ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ފުވައްމުލަކު ސިޓީ އަަށް ވަޑައިގެން، އެ ސިޓީގެ ރައްޔިތުންނާ ބައްދަލު ކުރައްވަން ބޭއްވި ޖަލްސާގައި މޭޔަރު އިސްމާއީލް ރަފީގު އަށް ވާހަކަ ދެއްކުމަށް ފުރުސަތު ނުދީ ފަހު ވަގުތު ކެންސަލް ކުރައްވައިފި އެވެ.

ރައީސް މުޢިއްޒު ފުވައްމުލަކު ސިޓީ އަށް ވަޑައިގެންނެވީ އަންގާރަ ދުވަހުގެ ވަގުތެއްގަ އެވެ. އެ ދަތުރުފުޅުގައި ރައީސް މުޢިއްޒު ވަނީ ފުވައްމުލަކު ސިޓީ ކައުންސިލާއި، އަންހެނުންގެ ތަރައްޤީ އަށް މަސައްކަތް ކުރާ ކޮމެޓީއާ ވެސް ބައްދަލު ކުރައްވައިފަ އެވެ.

އެއަށް ފަހު ފުވައްމުލަކު ސިޓީގެ ރައްޔިތުންނާ ބައްދަލު ކުރަން އަންގާރަ ދުވަހުގެ ރޭ ޖަލްސާއެއް ބޭއްވިއިރު، ޖަލްސާގައި މޭޔަރު ރަފީގު ބައިވެރިވެ ވަޑައިގެންނެވި އެވެ. ނަމަވެސް އެ ޖަލްސާގައި ވާހަކަ ދެއްކުމުގެ ފުރުސަތު ރަފީގު އަށް ދީފައި ނުވެ އެވެ.

އެ ޖަލްސާގައި އެންމެ ފުރަތަމަ ކުރިއަށް ގެންގޮސްފައި ވަނީ، ފުވައްމުލަކު ސިޓީ ގައި ސަރުކާރުން ކުރިއަށް ގެންދިޔުމަށް ނިންމާފައިވާ މަޝްރޫއު ތަކުގެ ސޮއި ކުރުމެވެ. އެ މަޝްރޫއު ތަކުގައި ސޮއި ކޮށްފައި ވަނީ ކަމާ ގުޅުން ހުރި ވުޒާރާ ތަކުގެ ވަޒީރުން އަދި ކުންފުނި ތަކުގެ އިސްވެރިންނެވެ.

އެއަށް ފަހު އެ ޖަލްސާގައި އެންމެ ފުރަތަމަ ވާހަކަ ދައްކަވާފައި ވަނީ ފުވައްމުލަކު ދެކުނު ދާއިރާގެ ޕީއެންސީ އަށް ނިސްބަތްވާ މެމްބަރު އިބްރާހީމް ޙުސެއިން އެވެ. އެއަށް ފަހު، ރައީސް މުޢިއްޒު ވަނީ ޖަލްސާގައި ވާހަކަ ދައްކަވައިފަ އެވެ. އެންމެ ފަހު ބޭފުޅަކަށް އެ ޖަލްސާގައި ވާހަކަ ދައްކަވާފައި ވަނީ ފުވައްމުލަކު މެދު ދާއިރާގެ ޕީއެންސީ އަށް ނިސްބަތްވާ މެމްބަރު އަލީ ފަޒާދު އެވެ.

އެ ޖަލްސާގައި ވާހަކަ ދެއްކުމުގެ ފުރުސަތު މޭޔަރު ރަފީގު އަށް ދީފައި ނުވާއިރު، ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި ޖަލްސާގެ އެޖެންޑާގައި މޭޔަރު ވާހަކަ ދައްކަން ހިމަނާފައިވެ އެވެ. ނަމަވެސް، އެންމެ ފަހު ވަގުތު މޭޔަރު ރަފީގު އަށް އެ ފުރުސަތު ދީފައި ނުވަނީ ޖަލްސާގެ ވަގުތު ސަލާމަތް ކުރުމަށް އުޒުރު ދެއްކުމަށް ފަހު އެވެ.

ރައީސް މުޢިއްޒު ރާއްޖޭގެ އެކި ރަށް ތަކަށް ކުރައްވާ ދަތުރުފުޅުގައި މިހާރަކަށް އައިސް، ސަރުކާރާ އިދިކޮޅު ކައުންސިލް ތަކުގެ ރައީސުން އަދި މެމްބަރުންނަށް ވާހަކަ ދެއްކުމުގެ ފުރުސަތު ނުދެ އެވެ. ނަމަވެސް، ސަރުކާރަށް ނިސްބަތްވާ ކައުންސިލް ތަކުގެ ރައީސުންނަށް އަންނަނީ ބަރާބަރަށް އެ ފުރުސަތު ދެމުންނެވެ.

މިކަން މިހެން ކުރަމުން އަންނަައިރު، ގިނަ ރަށް ތަކުގެ ކައުންސިލްގެ ރައީސުން އަންނަނީ ރައީސް މުޢިއްޒު ރައްޔިތުންނާ ބައްދަލު ކުރާ ޖަލްސާގައި ކަންބޮޑުވުން ފާޅުކޮށް ވާހަކަ ދައްކަމުންނެވެ. އެގޮތުން އެ ރަށް ތަކުގައި ކުރީ ސަރުކާރުން ފަށާފައިވާ މަޝްރޫއުތައް ކުރިއަށް ނުދާތީ އާއި، މި ސަރުކާރުގެ އެއްވެސް ވައުދެއް މިވީ ދެ އަހަރެއްހާ ދުވަހުގެ ތެރޭގައި ފުއްދިފައި ނުވާތީ އެކަމުގެ ކަންބޮޑުވުން ފާޅު ކޮށްފައިވެ އެވެ.

މީގެ އިތުރުން، ރައީސް މުޢިއްޒުގެ ދަތުރުފުޅު ތަކުގައި އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އަށް ނިސްބަތްވާ ކައުންސިލްތަކާ ވެސް ބައްދަލު ނުކުރައްވާ މައްސަލަ ވަނީ ފެންމަތިވެފަ އެވެ. އެގޮތުން ކައުންސިލްތަކާ ބައްދަލު ކުރައްވާ ގޮތަށް ދަތުރުގެ ޕްރޮގްރާމް ރޭވުމަށް ފަހު، ފަހު ވަގުތު އެ ބައްދަލުވުން ކެންސަލް ކުރައްވާ ކަމަށް ކައުންސިލް ތަކުން ފާހަގަ ކޮށްފައިވެ އެވެ.