ކުޑަފަރީ ކައުންސިލުން ހުއްދަނެތި ދިން ހާޒިރީ އެލަވަންސް އަނބުރާ ހޯދަން އަންގައިފި
ނ. ކުޑަފަރީ ކައުންސިލުން ސިވިލް ސާވިސް ކޮމިޝަނާއި ފިނޭންސް މިނިސްޓްރީގެ އެންގުމާ ހިލާފަށް މުވައްޒަފުންނަށް ހާޒިރީ އެލަވަންސް ދީފައިވާކަން އޮޑިޓް ރިޕޯޓުން ހާމަވެއްޖެ. 2025 މާރޗު މަހުން ފެށިގެން ޖުލައި 7، 2025 ގެ ނިޔަލަށް 59،475 ރުފިޔާ މި އެލަވަންސްގެ ގޮތުގައި ހަރަދުކޮށްފައިވާއިރު މި ފައިސާ އަނބުރާ ދައުލަތަށް ހޯދުމަށް އޮޑިޓް ރިޕޯޓުގައި އަންގާފައިވޭ.
ނ. ކުޑަފަރީ ކައުންސިލާއި ރައީސް މުއިއްޒު ކުރެއްވި ބައްދަލުވުމެއްގެ ތެރެއިން | ރައީސް އޮފީސް
ސިވިލް ސާވިސް ކޮމިޝަނާއި މިނިސްޓްރީ އޮފް ފިނޭންސް އެންޑް ޕްލޭނިންގ ގެ އެންގުމާ ހިލާފަށް ނ. ކުޑަފަރީ ކައުންސިލުން އެ އިދާރާގެ މުވައްޒަފުންނަށް ހާޒިރީ އެލަވަންސް ދީފައިވާކަން އޮޑިޓަރ ޖެނެރަލްގެ އޮފީހުން ނެރުނު ރިޕޯޓުން ހާމަވެއްޖެ އެވެ.
މި ފައިސާ އަލުން އަނބުރާ ދައުލަތަށް ހޯދުމަށް އޮޑިޓް ރިޕޯޓުގައި އަންގާފައިވެ އެވެ.
އޮޑިޓަރ ޖެނެރަލްގެ އޮފީހުން ނެރުނު ނ. ކުޑަފަރީ ކައުންސިލް އިދާރާގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ބުނެފައިވަނީ ކުޑަފަރީ ކައުންސިލްގެ ބައްދަލުވުމަކުން ކައުންސިލް އިދާރާގައި މަސައްކަތްކުރާ އިދާރީ މުވައްޒަފުންނަށް މަސައްކަތަށް ނުކުންނަ ކޮންމެ ދުވަހަކަށް 75 ރުފިޔާ ދިނުމަށް ނިންމާފައިވާކަމުގަ އެވެ.
ނަމަވެސް މި އެލަވަންސް އަކީ ސިވިލް ސާވިސް ގެ މުވައްޒަފުންނަށް ދޭ އެލަވަންސް ގެ ގޮތުގައި ހިމަނާފައިވާ އެލަވަންސް އެއް ނޫންކަމަށާއި ކައުންސިލް އިދާރާ އިން މި އެލަވަންސް ދިނުމުގެ ކުރިން ސިވިލް ސާވިސް ކޮމިޝަނާ މަޝްވަރާ ކޮށްފައިވާކަން ލިޔެކިޔުމުން އެނގެން ނެތްކަން އޮޑިޓް ރިޕޯޓުގައި ފާހަގަކޮށްފައިވެ އެވެ.
އޮޑިޓް ރިޕޯޓުގައި ބުނެފައިވާ ގޮތުގައި ކައުންސިލް އިދާރާއިން މިކަމާ ގުޅޭގޮތުން މިނިސްޓްރީ އޮފް ފިނޭންސް އެންޑް ޕްލޭނިންގ އަށް ލިޔުމުން ކައުންސިލް ގެ އިދާރާ އިން އެދިފައިވާ ގޮތަށް އެޓެންޑެންސް އެލަވަންސް ދިނުމަށް ނުފެންނަކަމަށް މިނިސްޓްރީ އިން އަންގާފައިވާކަން ފާހަގަކޮށްފައިވެ އެވެ.
މިނިސްޓްރީން ހުއްދަ ނުދިން ނަމަވެސް 2025 ވަނަ އަހަރުގެ މާރޗު މަހުން ފެށިގެން ކައުންސިލް އިދާރާ އިން މި އެލަވަންސް ދޭން ފަށާފައިވާކަން ރިޕޯޓުގައިވެ އެވެ. އޮޑިޓް ކުރި ތާރީޚު ކަމަށްވާ 7 ޖުލައި 2025 ގެ ނިޔަލަށް މި އެލަވަންސް ދިނުމަށް 59،475 ރުފިޔާ ހަރަދުކޮށްފައިވާކަން ރިޕޯޓުގައި ފާހަގަކޮށްފައިވެ އެވެ.
ކުޑަފަރީ ކައުންސިލުން މި އެލަވަންސް ދިނުމަކީ ދައުލަތުގެ މާލިއްޔަތު ގަވާއިދުގެ ދަށުން ހުއްދަ ނޫން އަމަލެއްކަމުގައި ބެލެވޭތީ މާލިއްޔަތު ގަވާއިދުގެ 17.03 ވަނަ މާއްދާގައި ބަޔާންކޮށްފައިވާ ފަދައިން މި މައްސަލަ ބެލުމަށްފަހު ފިޔަވަޅު އަޅަންޖެހޭ ފަރާތްތަކާ މެދު ފިޔަވަޅު އެޅުމަށް ރިޕޯޓުގައި ބުނެފައިވެ އެވެ.
އޮޑިޓް ރިޕޯޓުގައި ހުއްދަ ނެތި ހާޒިރީ އެލަވަންސްގެ ގޮތުގައި މިހާތަނަށް ދީފައިވާ ފައިސާ އަނބުރާ ހޯދުމަށް އަންގާފައިވެ އެވެ. އަދި ސިވިލް ސާވިސް ކޮމިޝަނާއި ފިނޭންސް މިނިސްޓްރީއާ މަޝްވަރާކޮށް ނިންމާ ގޮތެއްގެ މަތިން ފައިސާ އަނބުރާ ހޯދުމުގައި އަމަލުކުރުމަށް ލަފާދީފައިވެ އެވެ.
