އޭދަފުށީ ކައުންސިލް އަށް 2024 ވަނަ އަހަރު ލިބެން ޖެހޭ 342،702 ރުފިޔާ ނުލިބޭ, ޒިންމާ ވާ ފަރާތްތަކާއި މެދު ފިޔަވަޅު އަޅަން އޮޑިޓަރ ޖެނެރަލްގެ އޮފީހުން އަންގައިފި

އޭދަފުށީ ކައުންސިލް އަށް 2024 ވަނަ އަހަރު ލިބެން ޖެހޭ 342،702 ރުފިޔާ ނުލިބޭކަން ހާމަވެއްޖެ އެވެ.

ދައުލަތު ގެ މާލިއްޔަތު ގެ ގަވާއިދު ގެ 5.24 ވަނަ މާއްދާގެ (ހ) ގައި ދައުލަތު ގެ އޮފީހަކުން ކުރާ މަސައްކަތަކަށް ނުވަތަ ދޭ ޚިދުމަތަކަށް ނުވަތަ ކުއްޔަށް ދީފައިވާ ތަނެއްގެ ކުއްޔަށް ނުވަތަ ވިއްކި އެއްޗެއްގެ އަގަށް ލިބެން ޖެހޭ ފައިދާ އެކަމެއް ނިމުނުު ދުވަހުން ފެށިގެން ލަސްވެގެން 1 މަސް ދުވަހުގެ ތެރޭގައި ހޯދަން ވާނެ ކަމަށް ބަޔާން ކޮށްފައި ވެ އެވެ. އަދި ލިބެން ޖެހޭ ފައިސާގެ ތެރެއިން ނުލިބި ހުންނަ ފައިސާ ހޯދަން އަޅަން ޖެހޭ ފިޔަވަޅުތައް 5.26 ވަނަ މާއްދާގެ (ހ) ގައި ވަނީ ބަޔާންކޮށްފަ އެވެ.

Raajje.mv

2014 އިން 2022ގެ ނިޔަލަށް އޭދަފުށީ ކައުންސިލަށް އާމްދަނީގެ ގޮތުގައި ލިބުނު ހަ ލައްކަ އަށް ވުރެ ގިނަ ރުފިޔާ ޕަބްލިކް ބޭންކް އެކައުންޓަށް ޖަމާކޮށްފަ އެއް ނުވޭ: އޮޑިޓް ރިޕޯޓް

އެގޮތުން، ކައުންސިލް އިދާރާ އަށް ލިބެން ޖެހޭ ފައިސާގެ ތެރެއިން ނުލިބި ހުރި ފައިސާ ހޯދުމަށް ބައެއް ފަރާތްތަކަށް ސިޓީ ފޮނުވާފައިވާ ކަަމށާއި އަދި ފައިސާ ދެއްކުމަށް ހަނދާން ކޮށްދިނުމުގެ ގޮތުން ބައެއް ފަރާތްތަކަށް ފޯނު މެދުވެރިކޮށް މުއާމަލާތުތައް ކުރެވިފައިވާނެ ކަމަށް ކައުންސިލްގެ އިދާރާއިން މައުލޫމާތު ދީފައިވާ ކަމަށް އޮޑިޓް ރިޕޯޓުގައި ބުނެފައި ވެ އެވެ. ނަމަވެސް ފައިސާ ނުލިބުމުން މާލިއްޔަތު ޤަވާއިދާއި އެއްގޮތަށް ފިޔަވަޅު އެޅުމުގެ މަރުހަލާ ފުރިހަމަ ނުކުރާ ކަމަށް އޮޑިޓް ރިޕޯޓުގައި ފާހަގަކޮށްފައި ވެ އެވެ. 

އެ ކައުންސިލަށް ލިބެން ޖެހޭ ފައިސާގެ ތެރެއިން ބޮޑު ބައެއް ހޭދަކުރަނީ މަލްޓިޕަރޕަސް އިމާރާތުގެ ހޮޓާ ބައިގެ ކުއްޔާއި، ރަޖިސްޓްރީކޮށްފައިވާ ގޭބިސީތަކުގެ ކުނީގެ ފީ، ފިހާރަތަކުގެ ކުނީގެ ފީ، ޕިކަޕް ހޯދުމަށް ކުރާ މަސައްކަތުގެ އެޑްވާންސް އަށް ދީފައިވާ ފައިސާ އެވެ. 

މި ކަންކަން އިސްލާހުކުރުމަށް ލަފާ ދީފައިވާ ގޮތަށް ބަލާ އިރު މާލިއްޔަތު ޤަވާއިދުގެ 5.26 ވަނަ މާއްދާގެ (ހ) އަދި (ށ)ގައި ބަޔާންކޮށްފައިވާ ގޮތަށް އަމަލުކުރުމަށް އެ ކައުންސިލަށް އޮޑިޓަރ ޖެނެރަލްގެ އޮފީހުން ވަނީ އަންގާފަ އެވެ. އަދި ލިބެން ޖެހޭ ފައިސާ ހޯދުމަށް ގަވާއިދާއި އެއްގޮތަށް މަސައްކަތް ނުކުރުމަކީ ދައުލަތުގެ މާލިއްޔަތު ޤަވާއިދުގައި ބަޔާންކުރާ ހުއްދަ ނޫން އަމަލެއް ކަމަށް ބެލެވޭތީ އެކަން ބެލުމަށް ވެސް ވަނީ އަންގާފަ އެވެ. އަދި އެ މައްސަލަ ބެލުމަށް ފަހު އެ ކަމާއި މެދު ޒިންމާ ވާން ޖެހޭ މީހަކު ނުވަތަ ބަޔަކަށް ފިޔަވަޅު އެޅުމަށް ވެސް އޮޑިޓަރ ޖެނެރަލްގެ އޮފީހުން ވަނީ ލަފާދީފަ އެވެ.