ރައީސް ޞާލިހުގެ ސަރުކާރުން ހަނިމާދޫގައި ތަރައްގީކުރަން ފެށި އެއަރޕޯޓުގެ އައު ޓާމިނަލް ބޭނުންކުރަން ފަށައިފި
ހަނިމާދޫ އިންޓަނޭޝަނަލް އެއާޕޯޓުގެ ވަގުތީ އޮޕަރޭޝަންތައް އާ ޓާމިނަލްގެ ގްރައުންޑް ފްލޯއަށް ބަދަލުކޮށްފައިވޭ
ހަނިމާދޫ އިންޓަރނޭޝަނަލް އެއަރޕޯޓުގެ އައު ޕަސިންޖަރ ޓާމިނަލް އިން ހިދުމަތްދެނީ
ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން ހަނިމާދޫގައި ތަރައްގީކުރަން ފެށި އެއަރޕޯޓުގެ އައު ޕަސެންޖަރ ޓާރމިނަލް ބޭނުންކުރަން ފަށައިފިއެވެ.
ޒަމާނީ އައު ޓާރމިނަލްއަކާއި އައު ޑިޒައިނަކާއެކު ތަރައްގީކުރަން ފެށި މި އެއަރޕޯޓުގެ ޕަސެންޖަރ ޓާރމިނަލް ބޭނުންކުރަން ފެށީ ބުރާސްފަތި ދުވަހުން ފެށިގެންނެވެ. އެއަރޕޯޓް ބަލަހައްޓާ އެމްއޭސީއެލް އިން ބުނީ ހަނިމާދޫ އިންޓަނޭޝަނަލް އެއާޕޯޓުގެ ވަގުތީ އޮޕަރޭޝަންތައް އާ ޓާރމިނަލްގެ ގްރައުންޑް ފްލޯއަށް ބަދަލުކޮށްފައިވާ ކަމަށެވެ. އަދި މިއީ ހަނިމާދޫ އިންޓަނޭޝަނަލް ޕްރޮޖެކްޓް އަލުން ތަރައްގީކޮށް ކޯޑް ސީ މަތިންދާބޯޓުތަކަށް މަރުހަބާ ކިޔުމުގެ ތަސައްވުރު ހާސިލްކުރުމަށް އެޅި މުހިންމު ފިޔަވަޅެއް ކަމަށް ބުނެފައިވެއެވެ.
އެމްއޭސީއެލްއިން ބުނީ މި ބަދަލުގެ ސަބަބުން ރެސްޓްރިކްޓެޑް ޒޯންގެ ތެރޭގައި ހުރި ސްޓްރަކްޗަރތައް ރައްކާތެރިކަމާއެކު ތަޅާލުމުގެ ފުރުސަތު ލިބިގެންދާއިރު، އެމްސީއޭއޭގެ ސަލާމަތީ މިންގަނޑުތަކާ އެއްގޮތަށް ރަންވޭ ފުޅާކުރުމަށް މަގުފަހިވެގެންދާނެ ކަމަށެވެ.
އައު ޓާރމިނަލް ހުޅުވުމަށް ނިންމާފައިވަނީ ނޮވެމްބަރު މަހުގައެވެ. މި މަހުގެ ކުރީކޮޅު އައު ޓާރމިނަލް ބޭނުންކުރަން ފެށޭނެކަމަށް ކުރިން އެމްއޭސީއެލްއިން ބުނި ނަމަވެސް ޓާމިރނަލް ބޭނުންކުރަން ފެށުނީ މަސް ދެބައިވި ފަހުންނެވެ.
އިންޑިއާގެ ލައިން އޮފް ކްރެޑިޓެއްގެ ދަށުން ފައިނޭންސްކޮށް، އިންޑިއާގެ ކަލްޕަތަރު ޕްރޮޖެކްޓްސް އިން ކުރިއަށްގެންދާ ހަނިމާދޫ އެއަރޕޯޓުގެ ތަރައްޤީގެ މަޝްރޫޢަކީ ރާއްޖޭގައި މިހާތަނަށް ހިންގާފައިވާ އެންމެ ބޮޑެތި އެއަރޕޯޓު ތަރައްގީ ކުރުމުގެ މަޝްރޫޢުތަކުގެ ތެރެއިން މަޝްރޫއެކެވެ.
މި މަޝްރޫޢުގައި ހިމެނެނީ ބޮޑެތި މަތިންދާބޯޓުތައް ޖެއްސޭ ވަރުގެ 2.7 ކިލޯމީޓަރުގެ ރަންވޭއަކާއި، އަހަރަކު 1.3 މިލިއަން ފަސިންޖަރުންނަށް ޚިދުމަތް ދެވޭ ގޮތަށް ފަރުމާކުރެވިފައިވާ އައު ޓާރމިނަލަކާއި، އެއަރ ޓްރެފިކް ކޮންޓްރޯލް ޓަވަރަކާއި، ކާގޯ ފެސިލިޓީތަކަކާއި، ޒަމާނީ ފިއުލް ފާމެކެވެ.
