އާމްދަނީ ގޮތުގައި ބަލައިގެންފައިވާ އެއް މިލިއަނަށް ވުރެ ގިނަ ފައިސާ ފަބްލިކް ބޭންކް އެކައުންޓަށް ޖަމާކޮށްފައިނުވޭ: ފުވައްމުލަކު ސިޓީި ކައުންސިލް އޮޑިޓް

އާމްދަނީގެ ގޮތުގައި ބަލައިގެންފައިވާ އެއް މިލިއަނަށް ވުރެ ގިނަ ފައިސާ ފަބްލިކް ބޭންކް އެކައުންޓަށް ޖަމާކޮށްފައިނުވާ ކަމަށް ފުވައްމުލައް ސިޓީ ކައުންސިލްގެ އިދާރާ 2023 ވަނަ އަހަރުގެ ކޮމްޕްލަޔަންސް އޮޑިޓް އަދި 2024 ވަނަ އަހަރުގެ މާލީ އޮޑިޓް ރިޕޯޓުގައި ބުނެފި އެވެ.

އޮޑިޓަރ ޖެނަރަލް އޮފީހުން އާއްމުކުރި އެރިޕޯޓުގައި ކައުންސިލްގެ ގިނަ އިހުމާލުގެ މައްސަލަތައް ފާހަގަ ކޮށްފައިވެ އެވެ. 

ރިޕޯޓުގައި ބުނީ، ކުއްޔަށް ދޫކޮށްފައިވާ ބިންތަކުންނާއި، އިމާރާތްތަކުން ގިނަ އަދަދެއްގެ ފައިސާ ނުލިބޭ ކަމަށެވެ. އަދި އެފައިސާ ހޯދުމަށް މަސައްކަތް ކޮށްފައިނުވާ ކަމަށެވެ. 

އެގޮތުން 25 ޑިސެންބަރު 2025 ގެ ނިޔަލަށް ނުލިބި ހުރި ފައިސާގެ ޖުމްލަ 3،639،771 އަރާ ކަަމަށް ރިޕޯޓުގައި ބުނެފައިވެ އެވެ. 

ދައުލަތުގެ އާމްދަނީ ފައިސާގެ ގޮތުގައި ބަލައިގެންފައިވާ ފައިސާ ފަބްލިކް ބޭންކް އެކައުންޓަށް ޖަމާކޮށްފައިނުވާކަން ފާހަގަކޮށް ރިޕޯޓުގައި ބުނީ، ދައުލަތުގެ މާލިއްޔަތުގެ ގާނޫނުގެ 13 ވަނަ މާއްދާގެ ދަށުން ޕަބްލިކް ބޭންކް އެކައުންޓަށް ޖަމާކުރަން ޖެހޭ ފައިސާ ނަމަވެސް ކައުންސިލްގެ އިދާރާއިން 31 ޑިސެންބަރު 2024 ގެ ނިޔަލަށް ދައުލަތުގެ އާމްދަނީގެ ގޮތުގައި ބަލައިގެންފައިވާ 1،040،405 (އެއް މިލިއަން ސާޅީސް ހާސް ހަތަރު ސަތޭކަ ފަހެއް) ރުފިޔާ އޮޑިޓް ކުރެވުނު ތާރީޚު ( 16 ޖޫން 2025) ގެ ނިޔަލަށް ވެސް ޕަބްލިކް ބޭންކް އެކައުންޓަށް ޖަމާކޮށްފައި ނުވާ ކަމަށެވެ. 

މީގެ އިތުރުން ޕާފޯމަންސް ގެރެންޓީގެ ގޮތުގައި ކައުންސިލްގެ އިދާރާއަށް ނަގަން ޖެހޭ 83،998 ރުފިޔާ ނެގުމުގެ ފުރުސަތު ގެއްލިފައިވުމާއި، ސިޓީ ކައުންސިލްގެ ސަރަހައްދުތަކުގެ ތެރޭގައި ހިމެނޭ ބިން ބޭނުންކުރުމާއި ބެހޭ ޕްލޭންއެއް އެކުލަވާލާފައި ނުވުމާއި، ސިވިލް ސަރވިސް ކޮމިޝަނުން އަންގާފައިވާ އެންގުމާ ހިލާފަށް އެޓެންޑެންސް އެލަވަންސް ދީފައިވާ ކަމަށް ރިޕޯޓުގައި ބުނެފައިވެ އެވެ. 

