އެޕްސްޓީން ފައިލް ގައި ޑިއުކް އާއި ރަޝިޔާ އަންހެންކުއްޖަކާ ބައްދަލު ކުރުމާއި، ބިލްގޭޓްސް އަށް ޖިންސީ ގުޅުމުން ބައްޔެއް ޖެހުނު ވާހަކަ އާއި މަސްކް މަޖާ ކުރަން ދާން އުޅުނު ވާހަކަ!

އެމެރިކާގެ ޖަސްޓިސް ޑިޕާޓްމަންޓުން، ޖިންސީ ކުށްވެރިޔާ ޖެފްރީ އެޕްސްޓީން އާ ގުޅުންހުރި އެތައް މިލިއަން އާ ފައިލްތަކެއް އާންމުކޮށްފިއެވެ.

މިއީ މިދިޔަ އަހަރު ފާސްކުރި ގާނޫނެއްގެ ދަށުން، ސަރުކާރުން މިހާތަނަށް އާންމުކުރި އެޕްސްޓީން އާ ގުޅޭ އެންމެ ގިނަ އަދަދެއްގެ ލިޔެކިޔުންތަކެވެ.

މިދިޔަ ހުކުރު ދުވަހު އާންމުކުރި މި މައުލޫމާތުތަކުގެ ތެރޭގައި ތިން މިލިއަން ސަފުހާގެ ލިޔެކިޔުމާއި، 180،000 ފޮޓޯ އަދި 2،000 ވީޑިއޯ ހިމެނެ އެވެ. މި ތަކެތި އާންމުކޮށްފައި ވަނީ، އެޕްސްޓީން އާ ގުޅުންހުރި ހުރިހާ ލިޔެކިޔުންތަކެއް ހާމަކުރުމަށް އެމެރިކާގެ ރައީސް ޑޮނަލްޑް ޓްރަމްޕް ސޮއިކުރެއްވި ގާނޫނުގައި ބަޔާންކޮށްފައިވާ ސުންގަޑި ހަމަވިތާ ހަ ހަފުތާ ފަހުންނެވެ.

ޑެޕިއުޓީ އެޓާނީ ޖެނެރަލް ޓޮޑް ބްލާންޗް ވިދާޅުވި ގޮތުގައި، މި ލިޔެކިޔުންތައް ހާމަކުރުމަކީ އެމެރިކާގެ ރައްޔިތުންނަށް ކަންކަން ސާފުކޮށްދިނުމަށާއި ގާނޫނީ އިޖުރާއަތްތައް ފުރިހަމަކުރުމަށް ކުރެވުނު ވަރަށް ފުޅާ މަސައްކަތެއްގެ ނިމުމެވެ.

މި ފައިލްތަކުގެ ތެރޭގައި އެޕްސްޓީން ޖަލުގައި ހޭދަކުރި ދުވަސްތަކުގެ ތަފުސީލުތަކާއި (ނަފްސާނީ ރިޕޯޓުތަކާއެކު)، ޖަލުގައި ބަންދުކޮށްފައި ހުއްޓާ އޭނާ މަރުވި ގޮތުގެ މައުލޫމާތު ހިމެނެ އެވެ. މީގެ އިތުރުން، ކުޑަކުދިން ޓްރެފިކް ކުރުމުގައި އެޕްސްޓީން އަށް އެހީތެރިވި ކަމުގެ ކުށް ސާބިތުވެފައިވާ ގިސްލެއިން މެކްސްވެލްގެ ތަހުގީގީ ރެކޯޑުތަކާއި، ނުފޫޒުގަދަ ބޭފުޅުންނާއެކު އެޕްސްޓީން ބަދަލުކޮށްފައިވާ އީމެއިލްތައް ވެސް ހިމެނެ އެވެ.

މި ލިޔެކިޔުންތަކުން އެޕްސްޓީންގެ ގާނޫނީ މައްސަލަތަކުގެ ތެރޭގައި އޭނާ ބޭއްވި ގުޅުންތައް ހާމަވެގެންދެއެވެ. 2008 ވަނަ އަހަރު ފްލޮރިޑާގައި 14 އަހަރުގެ އަންހެން ކުއްޖަކާއެކު ޖިންސީ އަމަލު ހިންގުމަށް ހިތްވަރުދިން ކަމުގެ ކުށުގައި އޭނާގެ މައްޗަށް ހުކުމް ކުރެވުނެވެ. އޭނާ މަރުވީ 2019 ވަނަ އަހަރުގެ އޮގަސްޓް މަހު، ޖިންސީ ވަގުފާރީގެ ބޮޑު މައްސަލައެއްގެ ޝަރީއަތް ނިމެންދެން ޖަލުގައި ބަންދުކޮށްފައި ހުއްޓަ އެވެ.

