ދަތުރުކުރެއްވި ޖެޓު ވެއްޓި ލީބިޔާ ސިފައިންގެ ވެރިޔާ އަވަހާރަ ވެއްޖެ

ލީބިޔާގެ ހަތިޔާރު އެޅި ފައުޖުތަކުގެ ވެރިޔާ ޗީފް އޮފް ސްޓާފް މުހައްމަދު ޢަލީ އަހްމަދު އަލް ހައްދާދު ދަތުރު ކުރެއްވި ޖެޓު ވެއްޓި އޭނާ އަވަހާރަ ވެއްޖެ އެވެ. އަންގާރާ ދުވަހުގެ މި ހާދިސާ ގައި، އެ ޖެޓުގައި އިތުރު ހަތަރު މީހުން ވެސް ތިބިކަމަށް ލީބިޔާގެ ބައިނަލްއަގުވާމީ ގޮތުން ގަބޫލުކުރެވިފައިވާ ސަރުކާރުގެ ބޮޑުވަޒީރު ވިދާޅުވެއްޖެއެވެ.

ޖެޓު ވެއްޓުނީ ތުރުކީގެ އަންކާރާ ސިޓީއަށް ކުރެއްވި ދަތުރަކަށް ފަހު އެނބުރި ގައުމަށް ދަތުރުކުރައްވަނިކޮށް ކަމަށް ލީބިޔާގެ ބޮޑުވަޒީރު ޢަބްދުލްހަމީދު ދުބައިބާ ގެ ބަޔާނެއްގައި ވިދާޅުވިއެވެ.

ތުރުކީގެ އޮފިޝަލުން ވަނީ ބުދަ ދުވަހުގެ ފަތިހު މި ޕްރައިވެޓް ޖެޓުގެ ވޮއިސް ރެކޯޑަރާއި ބްލެކް ބޮކްސް ހޯދާފަ އެވެ. 

ތުރުކީގެ ދާޚިލީ ވަޒީރު ޢަލީ ޔެރްލިކާޔާ ސޯޝަލް މީޑިއާ ޕްލެޓްފޯމް އެކްސްގައި ވިދާޅުވީ އެ ވައިގެ އުޅަނދު އަންކާރާ އިން ޓްރިޕޮލީ އަށް ދަތުރުކުރަމުން ދަނިކޮށް ބޯޓާ މުއާސަލާތް ކެނޑުނު ކަމަށެވެ. އެނާ ވިދާޅުވީ ކަމާ ބެހޭ އޮފިޝަލުން ބޯޓުގެ ބައިތައް ހޯދާފައިވާ ކަމަށެވެ.

ތުރުކީގެ އޮފިޝަލުން ބުނެފައިވާ ގޮތުގައި ފެލްކަން-50 މަރުކާގެ އެމަތިންދާބޯޓު ފުރިތާ ކުޑަ ވަގުތުކޮޅެއްގެ ތެރޭގައި ކުއްލިގޮތަކަށް ބިމަށް ޖެއްސުމަށް އެދިފައިވެއެވެ. ނަމަވެސް، އޭގެ ފަހުން މަތިންދާބޯޓާ ގުޅުން ވަނީ ކެނޑިފައެވެ. 

ތުރުކީގެ ދާޚިލީ ވަޒީރު އަލީ ޔަރލިކާޔާ، ހާދިސާ ހިނގި ސަރަޙައްދުގައި ނޫސްވެރިންނާ ވާހަކަ ދައްކަވަމުން ވިދާޅުވީ، އެމަތިންދާބޯޓުން ވޮއިސް ރެކޯޑަރާއި ފްލައިޓް ޑޭޓާ ރެކޯޑަރ (ބްލެކް ބޮކްސް) ވަނީ ހޯދިފައިވާ ކަމަށެވެ.

ޖެޓު ވެއްޓުނު ސަބަބު އަދި ސާފެއް ނުވެއެވެ.

ތުރުކީގެ ޑިފެންސް މިނިސްޓްރީން އަލް ހައްދާދުގެ ދަތުރު ކުރިން އިއުލާން ކޮށްފައިވާއިރު، އޭނާ ގެ ދަތުރުފުޅު ގައި ތުރުކީގެ ޑިފެންސް މިނިސްޓަރާއި ތުރުކީގެ ސިފައިންގެ ކޮމާންޑަރުންނާ ބައްދަލުކުރެއްވި ކަމަށް ބުނެފައިވެއެވެ.

މި ހާދިސާ ދިމާވީ ތުރުކީގެ ޕާލަމެންޓުން ލީބިޔާގައި ތިބި ތުރުކީ ސިފައިން އެ ގައުމުގައި އިތުރު ދެ އަހަރަށް ބޭތިއްބުމަށް ފާސް ކުރިތާ އެއް ދުވަސް ފަހުން ނެވެ.