ސާކޯޒީގެ އަނބިކަނބަލުން، އިޓަލީ އަށް އުފަން ކުރީގެ ސުޕަރ މޮޑެލް އަދި ލަވަކިޔުންތެރިޔާ ކާލާ ބްރޫނީ-ސާކޯޒީ ގެ މައްޗަށް ވަނީ ފާއިތުވި އަހަރު ގައްޒާފީގެ މައްސަލައާ ގުޅޭ ހެކި ފޮރުވުމާއި އަދި މަކަރާއި ހީލަތް ހެދުމަށް ކުށްވެރިންނާ ގުޅުން ބޭއްވުމުގެ ދަޢުވާ އުފުލާފައެވެ. އެ ދެ ދަޢުވާ އަށް ވެސް އޭނާ ދަނީ އިންކާރު ކުރަމުންނެވެ.
ހުކުމް އިއްވި ފަނޑިޔާރު ވިދާޅުވީ، ސާކޯޒީ ވަނީ ފައިސާ ހޯދުމުގެ ނިޔަތުގައި ލީބިޔާގެ އޮފިޝަލުންނާއި އޭނާގެ އަރިސް ފަރާތްތަކާ އެކު ގާތް ގުޅުމެއް ބޭއްވުމަށް މަގު ތަނަވަސްކޮށްދީފައި ކަމުގައެވެ.
ހުކުމުގައިވާ ގޮތުން އޭނާ އިސްތިއުނާފަށް މައްސަލަ ހުށަހެޅި ނަމަވެސް ޖަލުގެ ހުކުމް ހިނގާނެއެވެ.
ޖަލު ހުކުމުގެ އިތުރުން 100،000 ޔޫރޯ އިން އޭނާ ވަނީ ޖުރިމަނާ ކޮށްފައެވެ.
ހުކުމް ކުރުމާ އެކު ކުރިއަށް ދެތިން ދުވަހުގެ ތެރޭގައި ސާކޯޒީ ޖަލަށް ގެންދެވޭނެއެވެ. އެއާއެކު އޭނާ ވެގެންދާނީ ޖަލުގައި ބަންދުގައި ބެހެއްޓޭ ފުރަތަމަ ފަރަންސޭސި ކުރީގެ ރައީސް ކަމުގައެވެ.
ހުކުމަށްފަހު ކޯޓުން ބޭރުގައި ނޫސްވެރިންނާ ވާހަކަ ދައްކަވަމުން އޭނާ ވިދާޅުވީ އޭނާ ކުށެއް ނުކުރައްވާ ކަމަށާއި، މައްސަލަ އިސްތިއުނާފަށް ހުށަހަޅުއްވާނެ ކަމުގައެވެ.
2012 ގައި އަލުން އިންތިޚާބުވުމަށް ކުރި މަސައްކަތް ނާކާމިޔާބު ވުމަށްފަހު، ސާކޯޒީ ވަނީ އެތައް ޖިނާއީ ތަޙްޤީޤުތަކެއްގެ އަމާޒަކަށް ވެފައެވެ. އޭނާ ވަނީ 2012 ގެ އަލުން އިންތިޚާބުވުމުގެ ކެމްޕޭންގައި ހުއްދަ ކުރެވިފައިވާ މިންވަރަށްވުރެ އިތުރަށް ޚަރަދު ކުރުމަށްފަހު، އެކަން ފޮރުވުމަށް ޕީއާރު ކުންފުންޏަކަށް އަގު ދީގެން އެކަން އޮޅުވާލަން މަސައްކަތް ކުރި ކަމުގެ ކުށް ސާބިތުވެ ފެބްރުއަރީ 2024 ގެ ޙުކުމު އިސްތިއުނާފު ކޮށްފައެވެ. މި ކުށް ސާބިތުވުމާއެކު އޭނާ އަށް އެއް އަހަރުގެ ޙުކުމެއް އިއްވާފައިވާއިރު، އޭގެ ތެރެއިން 6 މަސް ދުވަހަކީ ސަސްޕެންޑް ކުރެވިފައިވާ މުއްދަތެކެވެ.
2021 ގައި، އޭނާ ވަނީ 2014 ގައި ފަނޑިޔާރަކަށް ރިޝްވަތު ދޭން މަސައްކަތް ކުރި ކަމަށް ކުށްވެރިވެ، ބަންދު ޙުކުމެއް އިއްވުނު ފުރަތަމަ ފަރަންސޭސި ކުރީގެ ރައީސް ކަމުގައި ވެފައެވެ. ޑިސެމްބަރުގައި، ޕެރިހުގެ އިސްތިއުނާފު ކޯޓުން ނިންމީ އޭނާ ޖަލަށް ދިއުމުގެ ބަދަލުގައި ޓެގެއް އަޅުވައިގެން ގޭގައި މުއްދަތު ހޭދަކުރެވިދާނެ ކަމަށެވެ.
މަސްދަރު: ބީބީސީ
