އެމްއޭސީއެލްއާއި ހަވާލުކުރީ 5 ތަރީގެ ރިސޯޓަކާއި ހޮޓެލް ސްކޫލެއް ތަރައްގީކުރަން
މަޝްރޫ އަށް ފައިސާ ހޯދާ ގޮތެއް ހާމަ ކޮށްފައެއް ނުވޭ
ހުޅިމެންދޫގައި ހޮޓެލް ސްކޫލަކާއި ރިސޯޓެއް ގާއިމުކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
އެއަރޕޯޓުގެ ކަންކަން ބެލެހެއްޓުމަށް އުފައްދާފައިވާ ކުންފުނި އެމްއޭސީއެލްއިން ލ. ހުޅިމެންދޫގައި 5 ތަރީގެ ރިސޯޓެއް ހަދަން ނިންމާ ރިސޯޓު ތަރައްގީ ކުރުމުގެ ތެރެއަށް ވަދެއްޖެއެވެ.
ހޮޓެލް ސްކޫލަކާއެކު، ފަތުރުވެރިކަމުގެ ދާއިރާއިން އެންމެ މަތީ ފަންތީގައި ޚިދުމަތް ދޭ 5 ތަރީގެ ރިސޯޓެއް، ލ. ހުޅިމެންދޫގައި ތަރައްޤީކުރުމުގެ އެއްބަސްވުމުގައި އެމްއޭސީއެލްއާއި ހަވާލުކޮށް ސޮއިކުރީ ގައުމީ ޔުނިވަރސިޓީ (އެމްއެންޔޫ) އިންނެވެ. ދިވެހިރާއްޖޭގެ ޤައުމީ ޔުނިވަރސިޓީގެ ފަރާތުން މި އެއްބަސްވުމުގައި ސޮއިކުރެއްވީ، ވައިސް ޗާންސެލަރ ޑޮކްޓަރ ރަޙީމާ ޢަބްދުއްރަޙީމެވެ. އަދި ރިސޯޓް ތަރައްޤީކޮށް އޮޕަރޭޓްކުރާ ފަރާތުގެ ހައިސިއްޔަތުން، މޯލްޑިވްސް އެއަރޕޯޓްސް ކޮމްޕެނީ ލިމިޓެޑުގެ ފަރާތުން އެއްބަސްވުމުގައި ސޮއިކުރެއްވީ، އެ ކުންފުނީގެ މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދެވެ.
އެންމެ ފުރަތަމަ މި އެއްބަސްވުން ވެފައިވަނީ މިދިޔަ އަހަރގެ ނޮވެމްބަރު މަހުގެ 9 ވަނަ ދުވަހުއެވެ. އެއިރު ލ. ހުޅިމެންދޫގައި 5 ތަރީގެ ރިސޯޓަކާއި ޓްރެއިނިން ސްކޫލެއް އަޅަން ޓޫރިޒަމް މިނިސްޓްރީން އެމްއެންޔޫއާ ހަވާލުކުރިއެވެ. އަދި މިހާތަނަށް އައި އިރު މި މަސައްކަތް ފަށާފައި ނުވެއެވެ.
މި އެއްބަސްވުމާއި ގުޅޭގޮތުން ރައީސް ޑރ. މުހައްމަދު މުއިއްޒު ވިދާޅުވީ ލ. ހުޅިމެންދޫގައި ތަރައްޤީކުރެއްވުމަކީ، ފަތުރުވެރިކަމުގެ ދާއިރާގައި މަސައްކަތްކުރާ، އަދި ކުރަން ބޭނުންވާ ފަރާތްތަކަށް، ވަކީން ޚާއްޞަކޮށް، ލ. މާމެންދޫގެ ޒުވާނުންނަށް ލިބޭ ވަރަށް ބޮޑު ފުރުޞަތެއްކަމަށް ޤަބޫލުކުރައްވާ ކަމުގައެވެ.
ރިސޯޓު ތަރައްގީ ކުރުމުގެ މަޝްރޫއުގައި ސޮއި ކުރި ނަމަވެސް މަޝްރޫ އަށް ފައިސާ ހޯދާ ގޮތެއް ހާމަ ކޮށްފައެއް ނުވެއެވެ. މި ފަހަކަށް އައިސް އެއްވެސް ކަހަލަ އުސޫލެއް ނެތި ސަރުކާރުން އަންނަނީ އެމްއޭސީއެލްއާއި އެ ކުންފުނީގެ މެންޑޭޓުގައި ނުހިމެނޭ ކަންކަން ހަވާލުކުރަމުންނެވެ. އެގޮތުން ސްޕޯޓްސް ކޮމްޕްލެކްސްތަކާއި އައުޓްޑޯ ޖިމް ހެދުން ފަދަ މަސައްކަތްތައް ވަނީ ހަވާލުކޮށްފައެވެ.
