އީރާން އިން ބޭނުން ވަނީ ޑީލެއް ހަދަން: ޓްރަމްްޕް

އީރާން އިން ބޭނުން ވަނީ ޑީލެއް ހަދަން ކަަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ބުރާސްފަތި ދުވަހު ޓްރަމްޕް ވިދާޅުވީ، އެމެރިކާ އިން މެދު އިރުމަތީގެ ސަރަހައްދަށް ފޮނުވަނީ އަސްކަރީ ވަރަށް ބޮޑު ފައުޖެއް ކަމަށެވެ. އެ ފައުޖަކީ އެމެރިކާ އިން ވެނެޒުއެލާ އަށް ފޮނުވި އަސްކަރީ ފައުޖަށް ވުރެ ވެސް ބޮޑު ފައުޖެއް ކަމަށް ފާހަގަ ކުރައްވައި ޓްރަމްޕް ވިދާޅުވީ، ސިފައިން ފޮނުވުން ހުއްޓުވުމުގެ އެއްބަސްވުމަކަށް އައުމަށް އީރާން އިން ބޭނުންވާ ކަމަށް ޤަބޫލު ކުރައްވާ ކަމަށެވެ. 

އެމެރިކާގެ ރިޔާސީ ގަނޑުވަރު، ވައިޓް ހައުސްގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އެމެރިކާގެ އެންމެ ބޮޑު އަސްކަރީ ފައުޖު މިހާރު ދަނީ އީރާންއާ ދިމާލަށް ކަމަށެވެ. އެކަން ފާހަގަ ކުރައްވައި ޓްރަމްޕް ވިދާޅުވީ، އޭނާގެ އުންމީދަކީ އެއްބަސްވުމަކަށް އައުން ކަމަށެވެ. "އަހަރަމެން" ބޭނުން ވަނީ އެއްބަސްވުމަކަށް އަންނަ ކަމަށް ފާހަގަ ކުރައްވައި އޭނާ ވަނީ، އެއްބަސްވުމަކަށް ނާދެވިއްޖެ ނަމަ ދެން ވާނެ ގޮތަކާ މެދު ސުވާލު އުފައްދަވައިފަ އެވެ. 

އީރާންގެ ނިއުކްލިއާ ޕްރޮގްރާމް އާއި، ބެލިސްޓިކް މިސައިލް ތަކާއި، އަދި އެހެނިގެން މައްސަލަތަކަ ބެހޭ ގޮތުން އެއްބަސްވުމަކަށް އައުމަަށް އީރާން އަށް ސުން ގަޑިއެއް ދީފައިވާނެތޯ ސުވާލު ކުރުމުން ޓްރަމްޕް ވިދާޅުވީ، ސުން ގަޑި ދީފައި ވާނެ ކަމަށެވެ. ނަމަވެސް، އެއީ ކޮން ވަގުތެއްކަން ޔަޤީންކަމާ އެކު އިނގޭނީ އީރާން އަށް ކަމަށް ޓްރަމްޕް ވިދާޅުވި އެވެ. 

އެއަށް ފަހު ޓްރަމްޕް ވިދާޅުވީ، އަމުރު ތަކަށް ތަބާވުމަށް އީރާން އޮތީ ތައްޔާރަށްކަން ދައްކުވައިދީފައިވާ ކަމަށެވެ. އެގޮތުން އީރާންގައި ކުރިއަށް ދިޔަ މުޒާހަރާ ތަކުގައި 6000 އަސް ވުރެ ގިނަ މީހުން މަރުވެފައިވާ ކަމަށް މިނިވަން ޖަމިއްޔާ ތަކުން ފާހަގަ ކޮށްފައިވާ ކަމަށް ޓްރަމްޕް ވިދާޅުވި އެވެ. އަދި ހައްޔަރު ކުރި މީހުން ދަން ޖެއްސުމަށް ނިންމި ނިންމުން، އީރާން އިން ބާތިލު ކުރުމަކީ އެކަމުގެ ހެއްކެއް ކަމަށް ވެސް ޓްރަމްޕް ވިދާޅުވި އެވެ. 

އެކަން ފާހަގަ ކުރައްވައި ޓްރަމްޕް ވިދާޅުވީ، އީރާން އިން އެއްބަސްވުމަކަށް އަންނަން ބޭނުންވާކަން އޭނާ އަށް އެނގިވަޑައިގަންނަވާ ކަމަށެވެ. ތަކުރާރުކޮށް ޓްރަމްޕް ގެންދަވަނީ، އެއްބަސްވުމަކަށް އައުމަށް އީރާން އަށް އިންޒާރު ދެމުންނެވެ.