ރިޔާސީ އިންތިހާބާ މަޖިލީސް އިންތިހާބު އެއްކޮށްލުމާ ގުޅޭގޮތުން ސިޔާސީ ޕާޓީތަކާއި ބައެއް އިދާރާތަކުގެ ހިޔާލު ހޯދަން މަޖިލީހުގެ ކޮމިޓީއަކުން ފާސްކޮށްފި
29 ޖެނުއަރީ 2026 | ބުރާސްފަތި 07:11ގާނޫނުއަސާސީއަށް ހުށަހެޅިފައިވާ އިސްލާހުގައިވަނީ ރައީސް ހޮވުމަށް ބާއްވާ އިންތިހާބާ އެކު މަޖިލިސް އިންތިހާބުވެސް ބާއްވަން ޖެހޭ ކަމަށް. މި ބަދަލު ފާސްވެއްޖެނަމަ 20 ވަނަ މަޖިލީހުގެ އުމުރު ހަމަވާނީ ޑިސެމްބަރު 1، 2028 އަށް ކަމަށާއި މިގޮތުން މަޖިލީހުގެ އުމުރުން 6 މަސް އުނިވާނެ. ގާނޫނުއަސާސީ އަށް މި ބަދަލު ގެނެވޭނީ ރައްޔިތުންގެ ފެންނަ ނުފެންނަ ވޯޓުން ފާސްވެގެން ކަމަށް ރައީސް މުއިއްޒު މީގެ ކުރިން ވަނީ ވިދާޅުވެފަ.
މިނިވަން މުއައްސަސާތަކުގެ ކޮމެޓީ މެންބަރުން | ރައްޔިތުންގެ މަޖިލިސް
ބޮޑު ދެ އިންތިހާބު ކަމަށްވާ ރިޔާސީ އިންތިހަބާއި މަޖިލީސް އިންތިހާބު އެއްކޮށްލުމާ ގުޅޭގޮތުން ސިޔާސީ ޕާޓީތަކާއި އިލެކްޝަން ކޮމިޝަން އަދި އެޓާނީ ޖެނެރަލް (އޭޖީ) އޮފީހުގެ ލަފާ ހޯދުމަށް ރައްޔިތުން މަޖިލީހުގެ މިނިވަން މުއައްސަސާތަކުގެ ކޮމެޓީ އިން ފާސްކޮށްފި އެވެ.
ބުރާސްފަތި ދުވަހު ބޭއްވި މިނިވަން މުއައްސަސާތަކުގެ ކޮމެޓިީ ބައްދަލުވުމުގައި ބާރަށު ދާއިރާގެ މެންބަރު އަދި ވެރިކަން ޕާތީ ޕީއެންސީ ޕީޖީ ނައިބު އިބްރާހިމް ސުޖާއު ހުށަހެޅުއްވީ ފެބުރުއަރީ 2 ވާ ހޯމަ ދުވަހު ސިޔާސީ ޕާޓީ ތަކާއި އިލެކްޝަން ކޮމިޝަން (އީސީ) އާއި އެޓާނީ ޖެނެރަލް (އޭޖީ) އޮފީހާއި ވަކިވަކިން ބައްދަލުކޮށް ލަފާ ހޯދުމަށެވެ.
ވެރިކަންކުރާ ޕީއެންސީގެ ޕީޖީ ލީޑަރު އިބްރާހިމް ފަލާހު ހުށަހަޅުއްވާފައިވާ އެ ބިލު ދިރާސާކުރާ މިނިވަން މުއައްސަސާތަކުގެ ކޮމިޓީން މިއަދު ބޭއްވި ކުރު ބައްދަލުވުމެއްގައި ސުޖާއު ގެ ހުށަހެޅުން ފާސްކޮށްފައިވާއިރު، ގާނޫނުއަސާސީ އަށް މި ބަދަލު ގެނެވޭނީ ރައްޔިތުންގެ ފެންނަ ނުފެންނަ ވޯޓުން ފާސްވެގެން ކަމަށް ރައީސް މުއިއްޒު މީގެ ކުރިން ވަނީ ވިދާޅުވެފަ އެވެ.
ގާނޫނު އަސާސީ އަށް ގެންނަ އިސްލާހުގައި ބުނެފައި ވަނީ ރައްޔިތުންގެ މަޖިލިހުގެ މެމްބަރު ކަމަށް މީހުން ހޮވުމަށް ބާއްވަން ޖެހޭ އިންތިޚާބު ބާއްވާނީ ގާނޫނު އަސާސީގެ 110 ވަނަ މާއްދާގެ ދަށުން ރައީސުލް ޖުމްހޫރިއްޔާ އަކު ހޮވުމަށް ބާއްވާ އިންތިޚާބާ އެކުގައި ކަަމަށެވެ.
މި ބަދަލު ފާސްވުމުން 20 ވަނަ މަޖިލީހުގެ އުމުރު ހަމަވާނީ ޑިސެމްބަރު 1، 2028، އަށެވެ. އޭގެ ނަތީޖާ އެއް ގެ ގޮތުން ހިނގަމުންދާ 20 ވަނަ މަޖިލިހުގެ އުމުރުން 6 މަސް ދުަވަސް އުނިވާނެ އެވެ.
ކުރިން އޮންނަ ގޮތުން ރައްޔިތުންގެ މަޖިލީހުގެ އުމުރަކީ މަޖިލިސް އިންތިޚާބު ކުރުަމަށްފަހު ފުރަތަމަ ޖަލްސާ ބާއްވާ ތާރީޚުން ފެށިގެން ފަސް އަހަރު ދުވަހެވެ. އެހެން ނަމަވެސް ހުށަހެޅިފައިވާ ބަދަލާ އެކު އުމުރު ބަލާނީ ޑިސެމްބަރު މަހުގެ 1 ވަނަ ދުވަހުން ފެށިގެން ފަސް އަހަރު ދުވަހެވެ.
