ކުއްލިއަކަށް ޚިޔާލު ދޭން އެންގުމުން ދަތިވާ ކަމަށް ބުނެ އެމްޑީޕީ އިން ކޮމިޓީގައި ބައިވެރިއެއް ނުވި
ގާނޫނުއަސާސީއަށް ބޮޑެތި ބަދަލުތަކެއް ގެނައުމަށް ސަރުކާރުން ހުށަހަޅާފައިވާ ބިލާ ގުޅޭގޮތުން މަޝްވަރާކުރުމަށް ބޭއްވި ކޮމިޓީ ބައްދަލުވުން ދޫކޮށް އެމްޑީޕީ އިން ވަނީ ގޮސްފަ. އެ ޕާޓީ އިން ބުނީ އެއީ މިފަދަ މުހިއްމު ކަމެއްގައި ޕާޓީގެ އާންމު މެންބަރުންގެ ޚިޔާލު ހޯދުމަށް ފުރުސަތު ނުލިބޭ ގޮތަށް އަވަސްއަރުވާލައިގެން ކަންކަން ނިންމާތީ ކަމަށް. ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ހުށަހަޅާފައިވާ މި އިސްލާހާ މެދު އިދިކޮޅު ފަރާތްތަކުގެ ފާޑުކިޔުން އަމާޒުވެފައިވާއިރު، މިއީ ގައުމުގެ މުސްތަގުބަލާ ގުޅޭ ބޮޑު ނިންމުމެއް ކަމަށް އެ ޕާޓީން ދެކޭ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއިން، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް އިޞްލާޙު ގެނައުމުގެ ބިލާ ގުޅޭގޮތުން ސިޔާސީ ޕާޓީތަކުގެ ބޭފުޅުންނާ ބައްދަލުކުރުން | ރައްޔިތުންގެ މަޖިލިސް
ގާނޫނު އަސާސީ އަށް ބޮޑެތި އިސްލާހުތައް ގެންނަން އުޅެނީ އަވަސް އަރުވާލައިގެން ކަމަށާ ކުއްލިއަކަށް ޚިޔާލު ދޭން އެންގުމުން ދަތިވާތީ މިނިވަން މުއައްސަސާތަކުގެ ކޮމިޓީގައި ބައިވެރިވުމަށް އެމްޑީޕީ އިން ދެކޮޅުހަދައިފި އެވެ.
އާދިއްތަ ދުވަހު ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީ އިން ވަނީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީއަށް އިސްލާހު ގެނައުމުގެ ބިލާ ގުޅޭގޮތުން ސިޔާސީ ޕާޓީތަކާ ބައްދަލު ކޮށްފަ އެވެ. މި ބައްދަލުވުމުގައި ސަރުކާރު ހިންގާ ޕީއެންސީ އާއި، އިދިކޮޅު އެމްޑީޕީ، އަދާލަތު ޕާޓީ، ޕީއެންއެފް އަދި އެމްޑީއޭ ވެސް ބައިވެރިވެފައި ވެ އެވެ.
ކޮމިޓީ ބައްދަލުވުން ފެށުމާއެކު އެމްޑީޕީގެ ފަރާތުން އެ ކޮމިޓީގައި ވާހަކަދައްކަވަމުން ޕާޓީގެ ނައިބު ރައީސް ހިސާން ހުސައިން ވިދާޅުވީ ސަރުކާރުން މިފަދަ މުހިއްމު ކަންކަން ކުރަން އުޅެނީ އަބަދުވެސް އަވަސްއަރުވާލައިގެން ކަމަށާ އޭގެ ސަބަބުން ވަރަށް ދަތިވާ ކަމަށެވެ. ހިސާން ވިދާޅުވީ ގާނޫނު އަސާސީ އަށް މިފަދަ ބޮޑެތި ބަދަލުތައް ގެނައުމަކީ އެހާ އަވަސްއަރުވާލައިގެން ކުރަން ވާނެ ކަމެއް ނޫން ކަމަށް އެމްޑީޕީ އިން ދެކޭ ކަމަށެވެ.