އެޕްސްޓީން، 'ދަ ޑިއުކް' އާއި ރަޝިޔާ އަންހެނަކު ބައްދަލުކުރުވަން އުޅުން

މި ލިޔެކިޔުންތަކުން އިނގިރޭސިވިލާތުގެ މަތީ ފަންތީގެ ބޭފުޅުންނާ އެޕްސްޓީން އާ އޮތް ގާތް ގުޅުން ހާމަވެ އެވެ. މީގެ ތެރޭގައި "ދަ ޑިއުކް" (އެއީ ޕްރިންސް އެންޑްރޫ ކަމަށް ބެލެވޭ) އާ އެކު ބަކިންހަމް ޕެލަސްގައި، ސިއްރު މާހައުލެއްގައި ރޭގަނޑުގެ ކެއުމަކަށް ދިއުމާ ބެހޭގޮތުން ދެކެވުނު ވާހަކަތައް ހިމެނެ އެވެ. އެޕްސްޓީން ފޮނުވި އެހެން މެސެޖެއް ގައި، 26 އަހަރުގެ ރަޝިޔާ އަންހެނަކާ "ދަ ޑިއުކް" ބައްދަލުކޮށްދިނުމަށް އޭނާ ހުށަހަޅާފައިވެ އެވެ.

މި އީމެއިލްތަކުގައި ސޮއިކޮށްފައި ވަނީ "A" ޖަހާފައެވެ. އަދި އޭގައި "HRH Duke of York KG" ގެ ނަން ބޭނުންކޮށްފައިވެ އެވެ. މިއީ 2010 ވަނަ އަހަރުގެ އޮގަސްޓް މަހު، އެޕްސްޓީން ކުށަށް އިއުތިރާފުވިތާ ދެ އަހަރު ފަހުން ބަދަލުކޮށްފައިވާ މެސެޖުތަކެކެވެ. ނަމަވެސް، މި އީމެއިލްތަކުން އެއްވެސް ގާނޫނާ ހިލާފު އަމަލެއް ހިންގި ކަމެއް ސާފެއް ނުވެ އެވެ.

އެންޑްރޫ ވަނީ އެޕްސްޓީން އާ އޮތް ގުޅުމާ ގުޅިގެން ކުރެވޭ ތުހުމަތުތަކަށް ތަކުރާރުކޮށް އިންކާރު ކުރައްވާފަ އެވެ.

މި ލިޔެކިޔުންތަކުގެ ތެރޭގައި އެންޑްރޫގެ ކުރީގެ އަނބިކަނބަލުން ސާރާ ފާގަސަން އާ އެޕްސްޓީން އާ ދެމެދު ބަދަލުކޮށްފައިވާ އީމެއިލްތަކެއް ވެސް ހިމެނެ އެވެ. 2009 ވަނަ އަހަރުގެ އޭޕްރީލް މަހުގެ އީމެއިލެއް ގައި ސާރާ ވަނީ އެޕްސްޓީން އަކީ އޭނާގެ "ވަރަށް ހާއްސަ ރަހުމަތްތެރިއެއް" ކަމަށް ބުނެފަ އެވެ. އަދި އޭނާ އަށް ވަރަށް ބޮޑަށް ތައުރީފުކޮށް، "އަހަރެން ކަލެއާ މެދު ވަރަށް ފަޚުރުވެރިވަން" ކަމަށް ލިޔެފައިވެ އެވެ. މި އީމެއިލްތައް ބަދަލުކޮށްފައި ވަނީ 2008 ވަނަ އަހަރުގެ ހުކުމާ ގުޅިގެން އެޕްސްޓީން ގޭ ބަންދުގައި ހުރި ދުވަސްވަރުގަ އެވެ.