އޮޑިޓް ރިޕޯޓުގައި ޓެލެކޮމިއުނިކޭޝަންގެ ޚިދުމަތްތައް ދިނުމަށް ދޫކޮށްފައިވާ ބިންތަކުން ލިބެން ޖެހޭ ފައިސާ ވެސް ނުލިބޭ ކަމަށް ބުނެފައިވެ އެވެ. 

އެގޮތުން 2005 ވަނަ އަހަރު ފުވައްމުލަކު ފުނާޑު އަވަށުން ޓެލެކޮމިއުނިކޭޝަންގެ ޚިދުމަތްތައް ދިނުމަށް ދޫކޮށްފައިވާ 4312 އަކަފޫޓުގެ ބިމަކާއި، ދިގުވާޑު އަވަށުން 10،295 އަކަފޫޓުގެ ބިމެއް ކުންފުންޏަކަށް މިނިސްޓްރީ އޮފް އެޓޯލްސް ޑިވެލޮޕްމަންޓްއިން ދޫކޮށްފައިވާއިރު، މި ދެ ބިން ދޫކުރުމަށް ވެފައިވާ އެއްބަސްވުންތަކުގެ މުއްދަތު 2020 ވަނަ އަހަރަށް ވަނީ ހަމަވެފަ އެވެ. އެއްބަސްވުން ތައް އާ ކުރުމަށް ފޮނުވުމުން އެފަރާތުން އެއްބަސްވުމުގައި ސޮއިކޮށްފައި ނުވާކަމާއި އެއްބަސްވުންތައް އާ ކުރުމަކާ ނުލައި ވޭތުވެދިޔަ 4 އަހަރު އެ ބިންތައް ބޭނުން ކޮށްފައިވާކަން ރިޕޯޓު ގައި ފާހަގަކޮށްފައިވެ އެވެ. 

2017 ވަނަ އަހަރުން ފެށިގެން މުވައްފުލަކު ހޯދަޑު އަވަށުން 582 އަކަފޫޓުގެ ބިމެއް ޓެލެކޮމިއުނިކޭޝަންގެ ޚިދުމަތްތައް ދިނުމަށްޓަކައި ބޭނުން ކުރަމުން ގޮސްފައިވީ ނަމަވެސް މި ބިން ބޭނުން ކުރަމުން ގޮސްފައިވަނީ އެއްބަސްވުމެއްގައި ސޮއިކުރުމަކާ ނުލައި ކަމާއި، އެފަރާތުން މި ބިންތައް ބޭނުން ކުރަމުން އައިސްފައިވަނީ ކުލި ދެއްކުމަކާ ނުލައި ކަމަށް ކައުންސިލުން މައުލޫމާތު ދިފައިވާ ކަމަށެވެ. 

އެގޮތުން 2024 ވަނަ އަހަރުގެ ނިޔަލަށް މި ތިން ބިމުން ޖުމްލަ 1،044،580 ( އެއް މިލިޔަން ސާޅީސް ހަތަރު ހާސް ފަސްސަތޭކަ އަށްޑިހަ) ރުފިޔާ ކައުންސިލަށް ލިބެންޖެހޭ ފައިސާ ކަމަށް ރިޕޯޓުގައި ބުނެފައިވެ އެވެ. 

އޮޑިޓް ރިޕޯޓުގައި ވަނީ މި ހުރިހާ ކަމެއް އިސްލާހުކޮށް، މާލިއްޔަތު ގަވާއިދާ އެއްގޮތަށް އަމަލު ކުރުމަށް ކައުންސިލަށް އަންގާފަ އެވެ.