އެމެރިކާގެ އަސްކަރީ ޑިސްޓްރޯޔަރު އިޒްރޭލުގެ އީލާތު ގައި ބަނދަރުކޮށްފި

އީރާނާ ދެމެދު މަސްރަހު ނުތަނަވަސްވެފައިވާ ދަނޑިވަޅެއްގައި، އެމެރިކާގެ ކަނޑުގެ ސިފައިންގެ ޑިސްޓްރޯޔަރެއް އިޒްރޭލުގެ އީލާތު ގައި ބަނދަރުކޮށްފައިވާ ކަމަށް، އިޒްރޭލުގެ އަސްކަރިއްޔާއާ ހަވާލާދީ އެ ގައުމުގެ "ވައިނެޓް" ނިއުސް ވެބްސައިޓުން ހުކުރު ދުވަހު ރިޕޯޓްކޮށްފި އެވެ.

އިޒްރޭލާއި މިސްރު އަދި އުރުދުން ގުޅޭ ބޯޑަރު ކައިރީގައި އޮންނަ ގަލްފް އޮފް އަގަބާގެ ދެކުނު ބަނދަރަށް މި މަނަވަރު އައުމަކީ ކުރިން ރޭވިފައިވާ ކަމެއް ކަމަށާއި، މިއީ އެމެރިކާ އާއި އިޒްރޭލުގެ އަސްކަރިއްޔާ އާ ދެމެދު އޮންނަ ގުޅުމުގެ ތެރެއިން ހިނގާ ކަމެއް ކަމަށް ވައިނެޓުން ބުނެފައިވެ އެވެ.

މިކަމާ ގުޅޭގޮތުން ރޮއިޓާސް ނިއުސް އެޖެންސީން ސުވާލު ކުރުމުން، އެމެރިކާގެ ކަނޑުގެ ސިފައިންނާއި އިޒްރޭލުގެ އަސްކަރިއްޔާއިން ވަގުތުން ޖަވާބެއް ދީފައެއް ނުވެ އެވެ.

އެމެރިކާގެ ރައީސް ޑޮނަލްޑް ޓްރަމްޕް، މެދުއިރުމައްޗަށް އިތުރު އަސްކަރީ ވަސީލަތްތައް ފޮނުއްވަމުން ގެންދެވި ނަމަވެސް، މި މަނަވަރު ބަނދަރު ކުރީ އީރާނާ އެކު މަޝްވަރާ ކުރުމަށް ތައްޔާރަށް ހުންނެވި ކަމުގެ އިޝާރާތެއް ޓްރަމްޕް ދެއްވާފައިވާ ދަނޑިވަޅެއްގަ އެވެ. 

އެމެރިކާގެ ދިފާއީ އޮފިޝަލަކު ރޮއިޓާސް އަށް މައުލޫމާތު ދެއްވަމުން ވިދާޅުވީ، ސަލާމަތީ ސަބަބުތަކަށްޓަކައި އަސްކަރީ އޮޕަރޭޝަންތަކުގެ ތަފްސީލު ހާމަކުރެވެން ނެތް ކަމަށާއި، އެންމެ ބޮޑު އިސްކަމެއް ދެނީ ސިފައިންގެ ރައްކާތެރިކަމަށް ކަމަށެވެ.

ޕެންޓަގަންގެ ވެރިޔާ ޕީޓް ހެގްސެތު ވިދާޅުވީ، ރައީސް ނިންމަވާ ކޮންމެ ފިޔަވަޅެއް ތަންފީޒު ކުރުމަށް އެމެރިކާގެ އަސްކަރިއްޔާ އޮތީ ތައްޔާރަށް ކަމަށެވެ.

އީރާނުގެ ނިއުކްލިއާ ޕްރޮގްރާމާ ގުޅޭގޮތުން އަލުން މަޝްވަރާގެ މޭޒަށް އެނބުރި ނައުމުން، އެމެރިކާ އިން މިއަށްވުރެ ވަރުގަދަ ފިޔަވަޅުތަކެއް އަޅާނެ ކަމުގެ އިންޒާރު ޓްރަމްޕް ދެއްވާފައިވާއިރު، ތެހެރާނުން ވަނީ އެމެރިކާ އާއި އިޒްރޭލު އަދި އެ ގައުމުތަކުގެ ބައިވެރިންނަށް ރައްދު ހަމަލާދޭނެ ކަމަށް ބުނެ އިންޒާރު ދީފައެވެ.