ބައިޑަން ވިދާޅުވީ އެމެރިކާގެ އަމިއްލަ ސަރުކާރުން ރައްޔިތުންނާ ކުރިމަތިލައި، ރައްޔިތުން ޓާގެޓު ތަކަށް ހަދަނީ ކަމަށް
31 ޖެނުއަރީ 2026 | ހޮނިހިރު 06:35ބައިޑަން ވިދާޅުވީ އެއީ އެމެރިކާގެ އެންމެ މުހިންމު އަގުތަކާއި، އެންމެ މުހިންމު އުސޫލުތަކާ ޚިލާފު ކަމެއް ކަމަށް. ޤާނޫނު އަސާސީ އިން ލިބިދޭ ހައްގު ތަކަށް އިޝާރާތް ކުރައްވައި ބައިޑަން ވިދާޅުވީ، އެމެރިކާ އަކީ މަގު މަތީގައި ރައްޔިތުންގެ ގަޔަށް ބަޑި ޖަހާ ޤައުމެއް ނޫން ކަމަށް.
އެމެރިކާގެ ކުރީގެ ރައީސް ޖޯ ބައިޑަން | ރޮއިޓާސް
އެމެރިކާގެ މިނިއަޕޮލިސްގައި ފެޑަރަލް އެޖެންޓުން ބަޑި ޖަހައި ނަރުހަކު މަރާލި މައްސަލައާ ގުޅިގެން، އެ ޤައުމުގެ ކުރީގެ ރައީސް ޖޯ ބައިޑަން ވަރަށް ބޮޑަށް ފާޑު ވިދާޅުވެއްޖެ އެވެ.
މިދިޔަ ހަފުތާގެ ތެރޭގައި ހިނގި އެ ހާދިސާގައި ވަނީ އުމުރުން 37 އަހަރުގެ ނަރުހެއް ކަމަށްވާ އެލެކްސް ޕްރެޓީ މަރާލައިފަ އެވެ. އެކަމާ ގުޅިގެން އެތައް ބައެއްގެ ފާޑު ކިޔުން ވަނީ އެމެރިކާގެ ސަރުކާރަށް އަމާޒުވެފަ އެވެ. އެގޮތުން ޑިމޮކްރަޓިކް ޕާޓީ އަށް ނިސްބަތްވާ ކުރީގެ ރައީސުން ވެސް ވަނީ އެކަން ކުށްވެރި ކުރައްވައިފަ އެވެ.
ބައިޑަން ވިދާޅުވީ އެއީ އެމެރިކާގެ އެންމެ މުހިންމު އަގުތަކާއި، އެންމެ މުހިންމު އުސޫލުތަކާ ޚިލާފު ކަމެއް ކަމަށެވެ. ޤާނޫނު އަސާސީ އިން ލިބިދޭ ހައްގު ތަކަށް އިޝާރާތް ކުރައްވައި ބައިޑަން ވިދާޅުވީ، އެމެރިކާ އަކީ މަގު މަތީގައި ރައްޔިތުންގެ ގަޔަށް ބަޑި ޖަހާ ޤައުމެއް ނޫން ކަމަށެވެ. އަދި ޤާނޫނު އަސާސީ އިން ލިބިދޭ ހައްގުތައް ބޭނުން ކުރުމުގެ ސަބަބުން، ރައްޔިތުންނަށް އަނިޔާ ކުރާ ވެސް ޤައުމެއް ނޫން ކަމަށް ބައިޑަން ވިދާޅުވި އެވެ.
އެމެރިކާގައި މިހާރު އޮތް ސަރުކާރުގެ ފަރާތުން އެތައް ކަމެއް މިހާރު ވެސް މިނިސޯޓާގެ ރައްޔިތުންގެ ތަހަންމަލު ކޮށްފައިވާ ކަމަށާއި، އެމެރިކާ އަކީ ކޮން ކަހަލަ ޤައުމެއްކަން މިނިސޯޓާގެ ރައްޔިތުން ހަނދާން ކޮށްދީފައިވާ ކަމަށެވެ. އެމެރިކާގައި ބިރުވެރިކަމާއި ހަނގުރާމަވެރި ކަމަށް އެއްވެސް ޖާގައެއް ނޯންނާނެކަން ފާހަގަ ކުރައްވައި ބައިޑަން ވިދާޅުވީ، ޚާއްސަކޮށް އެމެރިކާގެ ސަރުކާރުން އެ ޤައުމުގެ ރައްޔިތުން ޓާގެޓު ތަކަށް ހަދައިގެން ނުވާނެ ކަމަށެވެ.
އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ގެންގުޅޭ އިމިގްރޭޝަން ސިޔާސަތުތަކާ ގުޅިގެން، އޭނާގެ ސަރުކާރަށް އަންނަނީ އެތައް ބައެއްގެ ފާޑު ކިޔުން އަމާޒުވަމުންނެވެ. އެކަމަށް އިޝާރާތް ކުރައްވައި ބައިޑަން ވިދާޅުވީ، އެމެރިކާ ތަމްސީލު ކުރާ އަގުތައް ބަދަލު ކުރުމަކީ އެއްވެސް މީހަކަށް އޮތް ބާރެއް ނޫން ކަމަށެވެ. އެމެރިކާގެ ރައީސް އަށް ވެސް އެކަން ނުކުރެވޭނެ ކަމަށާއި، އެކަންކަން ހުއްޓުވޭނީ އެމެރިކާގެ ރައްޔިތުން އެކުގައި ނިކުމެ އަޑު އުފުލައިގެން ކަމަށް ވެސް ބައިޑަން ވިދާޅުވެފައިވެ އެވެ.
އެއާ އެކު ބައިޑަން ގޮވާލައްވާފައި ވަނީ ޖަނަވަރީ މަހުގެ ކުރީ ކޮޅު ފެޑަރަލް އިމިގްރޭޝަން އެޖެންޓަކު ބަޑި ޖަހައި މަރާލި ރެނީ ގުޑްގެ މަރާއި، އެންމެ ފަހުން ހޮނިހިރު ދުވަހު މަރާލި ޕްރެޓީގެ މައްސަލަ ފުރިހަމަ އަށް ބަލައި ތަހުގީގު ކުރުމަށެވެ. ބައިޑަންގެ އިތުރުން އެމެރިކާގެ ކުރީގެ ރައީސުން ކަމަށްވާ ބަރަކް އޮބާމާ އާއި، ބިލް ކްލިންޓަން ވެސް ވަނީ އެ ހާދިސާތައް ކުށްވެރި ކުރައްވައިފަ އެވެ.
2025 ވަނަ އަހަރުގެ ޖަނަވަރީ މަހުގެ ތެރޭގައި ބައިޑަންގެ ރިޔާސީ ދައުރު ނިމުނު ފަހުން، އޭނާ އުޅުއްވަނީ ވަރަށް ބޮޑަށް ސިޔާސީ ކަންކަމާ ދުރުގަ އެވެ. ބައިޑަން މިހާރު ގެންދަވަނީ ޕްރޮސްޓޭޓް ކެންސަރަށް ފަރުވާ ހޯއްދަވަމުންނެވެ. ބައިޑަން މިހާރު ގެންދަވަނީ އޭނާގެ ނަމުގައި ޤާއިމު ކުރުމަށް ހަމަޖެހިފައިވާ ރިޔާސީ ލައިބްރަރީގެ މަސައްކަތުގައި ގިނަ ވަގުތު ހޭދަ ކުރައްވަމުންނެވެ.
މަސްދަރު: ދި ގާޑިއަން
