ށ. ބިލެތްފަހީގަައި އަޅަން ނިންމާފައިވާ އެއާޕޯޓުގެ ބިން ހިއްކުމުގެ މަސައްކަތް ދެވަނަ ފަހަރަށް ބަޔަކާ ހަވާލު ކޮށްފިއެވެ.

ހޯމަ ދުވަހު އެރަށުގައި އޮތް ރަސްމިއްޔާތެއްގައި މަސައްކަތް މި ފަހަރު ހަވާލު ކުރީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ އެވެ.

މުއިއްޒު ވިދާޅުވީ މަޝްރޫޢު އެމްއޭސީއެލް އާ ހަވާލު ކުރީ އެކުންފުނިން އިންވެސްޓް ކޮށްގެން، އެ ކުންފުނީގެ ޕްރޮޖެކްޓެއް ގޮތުގައި މި މަޝްރޫޢު ކުރިއަށް ގެންދާ ގޮތައް ކަމުގައެވެ. އަދި އެއަރޕޯޓު އަޅައި، އަދި ފަހުން ނިމުމަށްފަހު އޮޕަރޭޓް ކުރުން ވެސް އެ ކުންފުނިން ކުރިއަށް ގެންދާނެ ކަމަށެވެ.

ބިލެތްފައްސަށް މުއިއްޒު ރިޔާސީ އިންތިޚާބުގެ ކެމްޕޭނުގައި ވަޑައިގަތެވެ. އެ ގޮތުން 2023 ވަނަ އަހަރުގެ ސެޕްޓެމްބަރު މަހުހެ 17 ވަނަ ދުވަހު އެރަށަށް ވަޑައިގެން، އެއަރޕޯޓުގެ އެޅުމުގެ މުހިންމު ކަމުގެ ވާހަކަ އެރަށު ރައްޔިތުންނާ ބައްދަލު ކުރައްވާ ދެއްކެވި އެވެ.

މުޢިއްޒު އެ ދަތުރުފުޅުގައި ވިދާޅުވީ، އެމަނިކުފާނުގެ ސަރުކާރުގައި ކަންކަން ކުރައްވާނީ މިހާރުގެ ސަރުކާރާ ޚިލާފަށް މާ ހަރުދަނާ ގޮތެއްގައި، މާ އަވަސް ސްޕީޑެއްގައި ކަމަށެވެ.

އަދި އެމަނިކުފާނު އިންތިޚާބު ވެއްޖެނަމަ، މިހާރު އެ ރަށުގައި ކުރިއަށްދާ އެއަރޕޯޓު މަޝްރޫއު ހުއްޓާނުލާނެކަމުގެ ޔަޤީންކަންވެސް މުއިއްޒު ދެއްވިއެވެ.

މުއިއްޒު އެ ދަތުރުފުޅުގައި ބިލެތްފައްސަށް ވަޑައިގެންނެވި އިރު، އެރަށުގައި އެއަރޕޯޓު އެޅުމަށް ބިން ހިއްކުމަށް ބަޔަކަށް މަސައްކަތް އޮތީ ރައީސް ސާލިހް ސަރުކާރުން ހަވާލު ކޮށްފައެވެ.

2023 ވަނަ އަހަރުގެ ޖުލައި މަހުގެ 12 ވަނަ ދުވަހު ބިލެތްފަހި ފަޅުގައި އެއަރޕޯޓެއް އެޅުމަށް 56.34 ހެކްޓަރުގެ ބިން ހިއްކުމުގެ މަސައްކަތް ކުރީ ސަރުކާރުގެ ޕްލޭނިންގ މިނިސްޓްރީ އިން ހަވާލު ކުރީ ކެޕިޓަލް މެރިން އެންޑް ކޮންސްޓްރަކްޝަން ޕްރައިވެޓް ލިމިޓެޑް އާއެވެ.

ކުރިން ބިލެތްފަހީގައި ބިންހިއްކަން ހަވާލު ކުރި މަސައްކަތް ހުއްޓާ ނުލާނެ ކަމަށް މުއިއްޒު ވިދާޅުވެފައި އޮތް ނަމަވެސް ދެވަނަ ފަހަރަށް ބިން ހިއްކުމުގެ މަސައްކަތް ބަޔަކާ ހަވާލު ކުރި އިރު، ކުރިން މި މަސައްކަތް ހަވާލު ކުރި ކޮންޓްރެކްޓަށް ވީ ގޮތެއް ސާފެއް ނުވެއެވެ. ހަމަ އެކަނި ވިދާޅުވި އެއްޗަކީ އެކި ސަބަބުތަކާ ހުރެ އެކަން އޮތީ ނުވެފައި ކަމުގައެވެ.

