މެދުއިރުމަތީގައި އެމެރިކާގެ އަސްކަރީ ބާރުތައް ވަރަށް ބޮޑަށް ވަރުގަދަކޮށްފައިވީ ނަމަވެސް، އީރާނާ މެދު ގެންގުޅޭ ސިޔާސަތުގެ "ނިމުން އޮންނާނެ ގޮތެއް" ނޭނގޭ: އޮފިޝަލް

މެދުއިރުމަތީގައި އެމެރިކާގެ އަސްކަރީ ބާރުތައް ވަރަށް ބޮޑަށް ވަރުގަދަކޮށްފައިވީ ނަމަވެސް، އީރާނާ މެދު ގެންގުޅޭ ސިޔާސަތުގެ "ނިމުން އޮންނާނެ ގޮތެއް" ޑޮނަލްޑް ޓްރަމްޕްގެ ސަރުކާރަށް އަދި ނިންމިފައި ނުވާ ކަމަށް އޮފިޝަލުން ވިދާޅުވެއްޖެ އެވެ.

އޮފިޝަލުން ވިދާޅުވި ގޮތުގައި، މިކަމާ ގުޅޭ އެތެރޭގެ މަޝްވަރާތައް ކުރިއަށްދިޔަ ނަމަވެސް، ސިޔާސަތު ކަނޑައަޅާ ފަރާތްތަކަށް އަދި ސާފު ލަނޑުދަނޑިތަކަކާ ހަމައަށް އާދެވިފައެއް ނުވެ އެވެ. މީގެ ނަތީޖާއެއްގެ ގޮތުން، ސަރުކާރުން ދަނީ އެކި ގޮތްގޮތަށް މިކަމުގައި އަމަލުކުރެވިދާނެ ގޮތްތައް ބަލަމުންނެވެ. ނަމަވެސް، ވަގުތުން ވަގުތަށް އެއްވެސް ފިޔަވަޅެއް އަޅާފާނެ ކަމަކަށް އަދި ނުބެލެވެ އެވެ.

އަނެއްކޮޅުން އޮފިޝަލުން އިތުރަށް ވިދާޅުވި ގޮތުގައި، އެމެރިކާގެ ރައީސް ޑޮނަލްޑް ޓްރަމްޕް ކުރު މުއްދަތެއްގެ ތެރޭގައި ކޮންމެ ވަގުތަކުވެސް މިކަމުގައި ގޮތެއް ނިންމަވައިފާނެ އެވެ.

މި މަހުގެ ކުރީކޮޅު ދެއްވި އިންޓަވިއުއެއްގައި ޓްރަމްޕް ވަނީ އީރާނުގެ އެންމެ މަތީ ލީޑަރަކީ "ބަލި މީހެެއް" ކަމަށް ސިފަކުރައްވައި، އެ ގައުމަށް އާ ލީޑަރަކު ހޯދަންވީ ވަގުތު ޖެހިއްޖެ ކަމަށް ވިދާޅުވެފަ އެވެ.

އޮފިޝަލުން މައުލޫމާތު ދެއްވާ ގޮތުގައި، މަތިންދާބޯޓު އުފުލާ މަނަވަރުތަކުގެ ގްރޫޕެއް އަނެއްކާވެސް އެ ސަރަހައްދަށް ފޮނުވާފައިވާއިރު، މީގެ އިތުރުން ވައިގެ ދިފާއީ ނިޒާމުތަކާއި ފައިޓަރު ޖެޓް ފަދަ އަސްކަރީ ވަސީލަތްތައް ވެސް ވަނީ އެ ސަރަހައްދުގައި ރުކުރުވާލާފަ އެވެ.

އީރާނުގެ ދޮރުމައްޗަށް އެމެރިކާގެ އަސްކަރީ ބާރުތައް މިގޮތަށް ޖަމާކުރުމަކީ، އީރާނުގެ ސަރުކާރަށް ޕްރެޝަރު ކުރުމަށް ޓްރަމްޕް ގެންގުޅުއްވާ ސިޔާސަތުގެ ބައެއް ނަމަވެސް، ސަރަހައްދީ ނުތަނަވަސްކަން ބޮޑުވާ ކޮންމެ ދަނޑިވަޅެއްގައި ވެސް މިފަދަ ފިޔަވަޅުތަކަކީ އާންމުކޮށް އަޅާ ފިޔަވަޅުތަކެއް ކަމަށް އެމެރިކާގެ އޮފިޝަލުން ފާހަގަކުރެއްވި އެވެ.

އެ ސަރަހައްދުގެ އެކި ހިސާބުތަކުގައި އެމެރިކާގެ ގާތްގަނޑަކަށް 30،000 ސިފައިން އަބަދުވެސް ތިބޭކަން ފާހަގަކުރައްވައި، ކުރިމަތިވެދާނެ ކޮންމެ ހަމަލާއަކުން އެ ސިފައިން ރައްކާތެރިކުރުމުގެ މުހިންމުކަމަށް އޮފިޝަލުން ވިދާޅުވި އެވެ.

