ވެރިމީހާގެ އަތްޕުޅަށް ބާރުތައް ގެނެސްގެން ރާއްޖެ ތަރައްގީ އެއް ނުކުރެވޭނެ، ގައުމުން ފެންނަނީ އެ މަންޒަރު: މެންބަރު ސަމީރު
މެންބަރު ސަމީރު ވިދާޅުވީ އެމްޑީޕީގެ ވެރިކަމުގައި ލާމަރުކަޒީ އުސޫލުން ބާރުތައް ރައްޔިތުންނަށް ދީގެން ތަރައްގީ ކުރިއަށް ދިޔަ ކަމަށް. މިސަރުކާރުން ބާރުތައް މަރުކަޒުކޮށް ރައްޔިތުންނަށް ދަތިކުރަމުންދާ ކަމަށާއި، ތަރައްގީ ހުއްޓިފައިވާ ކަމަށް އޭނާ ވިދާޅުވި.
ރާއްޖެޓީވީގެ ވައުދުނަމާ ޕްރޮގްރާމްގައި ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވާހަކަ ދައްކަވަނީ. | ރާއްޖެއެމްވީ
ވެރިމީހާގެ އަތްޕުޅަށް ބާރުތައް ގެނެސްގެން ދިވެހިރާއްޖެ ތަރައްގީ ނުކުރެވޭނެ ކަމަށް ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެ އެވެ.
ރާއްޖެޓީވީގެ ވައުދުނަމާ ޕްރޮގްރާމްގައި މެންބަރު ސަމީރު ވިދާޅުވީ، ރާއްޖޭގައި ވެރިކަން ކުރަމުންދަނީ ދެ ފިކުރަކުން ކަމަށާއި، އެ ދެ ފިކުރުގެ ތަފާތު މިހާރު ރައްޔިތުންނަށް ފެނިފައިވާ ކަމަށެވެ.
އެމްޑީޕީގެ ފުރަތަމަ ވެރިކަމަށް އައިރު ރާއްޖޭގައި ބަނދަރު ހަދާފައި އޮތީ ގާތްގަނޑަކަށް 6 ނުވަތަ 7 ރަށުގައިކަން ފާހަގަ ކުރައްވައި މެންބަރު ސަމީރު ވިދާޅުވީ ރައްޔިތުން ބޭނުންވާ ތަރައްގީ ގެނެސްދިނުމާއި، ބާރުވެރިކުރުމުގެ މަސައްކަތަށް ޚާއްސަ އިސްކަމެއްދީގެން ކުރި ކަމަށެވެ. ނަމަވެސް އެވެރިކަން ވައްޓާލުމާ ގުޅިގެން ހާލަތު ބަދަލު ވެގެންދިޔައީ ކަމަށް އޭނާ ވިދާޅުވި އެވެ. އޭގެފަހުން އެމްޑީޕީއަށް ވެރިކަން ލިބިގެން ދިޔައީ 2018 ވަނަ އަހަރު ކަމަށާއި، އޭރު ގާތްގަނޑަކަށް ބަނދަރު އެއްކޮށް ހަދާ ނިންމާފައި އޮތީ 37 ރަށުގައި ކަމަށެވެ.
މެންބަރު ސަމީރު ވިދާޅުވީ ރައީސް އިބްރާހިމް މުހައްމަދު ސޯލިހު ރާއްޖޭގެ ހުރިހާ ރައްޔިތުންނަށް އަސާސީ ޚިދުމަތްތައް ފޯރުކޮށް ދިނުމަށް ފެއްޓެވި ޚާއްސަ މަސައްކަތުގެ ދަށުން ގިނަ ރަށްރަށުގައި މިއަދު ސާފު ބޯފެނާއި، ފެނާއި ނަރުދަމާގެ ޚިދުމަތުގެ އިތުރުން ރައްކާތެރިކަމާއެކު ލަފާފުރޭނެ ގޮތް ހަމަޖެހިފައިވާ ކަމަށެވެ. އަދި އަތޮޅުގެ ތެރޭގެ ރަށްރަށުގެ ތަރައްގީ ބާރު ސްޕީޑްގައި ކުރިއަށް ދިޔަ ކަމަށް އޭނާ ވިދާޅުވި އެވެ.
މީގެ އިތުރުން މެންބަރު ސަމީރު ވިދާޅުވީ މިގޮތަށް މިމަސައްކަތް ކުރިއަށް ދިޔައީ އޭރުގެ ރައްޔިތުންގެ މަޖިލީހުން ވެސް މި މަސައްކަތްތައް ލާމަރުކަޒީ އުސޫލުން ކުރިއަށް ގެންދިއުމަށް ފުރިހަމަ އެއްބާރުލުން ދިނުމާއެކު، ގާނޫނުން އެބާރުވެރިކަން ކައުންސިލްތަކަށް ދީގެން ކަމަށެވެ. އެމްޑީޕީގެ ވިސްނުމަކީ މަރުކަޒު ކުރުން ނޫން ކަމަށް އޭނާ ވިދާޅުވި އެވެ.