"ކުރިންވެސް ތިޔަބޭފުޅުންނަށް، ރަށުގެ ރައްޔިތުންނަށް މިކަމުގައި އެކިކަހަލަ ވަޢުދުތައް، ނޫނީވިއްޔާ ކަންތައްތައް ކުރުމުގެ އެކިކަހަލަ މަސައްކަތްތަކެއް ކުރެވިފައި އެބަހުރިކަން އަޅުގަނޑަށް އެނގޭ. އެހެން ނަމަވެސް، މިއަދާ ހަމައަށް އައިއިރުގައި، އެކި ސަބަބުތަކާ ހެދި މިކަންކަމެއް ނެތް، މި މަޝްރޫޢު ކުރިއަށް ގެންދިޔުމުގައި ކާމިޔާބު ކުރެވިފައެއް."

މިފަހަރު ބިންހިއްކުން ހަވާލު ކުރެއްވި އެމްއޭސީއެލް އަކީ މީގެ ކުރިން ދުވަހަކު ވެސް ބިންހިއްކުމުގެ މަޝްރޫއެއް ހިންގާފައި ނުވާ ކުންފުންޏެއް ކަން ފާހަގަ ކުރެވެއެވެ. އެމްއޭސީއެލް އަކީ އިންވެސްޓްމަންޓް ކުންފުންޏަކަށް ނުވާއިރު، ބިން ހިއްކުމާ އެއަރޕޯޓް ތަރައްގީ ކުރުމަށް އެ ކުންފުނިން ފައިސާ ހޯދާ ގޮތެއް ހާމަ ކޮށްފައެއް ނުވެއެވެ. އަދި އެކަމަށް ހޭދަވަނީ ކިހާ ވަރެއް ކަމެއް ވެސް ހާމަ ކޮށްފައެއް ނުވެއެވެ.

މިފަހަރު ވެސް މުއިއްޒު ވިދާޅުވީ، "ރަށުގެ އެއަރޕޯޓު ޤާއިމުކުރުމުގެ މަސައްކަތް، އެއްވެސް މަޑުޖެހުމެއްނެތި، ވަރަށް ފުރިހަމަ ކަމާ އެކީގައި ކުރިއަށް ގެންގޮސް، ނިންމައިދޭނެ ...ޔަޤީންކަން ރަށުގެ ލޮބުވެތި ރައްޔިތުންނަށް." އަރުވާ ކަމުގައެވެ.

ކުރީ ސަރުކާރުން އެއަރޕޯޓު އެޅުމަށް ހިއްކަން ނިންމާފައި ވަނީ 56.34 ހެކްޓަރު ކަމަށް ވީ ނަމަވެސް އެމްއޭސީއެލް އާ މުއިއްޒު ސަރުކާރުން ހަވާލު ކުރިީ ގާތްގަނޑަކަށް 36 ހެކްޓަރުގެ ބިން ހިއްކާށެވެ.

މުއިއްޒު ވިދާޅުވީ، ބިން ހިއްކުމުގެ މަސައްކަތް މިއަދުން ފެށިގެން، ގިނަވެގެން 8 މަސް ދުވަހުގެ ތެރޭގައި ނިމިގެންދާ ތަން، ރަށުގެ ރައްޔިތުންނަށް ފެންނާނެ ކަމަށާއި އެއްވެސް ކަހަލަ މަޑުޖެހުމެއް، ލަސްވުމެއް ނާންނާނެ ކަމުގައެވެ.

"މިއީ ވަރަށް ސާފުކޮށް އަޅުގަނޑު ދަންނަވާ ވާހަކައެއް. މި ދެންނެވިހެން މިކަން ދާނެ. އަދި އެއާއެކީގައި، އެއަރޕޯޓުގެ ތަރައްޤީގެ މަސައްކަތް، އެ ހުރިހާ މަސައްކަތެއް، ރަންވޭ އާއި، ދެން ހުރިހާ ކަމެއް ހިމެނޭހެން، ފުލް ޕްރޮޖެކްޓް، މުޅި މަޝްރޫޢު މިއަދުން ފެށިގެން، ގިނަވެގެން ދެ އަހަރާއި ބައި، 30 މަސް ދުވަހުގެ ތެރޭގައި ނިންމައި، އެއަރޕޯޓު ހުޅުވާނަން. ގިނަވެގެން 30 މަސް." މުއިއްޒު ވިދާޅުވިއެވެ.