ޓްރަމްޕްގެ ނަން އެތައް ސަތޭކަ ފަހަރު އައިސްފައިވޭ

އަލަށް އާންމުކުރި ލިޔެކިޔުންތަކުގައި އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ނަންފުޅު ސަތޭކަ އަށް ވުރެ ގިނަ ފަހަރު އައިސްފައިވެ އެވެ. ޓްރަމްޕާއި އެޕްސްޓީން އާ ދެމެދު އެކުވެރިކަމެއް އޮތް ނަމަވެސް، އެ ގުޅުން މީގެ އެތައް އަހަރެއް ކުރިން ކެނޑިފައިވާ ކަމަށާއި، އެޕްސްޓީން ހިންގި ޖިންސީ ކުށްތަކުގެ އެއްވެސް މައުލޫމާތެއް އެނގިވަޑައިނުގަންނަވާ ކަމަށް ޓްރަމްޕް ވަނީ ވިދާޅުވެފަ އެވެ.

މި ލިޔެކިޔުންތަކުގެ ތެރޭގައި، އެމެރިކާގެ ތަހުގީގީ އިދާރާ އެފް.ބީ.އައި އަށް އެކި ފަރާތްތަކުން ގުޅައި ޓްރަމްޕާ ދެކޮޅަށް ކޮށްފައިވާ ތުހުމަތުތަކުގެ ލިސްޓެއް ހިމެނެ އެވެ. ނަމަވެސް މީގެ ތެރެއިން ގިނަ ތުހުމަތުތަކަކީ އެއްވެސް ހެއްކެއް ނެތި، ސައްހަކަން ކަށަވަރު ނުކުރެވޭ މައުލޫމާތުތަކެއްގެ މައްޗަށް ބިނާވެފައިވާ ކަންކަމެވެ.

މި ލިސްޓުގައި ޓްރަމްޕާއި، އެޕްސްޓީންގެ އިތުރުން އެމެރިކާގެ އިސް އެހެން ބައެއް ފަރާތްތަކާ ދެކޮޅަށް ކުރެވުނު ޖިންސީ ގޯނާގެ ތުހުމަތުތައް ހިމެނެ އެވެ.

އެޕްސްޓީންގެ މައްސަލާގައި ޓްރަމްޕް އަބަދުވެސް ވިދާޅުވަމުން ގެންދަވަނީ އެއްވެސް ގޯސް ކަމެއް ކުރައްވާފައި ނުވާނެ ކަމަށެވެ. އަދި އެޕްސްޓީންގެ ޝިކާރައަކަށްވި އެއްވެސް ފަރާތަކުން ޓްރަމްޕާ ދެކޮޅަށް ދައުވާއެއް ނުވަތަ ކުށުގެ ތުހުމަތެއް ކޮށްފައެއް ނުވެ އެވެ.

އަލަށް ފެންމަތިވި ތުހުމަތުތަކާ ގުޅިގެން ވައިޓް ހައުސް އާއި ޖަސްޓިސް ޑިޕާޓްމަންޓުން ވަނީ އެ ލިޔެކިޔުންތަކާ އެކު ނެރުނު ބަޔާނަކަށް އިޝާރާތް ކޮށްފައެވެ.

"ބައެއް ލިޔެކިޔުންތަކުގައި 2020 ވަނަ އަހަރުގެ ރިޔާސީ އިންތިހާބާ ދިމާކޮށް ރައީސް ޓްރަމްޕާ ދެކޮޅަށް އެފް.ބީ.އައި އަށް ހުށަހަޅާފައިވާ ދޮގު އަދި ހަގީގަތާ ހިލާފު ވާހަކަތަކެއް ހިމެނޭ،" އެމެރިކާގެ ޖަސްޓިސް ޑިޕާޓްމަންޓުން ބުނެފައިވެ އެވެ.

އަދި އިތުރަށް ބުނެފައި ވަނީ، "ސާފުކޮށް ދަންނަވާނަމަ، މި ތުހުމަތުތަކަކީ އެއްވެސް އަސާސެއް ނެތް ދޮގު ވާހަކަތަކެކެވެ. މީގައި ކުޑަވެސް ހަގީގަތެއް އޮތް ނަމަ، މީގެ މާ ކުރިން ވެސް މި ކަންކަން ރައީސް ޓްރަމްޕާ ދެކޮޅަށް ހަތިޔާރެއްގެ ގޮތުގައި ބޭނުންކުރީހެވެ."

އެޕްސްޓީންގެ ރަށުގައި އެންމެ "ވައިލްޑް ޕާޓީ" އޮންނާނީ ކޮން ދުވަހަކުތޯ އީލޮން މަސްކް އެހި

މި ލިޔެކިޔުންތަކުގެ ތެރޭގައި އެޕްސްޓީން އާއި މަހުޖަނު އީލޮން މަސްކާ ދެމެދު ބަދަލުކުރެވުނު އީމެއިލްތަކެއް ވެސް ހިމެނެ އެވެ.

