ޕެޒެޝްކިއަން: ޓްރަމްޕް އާއި ނަތަންޔާހޫ އަދި އީޔޫ އިން މަސައްކަތް ކުރީ އީރާން ބައިބައި ކޮށްލަން
އީރާނުގެ ރައީސް މަސްއޫދު ޕެޒެޝްކިއަން ވިދާޅުވީ ފަހަކަށް އައިސް އެ ގައުމުގައި ހިނގި ހަމަނުޖެހުންތަކުގެ ފަހަތުގައި ތިބީ އެމެރިކާގެ ރައީސް ޓްރަމްޕާއި އިޒްރޭލުގެ ބޮޑުވަޒީރު ނަތަންޔާހޫއާއި ވިލާތުގެ ބައެއް ގައުމުތަކެއް ކަމަށް. އާންމުންގެ ސުލްހަވެރި މުޒާހަރާތައް ބޭރުގެ އެހީތެރިކަން ލިބޭ ހަތިޔާރު އެޅި ގުރޫޕުތަކުން ހަމަނުޖެހުމަކަށް ބަދަލުކޮށް، އާންމު ރައްޔިތުންނާއި ސަލާމަތީ ބާރުގެ ހާހަށްވުރެ ގިނަ މީހުން މަރާލާފައިވާއިރު ދައުލަތުގެ މުއައްސަސާތަކަށް ބޮޑެތި ގެއްލުންތަކެއް ދިން ކަމަށް އޭނާ ވިދާޅުވި.
އީރާނުގެ ރައީސް މަސްއޫދު ޕެޒެޝްކިއަން މަގާމާ ހަވާލުވެވަޑައިގަތުމަށްފަހު ބާއްވާ ފުރަތަމަ ނޫސްވެރިންގެ ބައްދަލުވުން، 2024 ސެޕްޓެމްބަރު 16 ވީ ހޯމަ ދުވަހު އެ ގައުމުގެ ވެރިރަށް ތެހެރާންގައި ބާއްވަނީ (ފައިލް). | ގެޓީ އިމޭޖަސް
ފަހަކަށް އައިސް ބޭރުގެ ނުފޫޒާއެކު އެ ގައުމުގައި ހިންގި ހަމަނުޖެހުންތަކުގެ ފަހަތުގައި ތިބީ އެމެރިކާގެ ރައީސް ޑޮނަލްޑް ޓްރަމްޕާއި، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އިތުރުން ވިލާތުގެ ބައެއް ގައުމުތައް ކަމަށް އީރާނުގެ ރައީސް މަސްއޫދު ޕެޒެޝްކިއަން ވިދާޅުވެއްޖެ އެވެ. އަދި އެ ފަރާތްތަކުން މަސައްކަތް ކުރީ އީރާނުގެ ރައްޔިތުންގެ މެދުގައި ބައިބައިވުން އުފައްދައި، ހަމަނުޖެހުންތަކަށް ހިތްވަރު ދިނުމަށް ކަމަށް އެމަނިކުފާނު ވިދާޅުވި އެވެ.
އިސްލާމީ އިންގިލާބުގެ ބާނީ އިމާމް ޚުމައިނީގެ މަގްބަރާގައި ހޮނިހިރު ދުވަހު ވާހަކަފުޅު ދައްކަވަމުން ޕެޒެޝްކިއަން ވިދާޅުވީ، ބޭރުގެ ބާރުތަކުން މަސައްކަތް ކުރީ މަސްލަހަތު ނަގާލައި، ވަކިވަކި ގުރޫޕުތަކަށް ހަތިޔާރު ފޯރުކޮށްދީގެން ފިތުނަ އުފެއްދުމަށް ކަމަށެވެ. އަދި މި ކަމުގެ ތެރެއަށް ކުށެއް ނެތް އާންމުންގެ ބަޔަކު ވައްދައި، މަގުތަކަށް ނެރުނުކަން ވެސް ރައީސް ފާހަގަކުރެއްވި އެވެ.
ޕެޒެޝްކިއަން ވިދާޅުވި ގޮތުގައި، މި ހަމަނުޖެހުންތަކުގެ އަސްލު މަގްސަދަކީ އީރާނު ބައިބައިކޮށްލުމާއި، ރައްޔިތުންގެ މެދުގައި ނަފްރަތާއި ދެކޮޅުވެރިކަން އުފައްދައި، މުޖުތަމައުގެ ތެރޭގައި ފުން ބައިބައިކުރުން އުފެއްދުމެވެ.
