މެކްރޯންގެ އައިނަށް ދުނިޔޭގެ ސަމާލުކަން، ފަރަންސޭސި ކުންފުންޏަށް ބޮޑު ކުރިއެރުމެއް

ސްވިޒަލޭންޑުގެ ޑާވޯސްގައި ބޭއްވި ވޯލްޑް އިކޮނޮމިކް ފޯރަމްގައި ފަރަންސޭސި ރައީސް އެމަނުއަލް މެކްރޯން، އެމެރިކާގެ ރައީސް ޑޮނަލްޑް ޓްރަމްޕާ ބައްދަލުކުރެއްވި އިރު އަޅުއްވައިގެން ހުންނެވި އޭވިއޭޓާ އަވިއައިނަށް ދުނިޔޭގެ ސަމާލުކަން ވަނީ ވަރަށް ބޮޑަށް ހުއްޓިފައެވެ.

ފަރަންސޭސިވިލާތުގައި މި އައިނު އުފައްދާ ކުންފުނީގެ އިޓަލީގެ ވެރިޔާ ހާމަކުރި ގޮތުގައި، މި ހާދިސާއާ ގުޅިގެން އެ ކުންފުނީގެ އައިނު ވިކޭ މިންވަރު ވަނީ އާދަޔާ ހިލާފަށް އިތުރުވެފައެވެ.

މި އައިނަށް ބޮޑު މަގުބޫލުކަމެއް ލިބިފައިވީ ނަމަވެސް، އައިނު އުފައްދާ "ހެންރީ ޖޫލިއަން" ކުންފުނިން ދިޔައީ ފަރަންސޭސިވިލާތުގެ އިރުމަތީ ޖޫރާ ސަރަހައްދުގައި 1700 ގެ އަހަރުތަކުގެ ފަހުކޮޅުން ފެށިގެން ކުރިއަރަމުން އައި އައިނު އުފެއްދުމުގެ ސިނާއަތް ހީނަރުވަމުން ދިއުމުގެ ސަބަބުން ގޮންޖެހުންތަކާ ކުރިމަތިލަމުންނެވެ. ވަކިން ހާއްސަކޮށް އޭޝިއާގެ ގައުމުތަކުން އަގުހެޔޮކޮށް އައިނު އުފައްދައި ބާޒާރަށް ނެރުމަކީ އެ ކުންފުންޏަށް ކުރިމަތިވި ބޮޑު ގޮންޖެހުމެކެވެ.

"ޓޮޕް ގަން" ސްޓައިލަށް ފަރުމާކޮށްފައިވާ، ނޫކުލައިގެ ބިއްލޫރި އާއި ރިހިކުލައިގެ ފްރޭމެއް ހިމެނޭ މި އައިނުގެ އަގަކީ 659 ޔޫރޯ (784 ޑޮލަރު) އެވެ. މިހާރު މި އައިނު ވަނީ ފަރަންސޭސި ރިޔާސީ އޮންލައިން ސްޓޯރުގައި ވެސް ހިމަނާފަ އެވެ.

ވޯލްޑް އިކޮނޮމިކް ފޯރަމަށް ފަހު، ދުނިޔޭގެ އެކި ކަންކޮޅުތަކުން ގުޅައި އައިނަށް އޯޑަރު ދެމުންދާ ކަމަށާއި، މީގެ ސަބަބުން ކުންފުންޏަށް ބޮޑު އިޝްތިހާރެއް ލިބިފައިވާ ކަމަށް "ހެންރީ ޖޫލިއަން" ކުންފުނީގެ މައި ކުންފުނި ކަމަށްވާ އިޓަލީގެ "އައިވިޝަން ޓެކް" ގެ ސީއީއޯ ހާމަކޮށްފައިވެ އެވެ.

ފަރަންސޭސިވިލާތުގެ ރައީސް އިމަނުއެލް މެކްރޮން، އެ ގައުމުގެ މަޝްހޫރު ބްރޭންޑެއް ކަމަށްވާ "ހެންރީ ޖޫލިއަން" ގެ އަވިއައިނު އަޅުއްވައިގެން އެލީޒޭ ރިޔާސީ ގަނޑުވަރުގައި ހުންނަވަނިކޮށް ނަގާފައިވާ ފޮޓޯ އެއް.

އާންމުކޮށް އަހަރަކު އެންމެ 1،000 އައިނު އުފައްދާ މި ކުންފުނިން މިހާރު ވަނީ އޮންލައިންކޮށް 500 އަށްވުރެ ގިނަ އައިނު ވިއްކާފަ އެވެ. މިއީ ޖޫރާ ގައި އުފައްދާ "އޭވިއޭޓާ ޕެސިފިކް އެސް01" މޮޑެލްގެ އަހަރަކު އުފައްދާ 200 އައިނާ އަޅާބަލާއިރު ވަރަށް ބޮޑު ކުރިއެރުމެކެވެ.

އައިނު ކުންފުނިން ބުނި ގޮތުގައި، ވެބްސައިޓަށް ވަންނަ މީހުން ގިނަވެ ސައިޓް ހުއްޓުމަކަށް އައުމާ ގުޅިގެން، ރައީސް މެކްރޯން ބޭނުންކުރެއްވި މޮޑެލްއަށް ހާއްސަ ވަގުތީ ޕޭޖެއް މިހާރު ވަނީ ހަދާފަ އެވެ. އަދި މަދު ދުވަސްކޮޅެއްގެ ތެރޭގައި "އައިވިޝަން ޓެކް" ކުންފުނީގެ ހިއްސާގެ އަގު ވަނީ 70 އިންސައްތައަށް އުފުލިފަ އެވެ.

ރައީސް މެކްރޯން މި އައިނަށް އޯޑަރު ދެއްވީ 2024 ވަނަ އަހަރު ޖީ20 ސަމިޓުގެ ތެރެއިން ވަޒީރަކަށް ހަދިޔާ އަކަށް ދެއްވުމަށާއި އަމިއްލަފުޅަށް ބޭނުންކުރެއްވުމަށް ކަމަށް ކުންފުނިން ބުނެފައިވެ އެވެ.

ރަނުގެ ނަރު ބޭނުންކޮށްގެން އުފައްދާ މި އޭވިއޭޓާ އައިނަކީ ހަތަރު މަސް ދުވަހުގެ ތެރޭގައި 279 މަރުހަލާއެއް ކަޑައްތުކޮށްގެން ވަރަށް ފަރުވާތެރިކަމާއެކު އުފައްދާ އައިނެކެވެ.

"ހެންރީ ޖޫލިއަން" ކުންފުނީގައި ދިގު މުއްދަތަކަށް މަސައްކަތް ކޮށްފައިވާ އުމުރުން 60 އަހަރުގެ ހާވޭ ބަސެޓް ބުނި ގޮތުގައި، ރައީސް މެކްރޯންއަށް ތައްޔާރުކުރި ދެ އައިނު އުފެއްދުމުގައި ވަރަށް ހާއްސަ ސަމާލުކަމެއް ދީފައިވާނެ އެވެ.

މި އައިނު އުފެއްދުމުގައި ބައިވެރިވި ހުރިހާ މުވައްޒަފުންނަށް ރައީސް މެކްރޯންގެ ފަރާތްޕުޅުން ޝުކުރުގެ ސިޓީ އެއް ފޮނުއްވި އެވެ.