ސިފައިންގެ ރައްކާތެރިކަމުގެ އިތުރުން، އަސްކަރީ ބާރުތައް ވަރުގަދަކުރުމުގެ އަނެއް މަގްސަދަކީ އެ ސަރަހައްދުގައި ތިބި އެމެރިކާގެ ބައިވެރިންނަށް ޔަގީންކަން ދިނުމާއި، މެދުއިރުމަތީގެ ސަލާމަތާއި ހަމަޖެހުން ގާއިމުކުރުމަށް ކުރާ މަސައްކަތްތައް އިތުރަށް ވަރުގަދަކުރުމެވެ.

މީގެ ކުރިން ވެސް އީރާނަށް ހަމަލާދިނުމުގެ އެއްވެސް ނިޔަތެއް ނެތި، އެމެރިކާގެ މަތިންދާބޯޓު އުފުލާ މަނަވަރުތައް އެ ސަރަހައްދަށް ފޮނުވާފައިވާކަން އޮފިޝަލުން ފާހަގަކުރެއްވި އެވެ.

އެހެންނަމަވެސް، މިދިޔަ ހޫނު މޫސުމުގައި އީރާނުގެ ބިމުގައި ހުރި އެ ގައުމުގެ ނިއުކްލިއާ ޕްރޮގްރާމަށް ސީދާ ހަމަލާދިނުމަށް ޓްރަމްޕްގެ ސަރުކާރުން ނިންމި ނިންމުމަށްފަހު، މިހާރުގެ ހާލަތު ކުރީގެ ހާލަތްތަކާ ތަފާތުކަމަށް އޮފިޝަލުން އެއްބަސްވެވަޑައިގަންނަވަ އެވެ.

މީގެ އިތުރުން، ހަނގުރާމައިގެ މައިދާނުގައި ވައިގެ ބާރު ބޭނުންކުރުމާއި، އެ ބާރު ދެމެހެއްޓުމުގެ ގާބިލުކަން ދައްކާލުމަށްޓަކައި، މެދުއިރުމަތީގައި ގިނަ ދުވަސްތަކަކަށް ދެމިގެންދާ ތައްޔާރީ ފަރިތަކުރުންތަކެއް ފަށާނެކަން އެމެރިކާގެ އެއާ ފޯސްއިން މިދިޔަ ހަފުތާ ބަންދުގައި ވަނީ އިއުލާންކޮށްފަ އެވެ.

އެމެރިކާގެ އެއާ ފޯސް ސެންޓްރަލް (އޭ.އެފް.ސީ.އީ.އެން.ޓީ) އިން ނެރުނު ބަޔާނެއްގައި ބުނެފައިވަނީ، މި ފަރިތަކުރުންތަކުގެ ސަބަބުން އިދިކޮޅު ފަރާތްތަކުގެ ހަމަލާތައް ހުއްޓުވުމަށާއި، ހިސާބުތައް ނުބައިވުމުގެ ފުރުސަތު ކުޑަކުރުމަށާއި، ބައިވެރިންނަށް އިތުބާރު ދިނުމަށް މަގުފަހިވާނެ ކަމަށެވެ. އަދި މިއީ ވަރުގަދަ އަސްކަރީ ބާރެއް ދައްކައިގެން ސުލްހަ ގާއިމުކުރުމަށް ކުރެވޭ މަސައްކަތެއް ކަމަށް ވެސް ބުނެފައިވެ އެވެ.

މި އަހަރު އީރާނުގެ ސަރުކާރާ ދެކޮޅަށް އެ ގައުމުގައި ކުރި މުޒާހަރާތަކަށްފަހު، އީރާނާ ދެކޮޅަށް އަސްކަރީ ފިޔަވަޅު އަޅާނެ ކަމުގެ އިންޒާރު ޓްރަމްޕް ތަކުރާރުކޮށް ދެއްވާފައިވެ އެވެ. ހަމައެއާއެކު، އޭނާ ބޭނުންފުޅު ވަނީ ޑިޕްލޮމެޓިކް ހައްލެއް ކަމަށް ވެސް ވިދާޅުވެފައިވެ އެވެ. އެ ހައްލަކީ އީރާނުން ނިއުކްލިއާ ޕްރޮގްރާމް ހުއްޓާލުމާއި، ބެލިސްޓިކް މިސައިލް އުފެއްދުން ހުއްޓާލުމުގެ އިތުރުން، ހިޒްބުالله އާއި ހަމާސް އަދި ޔަމަނުގެ ހޫޘީން ފަދަ ޖަމާއަތްތަކަށް ދޭ އެހީތެރިކަން ހުއްޓާލުމެވެ.

އީރާނުން ވެސް ވަނީ އެމެރިކާ އިން އެ ގައުމަށް އެއްވެސް ހަމަލާއެއް ދީފިނަމަ، އެމެރިކާ އާއި އިޒްރޭލާ ދެކޮޅަށް ވަރުގަދަ ބަދަލެއް ހިފާނެ ކަމަށް ބުނެ އިންޒާރު ދީފަ އެވެ.