މި މައްސަލާ ގައި އެއްވެސް ކުށެއްގެ ތުހުމަތެއް ކުރެވިފައި ނުވާ މަސްކް މީގެ ކުރިން ބުނެފައި ވަނީ، އެޕްސްޓީން އޭނާގެ ރަށަށް ދިއުމަށް ދައުވަތު ދިން ނަމަވެސް އެކަމަށް އިންކާރު ކޮށްފައިވާނެ ކަމަށެވެ.

ނަމަވެސް އާ އީމެއިލްތަކުން އެނގޭ ގޮތުގައި، އެ ރަށަށް ދިއުމާ ބެހޭގޮތުން އެކި ފަހަރު މަތިން މަސްކް ވަނީ މަޝްވަރާ ކޮށްފަ އެވެ. އެގޮތުން 2012 ވަނަ އަހަރު ކުރަން އުޅުނު ދަތުރަކާ ގުޅޭގޮތުން މަސްކް ވަނީ "ކަލޭގެ ރަށުގައި އެންމެ ވައިލްޑް ޕާޓީ އޮންނާނީ ކޮން ރެއެއްގައި ނުވަތަ ކޮން ދުވަހަކު؟" އޭ ބުނެ އެޕްސްޓީން ގާތު އަހާފަ އެވެ.

2012 ވަނަ އަހަރުގެ ނޮވެމްބަރު މަހުގެ އީމެއިލްތަކުން އެނގޭ ގޮތުގައި، ހެލިކޮޕްޓަރުގައި އެ ރަށަށް ގެންނަނީ ކިތައް މީހުންތޯ އެޕްސްޓީން އެހުމުން، މާސްކް ޖަވާބުގައި ބުނެފައިވަނީ ދާނީ އޭނާ އާއި އޭރުގެ އަންހެނުން ޓަލޫލާ ރައިލީ އެކަނި ކަމަށެވެ.

2012 ވަނަ އަހަރުގެ ކްރިސްމަސް ދުވަހު މަސްކް ފޮނުވި އީމެއިލެއްގައި، އެއްވެސް ޕާޓީ އެއް ރާވާފައިވޭތޯ އެހީ އޭނާ "މަޖާކޮށްލަން" ބޭނުންވާތީ ކަމަށް ބުނެފައިވެ އެވެ.

"މި އަހަރު އަހަރެން މި މަސައްކަތް ކުރީ އިންތިހާ ދަރަޖައަށް ބުރަކޮށް. އެހެންކަމުން ކްރިސްމަސް އަށް ފަހު ކުދިން ގެއަށް ދިއުމުން، ސެއިންޓް ބާޓްސް ނުވަތަ އެހެން ތަނެއްގައި އޮންނަ ޕާޓީއަކަށް ގޮސް މަޖާކޮށްލަން ބޭނުން،" މަސްކް ލިޔެފައިވެ އެވެ. އަދި "ހިމޭން ރަށެއްގެ ތަޖުރިބާ އަކީ" އޭނާ މިވަގުތު ބޭނުންވާ ގޮތް ނޫން ކަމަށް ވެސް ބުނެފައިވެ އެވެ.

2013 ވަނަ އަހަރުގެ ފަހުކޮޅުގެ އީމެއިލްތަކެއްގައި ވެސް، މަސްކާއި އެޕްސްޓީން ވަނީ އެ ރަށަށް ކުރާ ދަތުރަކާ ގުޅޭގޮތުންނާއި، ދާނެ ތާރީހުތަކާ ބެހޭގޮތުން ވާހަކަ ދައްކާފަ އެވެ.

ނަމަވެސް، މަސްކް އެއްވެސް އިރެއްގައި އެޕްސްޓީންގެ ރަށަށް ދަތުރުކުރި ކަމުގެ އެއްވެސް ހެއްކެއް ފެންނާކަށް ނެތެވެ.