136 މިލިއަން އެމެރިކާ ޑޮލަރު (ގާތްގަނޑަކަށް 2 ބިލިއަން ރުފިޔާ) ގެ އަގު ހުރި މި މަޝްރޫޢަކީ އިންޑިއާއިން ދިވެހިރާއްޖެ އަށް ދޫކޮށްފައިވާ 800 މިލިއަން ޑޮލަރުގެ އެގްޒިމް ބޭންކް ލައިން އޮފް ކްރެޑިޓްގެ ބައެކެވެ.
ދެ ފިޔަވައްސަކަށް ބަހާލައިގެން ކުރިއަށް ގެންދަން ޕްލޭން ކުރެވުނު މި މަޝްރޫއުގެ ފުރަތަމަ ފިޔަވަހި ނިމޭއިރު، އިރު، 2،400 މީޓަރުގެ ރަންވޭއަކާއި، 42،000 އަކަފޫޓުގެ އެޕްރަންއަކާއި، އަހަރަކު 1.3 މިލިއަން ފަސިންޖަރުންނަށް ޚިދުމަތްދެވޭ 10،500 އަކަފޫޓުގެ ޓާމިނަލްއަކާއި، 3،800 އަކަފޫޓުގެ އެއަރ ޓްރެފިކް ކޮންޓްރޯލް ޓަވަރެއް، އަދި އާމް އަދި ފިއުލް ޖެޓީ ފަދަ ޚާއްޞަ ވަސީލަތްތައް ތަރައްގީ ކުރެވޭނެއެވެ.
މި މަޝްރޫއު ނިމުމުން ބައިނަލްއަގުވާމީ ދަތުރުތަކުގައި ބޭނުންކުރާ އެއާބަސް A320 އާއި ބޮއިންގ 737 މަރުކާގެ ބޯޓުފަހަރަށް ހަނިމާދޫ އެއާޕޯޓުން ހިދުމަތް ދެވޭނެ އެވެ. އަދި މެދުއިރުމައްޗާއި ދެކުނު އޭޝިއާ އާއި ދެކުނު އިރުމަތީ އޭޝިއާ އަދި އިރުމަތީ އެފްރިކާގެ ގައުމުތަކުން ސީދާ ފްލައިޓްތައް ހަނިމާދޫ އަށް އޮޕަރޭޓް ކުރުމުގެ ގާބިލުކަން ވެސް ލިބޭނެއެވެ.
ޕްލޭނާ އެއްގޮތަށް މަސައްކަތް ކުރިއަށްދިޔަނަމަ ހަނިމާދޫ އެއަރޕޯޓް 2024 ވަނަ އަހަރު އެ މަޝްރޫއު ނިމި ހިދުމަތް ދެވެން ފެށޭނެއެވެ. ނަމަވެސް މި ސަރުކާރު ބަދަލުވެ މި ސަރުކާރުން އައު ތާރީހުތައް ކަނޑައަޅައި މި އަހަރުގެ މާޗް މަހަށް އެއަރޕޯޓުގެ މަސައްކަތް ނިމެނޭކަމަށް ކުރިން ބުނި ނަމަވެސް ސަރުކާރުގެ ދޯހަޅި ސިޔާސަޔަތުތަކާއި އިންޑިއާއައެކު އޮތް ގުޅުން ކުރިން ގޯސްވެފައި އޮތުމުން މި މަސައްކަތް ވަރަށް ބޮޑަށް ލަސްވެގެން ދިޔައެވެ.
ހަނިމާދޫ އެއަރޕޯޓަކީ ރައީސް މައުމޫން ޢަބްދުލްޤައްޔޫމްގެ ވެރިކަމުގައި ޑޮމެސްޓިކް ބޭނުންތަކަށް ތަރައްޤީކުރެވުނު އެއަރޕޯޓެކެވެ. އެއަރޕޯޓުގެ ޚިދުމަތް ފުރަތަަމަ ދޭން ފެށީ 1986 ވަނަ އަހަރުއެވެ. ނަމަވެސް 2012 ވަނަ އަހަރު މި އެއަރޕޯޓު އިންޓަރނޭޝަނަލް އެއަރޕޯޓެއްގެ ގޮތުގައި ކަނޑައެޅުނެވެ. އެހެންނަމަވެސް، އިންޓަރނޭޝަނަލް އޮޕަރޭޝަންތައް ހިނގަމުން އައީ ހަފްތާއަކު އެއްފަހަރު އިންޑިއާގެ ތިރުވަނަންތަޕޫރަމަށް ކުރާ ދަތުރަކަށް އެކަންޏެވެ. ޒަމާނީ ފެންވަރަށް ހަނިމާދޫގައި ތަރައްގީ ކުރާ އެއަރޕޯޓަކީ އުތުރުގައި މިހާތަނަަށް ތަރައްގީ ކުރާ އެންމެ ފުރިހަމަ އެއަރޕޯޓެވެ.
އެއަރޕޯޓް ހުޅުވުމުން ދެކުނު އޭޝިއާ އިންނާއި، ދެކުނު އިރުމަތީ އޭޝިއާ ގެ އިތުރުން މެދުއިރުމަތިން ސީދާ ފްލައިޓްތައް ދަތުރު ކުރާނެ ކަމަށް ކުރީ ސަރުކާރުން ވަނީ ހާމަ ކޮށްފައެވެ.