ނަމަވެސް ވެރިކަން ބަދަލުވެގެން ދިއުމާއެކު މިސަރުކާރުން މިހާރު އަނެއްކާ ވެސް ބާރުތައް ހަނިކޮށް މަރުކަޒު ކުރުމުގެ މަސައްކަތް ކުރަމުންދާ ކަމަށް އޭނާ ވިދާޅުވި އެވެ. އަދި ވިދާޅުވީ ބާރުތައް ވެރި މީހާގެ އަތްޕުޅަށް ގެނެސްގެން މުޅި ރާއްޖެ ތަރައްގީ ނުކުރެވޭނެ ކަމަށެވެ.
އެހެންނަމަވެސް އަޅުގަނޑުމެން އޭރު ވެސް ވާނެ އެމްޑީޕީގެ އަސާސްތަކާ އަޅުގަނޑުމެން ގަބޫލުކުރާ ސިޔާސަތުތަކާއެކު ވެރިކަން ކޮށްފައި. އޭގެ ހެޔޮ ބަދަލު މުޅި ރާއްޖެއަށް ކުރަމުންދާތަން ފެންނާނެ. އަޅުގަނޑުމެން ބަލާލި ކޮންމެ ދިމާލަކުން އެބަ ފެނޭ. އަދި އަޅުގަނޑުމެން އެމްޑީޕީގެ މެންބަރުން، އެމްޑީޕީން ގަބޫލުކުރީ މިރާއްޖެ ތަރައްގީ ކުރުމަކީ އަޅުގަނޑުމެން އެންމެންގެ މައްޗަށް އޮތް ވާޖިބެކޭ. އެގޮތުން އެމްޑީޕީން ކަނޑައަޅާފައިވާ ސިޔާސަތުތައް ވަރަށް ސާފު ސީދާ ތެދުކޮށް ރައްޔިތުންގެ ލޯމައްޗަށް ފެންނާނެ. އަޅުގަނޑުމެން ވާނީ އެގޮތުން ރައްޔިތުންނަށް ރައްޔިތުންގެ ވެރިކަން ގާތުން ކުރުމަށްޓަކައި ރައްޔިތުން އިންތިޚާބު ކުރާ ކައުންސިލްތަކެއް އައްޔަން ކުރުމަށްޓަކައި އޭރުގައި މާލޭގައި ނޫނީ ވެރިމީހާގެ އަތުގައި ނޫނީ މުށުތެރޭގައި އޮތް ބާރު ރައްޔިތުންނަށް ދޫކޮށްލާފައިވާނީ. އެއީ އަޅުގަނޑުމެން އެނގިގެން ގަސްތުގައި ކުރި ކަމެއް. އަޅުގަނޑުމެން ގަބޫލުކުރާ ގޮތުގައި މިރާއްޖެ ގުދުރަތީ ގޮތުން އުފެދިފައި އޮތް ގޮތުން އަޅުގަނޑުމެންނަށް މިރާއްޖެ ބޭނުންވާ މިސްޕީޑްގައި ތަރައްގީއެއް ނުކުރެވޭ އެބާރުތައް ވެރިމީހާގެ މުށުތެރޭގައި ބަހައްޓައިގެން.ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު
މެންބަރު ސަމީރު ވިދާޅުވީ ރައީސް މުއިއްޒުގެ ސަރުކާރުގެ ތިން ވަނަ އަހަރު ގުނަމުންދާއިރު، ތަރައްގީ ހުއްޓި، ރައްޔިތުންނަށް ލިބެން ޖެހޭ ޚިދުމަތްތަކަށް ވަރަށް ބޮޑަށް ބުރޫ އަރާފައިވާ ކަމަށެވެ. މިއީ ބާރުތައް ހަނިކުރުމުގެ ނަތީޖާ ކަމަށާއި، މިސަރުކާރުން ބޭނުން ވަނީ ރައްޔިތުންނަށް ދަތިކޮށް ފިއްތާލަން ކަމަށެވެ.
އެހެންކަމުން ކުރިއަށް އޮތީ ކައުންސިލް އިންތިޚާބުގައި ރައްޔިތުންގެ ބާރު ސަރުކާރަށް ދައްކަން ޖެހޭ ކަމަށް މެންބަރު ސަމީރު ވިދާޅުވި އެވެ. އަދި ރައްޔިތުން ބޭނުންވާ ބާރާއި، ތަރައްގީ ގައުމަށް ގެނައުމަށް ކައުންސިލް އިންތިޚާބުގައި ސަރުކާރުގެ ހުރިހާ ކެންޑީޑޭޓުންނަށް ނުނޭކޭ ބުނުމަށް އޭނާ ވަނީ ގޮވާލާފަ އެވެ.