ހިސާން ވިދާޅުވީ އެ ޕާޓީ އަކީ ލީޑަރު އެކަނި ވަކި ގޮތެއް ނިންމާ ޕާޓީއެއް ނޫން ކަމަށެވެ. އަދި އެމްޑީޕީ އަކީ ޕާޓީ ގެ އާންމު މެންބަރުންގެ ޚިޔާލާ މަޝްވަރާ ވެސް ހޯދައިގެން ކަންކަން ނިންމާ ޕާޓީއެއް ކަމުން ކުއްލިއަކަށް ޚިޔާލު ދިނުމަށް އެންގުމުން ދަތިވާ ކަމަށް ވެސް ހިސާން ވިދާޅުވި އެވެ. އެއަށް ފަހު ހިސާން ވަނީ ކޮމިޓީ ދޫކޮށް ދިއުމަށް މެންބަރުންގެ އިޒުނަ ހޯއްދަވާފަ އެވެ. އަދި ހިސާން އާއި އެ ޕާޓީގެ ފަރާތުން ދެން ކޮމިޓީގައި ބައިވެރިވެވަޑައިގެންނެވި ޕާޓީގެ ތަރުޖަމާނު އަނަސް އަބްދުއްސައްތާރު ކޮމިޓީ ދޫކުރައްވައި ވަޑައިގެންނެވި އެވެ.
މި ސަރުކާރުން އަވަސް އަރުވާލާއިގެން ބޮޑެތި ނިންމުންތައް ނިންމާ ގާނޫނު އަސާސީ ވެސް ބަދަލު ކުރަމުންދާ ކަމަށް އިދިކޮޅު ފަރާތްތަކުން ވަނީ މީގެ ކުރިން ވެސް ބުނެފަ އެވެ. އެގޮތުން ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށްޓަކައި ގާނޫނުއަސާސީ އަށް ހުށަހަޅާފައިވާ އިސްލާހުގެ ބިލު، މަޖިލީހުގެ ޗުއްޓީ މުއްދަތުގައި ދައުރުން ބޭރުން ޖެނުއަރީ 5 ވަނަ ދުވަހު ކުއްލި ގޮތަކަށް އެޖެންޑާކުރުމާ ގުޅިގެން، ބައެއް ފަރާތްތަކުން ވަނީ އެކަމަށް ބަހުސްކޮށް ފާޑުކިޔުންތައް އަމާޒުކޮށްފަ އެވެ.
ސަރުކާރުން ގާނޫނު އަސާސީ އަށް ހުށަހެޅި އިސްލާހުގައި ބުނެފައި ވަނީ ރައްޔިތުންގެ މަޖިލިހުގެ މެމްބަރު ކަމަށް މީހުން ހޮވުމަށް ބާއްވަން ޖެހޭ އިންތިޚާބު ބާއްވާނީ ގާނޫނު އަސާސީގެ 110 ވަނަ މާއްދާގެ ދަށުން ރައީސުލް ޖުމްހޫރިއްޔާ އަކު ހޮވުމަށް ބާއްވާ އިންތިޚާބާ އެކުގައި ކަަމަށެވެ. ހުށަހަޅާފައިވާ އިސްލާހުގައި ގާނޫނު އަސާސީގެ 79 ވަނަ މާއްދާ ގައި ބުނެފައިވަނީ ރައްޔިތުންގެ މަޖިލީހުގެ އުމުރަކީ ޑިސެމްބަރު މަހުގެ 1 ވަނަ ދުވަހުން ފެށިގެން ފަސް އަހަރު ދުވަސް ކަމަށެވެ.
79 ވަނަ މާއްދާ އަށް އިތުރު ކޮށްފައިވާ އަކުރުގައި ބުނެފައިވަނީ ހިނގަމުންދާ ރައްޔިތުންގެ މަޖިލީހުގެ އުމުރު ހަމަވެގެން މަޖިލިސް އުވުމާއެކު އަލުން އިންތިޚާބު ކުރާ ރައްޔިތުންގެ މަޖިލީހުގެ ފުރަތަމަ ޖަލްސާ ބާއްވާނީ ޑިސެމްބަރު މަހުގެ 1 ވަަނަ ދުވަހު ކަމަށެވެ.