ބިލްގޭޓްސް އަށް ޖިންސީ ގުޅުމުން އަރާ ބައްޔެއް ޖެހުނު ކަމަށް ބުނާ ވާހަކަ

މައިކްރޯސޮފްޓްގެ ބާނީ ބިލް ގޭޓްސް އާ ބެހޭ ގޮތުން އެޕްސްޓީންގެ ފައިލްތަކުގައި ހިމެނޭ ހަޑިމުޑުދާރު ތުހުމަތުތަކަށް އޭނާގެ ތަރުޖަމާނު ރައްދު ދީފި އެވެ. މީގެ ތެރޭގައި ޖިންސީ ގުޅުމުން އަރާ ބައްޔެއް ޖެހިފައިވާ ކަމަށް ކުރާ ތުހުމަތުތައް ހިމެނޭއިރު، ތަރުޖަމާނު ވަނީ އެއީ އެއްވެސް އަސާސެއް ނެތް، މުޅިން ދޮގު ވާހަކަތަކެއް ކަމަށް ބުނެފަ އެވެ.

18 ޖުލައި 2013 ގައި ދެ އީމެއިލެއް އެޕްސްޓީން ލިޔެ ތައްޔާރުކޮށްފައިވާ ކަމަށް ބެލެވުނު ނަމަވެސް، އެ އީމެއިލްތައް ގޭޓްސް އަށް ފޮނުވިކަން ސާފެއް ނުވެ އެވެ. މި ދެ އީމެއިލަކީ ވެސް އެޕްސްޓީންގެ އަމިއްލަ އީމެއިލް އެކައުންޓުން ފޮނުވައި، އަލުން އެ އެކައުންޓަށް ލިބިފައިވާ ދެ މެއިލެވެ. މި މެއިލްތަކުން ގޭޓްސްގެ އެއްވެސް އީމެއިލް އެޑްރެހެއް ފެންނާކަށް ނެތްއިރު، އޭގައި އެއްވެސް މީހަކު ސޮއިކޮށްފަ އެއް ވެސް ނުވެއެވެ.

މީގެ ތެރެއިން އެއް އީމެއިލް ލިޔެފައި ވަނީ ބިލް އެންޑް މެލިންޑާ ގޭޓްސް ފައުންޑޭޝަނުން ވަކިވުމަށް އެދި ހުށަހަޅާ ސިޓީއެއްގެ ގޮތަށެވެ. އެ ސިޓީގައި ރަޝިޔާގެ އަންހެން ކުދިންނާއެކު ބޭއްވި ޖިންސީ ގުޅުންތަކުގެ ސަބަބުން ކުރިމަތިވި ކަންކަމަށް ފަރުވާ ހޯދުމަށް، ގޭޓްސް އަށް ބޭސް ހޯދައިދޭން ޖެހުނު ކަމަށް ބުނެ ޝަކުވާކޮށްފައިވެ އެވެ.

އަނެއް އީމެއިލްގައި، ގޭޓްސް އެކުވެރިކަން ކަނޑާލުމާ ގުޅޭގޮތުން ވާހަކަ ދައްކާފައިވެ އެވެ. އަދި ޖިންސީ ގުޅުމުން އަރާ ބައްޔެއް ޖެހުމުން އެކަން އޭރުގެ އަނބިކަނބަލުން މެލިންޑާގެ ކިބައިންނާއި އެހެން މީހުންގެ ކިބައިން ގޭޓްސް ސިއްރުކުރަން މަސައްކަތް ކުރި ކަމަށް ވެސް އެ އީމެއިލްގައި ތުހުމަތުކޮށްފައިވެ އެވެ.

ގޭޓްސްގެ ތަރުޖަމާނު ބީބީސީ އަށް މައުލޫމާތު ދެމުން ބުނެފައިވަނީ، "ކަންކަމާ ހިތްހަމަނުޖެހިގެން އުޅޭ، ސާބިތުވެފައިވާ ބޮޑު ދޮގުވެރިއެއްގެ ފަރާތުން އައިސްފައިވާ މި ތުހުމަތުތަކަކީ އެއްވެސް އަސާސެއް ނެތް، މުޅިން ދޮގު ވާހަކަތަކެއް" ކަމަށެވެ.

އަދި މި ލިޔެކިޔުންތަކުން ހަމައެކަނި ސާފުވާ ކަމަކީ، ގޭޓްސް އާ ގާތް ގުޅުމެއް ނުބޭއްވުމުން އެޕްސްޓީން ހިތްހަމަނުޖެހިފައި ހުރި މިންވަރާއި، މީހުން މަޅީގައި ޖައްސައި އަބުރު ކަތިލުމަށް އޭނާ ކުރާނެ މަސައްކަތުގެ ބޮޑުމިން ކަމަށް ވެސް ތަރުޖަމާނު އިތުރަށް ބުނި ކަމަށް ބީބީސީ އިން ރިޕޯޓު ކޮށްފައިވެ އެވެ.