އިގްތިސާދީ ދަތިތަކާ ގުޅިގެން ޖެނުއަރީ މަހުގެ 8 އަދި 9 ވަނަ ދުވަހު އާންމުން ކުރަމުންދިޔަ ސުލްހަވެރި މުޒާހަރާތަކުގެ ނާޖާއިޒު ފައިދާ ނަގައި، ބޭރުގެ އެހީތެރިކަން ލިބޭ ހަތިޔާރު އެޅި ހަނގުރާމަވެރިންނާއި ޓެރަރިސްޓުން ވަނީ އެ މުޒާހަރާތައް ހަމަނުޖެހުމަކަށް ބަދަލުކޮށްލާފަ އެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ ފާޅުގައި ހަމަނުޖެހުންތަކަށް ހިތްވަރުދީ، ދައުލަތުގެ މުއައްސަސާތައް ހިފުމަށް ހަތިޔާރު އެޅި ގުރޫޕުތަކަށް ގޮވާލާފަ އެވެ. އަދި އެ ގުރޫޕުތަކާ ދެކޮޅަށް އީރާނުން ފިޔަވަޅު އަޅައިފި ނަމަ، އެ ގައުމާ ދެކޮޅަށް އަސްކަރީ ފިޔަވަޅު އަޅާނެ ކަމުގެ އިންޒާރު ވެސް ޓްރަމްޕް ދެއްވި އެވެ.
އެމެރިކާ އާއި އިޒްރޭލުން ފާޅުގައި ހިތްވަރުދީގެން ހިންގި މި ހަމަނުޖެހުންތަކުގައި އާންމުންގެ މުދަލަށާއި ދައުލަތުގެ ތަންތަނަށް ބޮޑެތި ގެއްލުންތަކެއް ވަނީ ލިބިފަ އެވެ. މިގޮތުން ފިހާރަތަކާއި، ސަރުކާރުގެ އިދާރާތަކާއި، އާންމު ހިދުމަތްދޭ ތަންތަން ސުންނާފަތި ކޮށްފައިވާއިރު، ހާހަކަށްވުރެ ގިނަ އާންމު ރައްޔިތުންނާއި ސަލާމަތީ ބާރުތަކުގެ މީހުން ވަނީ މަރާލާފަ އެވެ.
ރައީސް ޕެޒެޝްކިއަން ފާހަގަކުރެއްވި ގޮތުގައި، އާންމު އިޖުތިމާއީ މުޒާހަރާތަކުގައި މީހުން ހަތިޔާރު ހިފައިގެން ނުކުމެ، ސިފައިން ގަޔަށް ބަޑިޖަހައި މަރައި، އެމްބިއުލަންސްތަކާއި މާރުކޭޓުތަކުގައި ހުޅެއް ނުޖަހާނެ އެވެ.
މުޒާހަރާކުރާ މީހުންގެ އަޑުއަހައި، އެމީހުންގެ ކަންބޮޑުވުންތަކަށް ހައްލު ހޯދައިދިނުމަކީ ސަރުކާރުގެ ޒިންމާއެއް ކަމަށާއި، އެކަމަށް ސަރުކާރު އޮތީ ތައްޔާރަށް ކަމަށް އެމަނިކުފާނު ވިދާޅުވި އެވެ.
ނަމަވެސް، މިއީ ހަމައެކަނި އިޖުތިމާއީ މުޒާހަރާއެއް ނޫންކަން ސާފުވާ ކަމަށާއި، ދުޝްމަނުން މަސައްކަތް ކުރީ ގައުމުގައި ހުރި މައްސަލަތަކުގެ ބޭނުން ހިފައިގެން ހަމަނުޖެހުން އުފައްދައި، މުޖުތަމައު ބައިބައިކުރުމަށް ކަމަށް ރައީސް އިތުރަށް ވިދާޅުވި އެވެ.
ޕެޒެޝްކިއަން ވިދާޅުވީ، އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީގެ އިރުޝާދާއި ހިކުމަތްތެރިކަމުގެ ސަބަބުން، ދުޝްމަނުން ރާވާ މިފަދަ ރޭވުންތައް އަބަދުވެސް ނާކާމިޔާބުވަމުންދާ ކަމަށާއި، ކުރިއަށް އޮތް ތަނުގައި ވެސް އެކަން އޮންނާނީ އެގޮތަށް ކަމަށެވެ.
