އެމްޓީސީސީ އޮތީ މިހާރު ބަނގުރޫޓުވެފައި، ސަރުކާރުން ދަނީ އެކަން ފޮރުވަމުން: އަމްރު
17 އޮކްޓޯބަރު 2025 | ހުކުރު 06:46ސަރުކާރުން ބަޖެޓް ފާސްކޮށް ދީފައި އޮތް ނަމަވެސް މަސައްކަތްތައް އެ ބަޖެޓާއި އެއްގޮތަށް ނުހިނގާކަމަށް އަމްރު ވިދާޅުވި
އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އޮތީ މިހާރު ބަނގުރޫޓުވެފައި ކަމަށާއި މި ސަރުކާރުން ދަނީ އެކަން ފޮރުވަމުން ކަމަށް އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު ވިދާޅުވެއްޖެއެވެ.
އަމްރު އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
އެމްޓީސީސީގެ ކިބައިގައި ބިން ހިއްކުމުގެ ޤާބިލްކަން ނެތް ކަމަށް ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ. އަދި ބިން ހިއްކުމުގެ މަސައްކަތް އެއާޕޯޓްސް ކުންފުންޏާއި ހަވާލުކުރުމަށް ވަނީ ނިންމަވާފައެެވެ. ފަލަސުރުހީ ޕްރޮގްރާމްގައި ވާހަކަދައްކަވަމުން އަމްރު ވަނީ މި ސަރުކާރަށް ކުންފުނިތައް ރަނގަޅަށް ނުހިންގޭކަން ފާހަގަކުރައްވާ އެކަމަށް ވަރަށް ބޮޑަށް ފާޑު ވިދާޅުވެފައެވެ.
މީގެ އިތުރުން، ސަރުކާރަށް ކަންކަން ކުރުމަށް ބޭނުންވާ ބަޖެޓް ފާސްކޮށް ދީފައި އޮތް ނަމަވެސް އެ މަސައްކަތްތައް އެ ބަޖެޓާއި ގޮތަށް ނުހިނގާ ކަމަށް އަމްރު ވިދާޅުވިއެވެ. 50 ބިލިއަން ރުފިޔާގެ ބަޖެޓެއް ދީފައި އޮތް ނަމަވެސް އެއީ ވަކި ވަކި ޕްރޮޖެކްޓްތަކަށް އެލޮކޭޓް ކޮށްގެން ދީފައިވާ ބަޖެޓެއް ނޫން ކަމަށް އަމްރު ވިދާޅުވިއެވެ. އަމްރު ވިދާޅުވީ އެއީ ރައީސް ޑރ.މުހައްމަދު މުއިއްޒު ބޭނުން ގޮތަކަށް ހޭދަކުރަން މަޖިލީހުން ދީފައިވާ ބަޖެޓެއް ކަމަށް އޭނާ ވަނީ ވިދާޅުވެފައެވެ.
އެހެންނަމަ ވެސް އެމްޓީސީސީ ފަދަ މަޝްރޫޢުތައް ހިންގަން އޮތް ކުންފުނިތައް ވެސް ނުހިނގާ ކަން އަމްރު ވަނީ ފާހަގަކުރައްވާފައެވެ. ނަތީޖާ އަކީ އެމްޓީސީސީ އަށް ބިން ހިއްކަން ހަވާލުކުރުމުގެ ބަދަލުގައި އެއާޕޯޓްސް ކުންފުންޏަށް ބިން ހިއްކަން ހަވާލުކުރުމަކީ ހަމަޖެހޭ ކަމެއް ނޫން ކަމަށް އަމްރު ވިދާޅުވިއެވެ.
"ބައިވަރު އެއާޕޯޓްތައް ލޮސްގަ ހަދަން މި ހަވާލުކުރަނީ އެމްއޭސީއެލް އާއި. އަދި އެއާޕޯޓްތައް ލޮސްގައި އޮތް ތަންތަން ހަވާލުކޮށްފި އެ ކުންފުންޏާއި. ވީއައިއޭ ނޫން ހުރިހާ އެއާޕޯޓަކުން ވަނީ ގެއްލުން. އެތަންތަން އެއާޕޯޓްސް ކޮމްޕެނީ އާއި ހަވާލުކޮށްފި. މިކަހަލަ ލޮސްގަ ކުރަން ޖެހޭ ކަންކަން މި ވަނީ އެއާޕޯޓްސް ކޮމްޕެނީ އާއި ހަވާލުކޮށްފަ." އަމްރު ވިދާޅުވިއެވެ.
އެމްއޭސީއެލް އިން ބިން ހިއްކުމުގެ މަސައްކަތް ކުރުމަށް ބޭނުންވާ އުޅަނދުތައް ހޯދުމަށް ބޮޑެތި ޚަރަދުތަކެއް ހިނގާނެ ކަަމަށް އަމްރު ވިދާޅުވިއެވެ. އަދި އެ ކަމަށް ބޭނުންވާ ވަސީލަތްތައް ހޯދުމަށް އެމްއޭސީއެލް އިން ހޭދަ ކުރުމަކީ ރަނގަޅު ގޮތް ނޫން ކަމަށާއި އެކަމުގެ ގެއްލުން ލިބޭނީ އާއްމުންނަށް ކަމަށް އަމްރު ވިދާޅުވިއެވެ. އަދި ކުންފުނިތަކުގެ ހިންގުން ހަރުދަނާ ނޫން ކަމަށް ފާހަގަކުރައްވާ އެކަމަށް ވެސް އަމްރު ވަނީ ފާޑު ވިދާޅުވެފައެވެ. މިކަމުގެ ނަތީޖާ އަކަށް ވާނީ މުޅި ބަޖެޓަށް އޭގެ އަސަރުކޮށް އަސާސީ ކަންކަމަށް ހޭދަ ކުރަން އޮންނަ ބަޖެޓުން އެހެނިހެން ކަންކަން ކުރަން ޖެހުން ކަމަށް އަމްރު ވިދާޅުވިއެވެ.
