އޭދަފުށީ ކައުންސިލުން ހުއްދަ ނުހޯދައި އިތުރުގަޑީގެ މަސައްކަތް ކުރުވައި ލިމިޓެއް ނެތި ފައިސާ ދީފައިވޭ: އޮޑިޓް ރިޕޯޓް
ހުއްދަ ނުހޯދައި އިތުރުގަޑީގެ މަސައްކަތް ކުރުވައި ލިމިޓެއް ނެތި ފައިސާ ދީފައިވޭ
އޭދަފުށީ ކައުންސިލުން ހުއްދަ ނުހޯދައި އިތުރުގަޑީގެ މަސައްކަތް ކުރުވައި ލިމިޓެއް ނެތި ފައިސާ ދީފައިވާކަމަށް އޮޑިޓް ރިޕޯޓުގައި ވަނީ ފާހަގަކޮށްފަ
އޭދަފުށީ ކައުންސިލުން ހުއްދަ ނުހޯދައި އިތުރުގަޑީގެ މަސައްކަތް ކުރުވައި ލިމިޓެއް ނެތި ފައިސާ ދީފައިވާކަން އޮޑިޓަރ ޖެނެރަލްގެ ރިޕޯޓުން ހާމަވެއްޖެއެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި 2023 ވަނަ އަހަރު އޭދަފުށީ ކައުންސިލް އިދާރާގެ މުވައްޒަފުންނަށް އިތުރު ގަޑީގެ ފައިސާ ދީފައިވާ ގޮތަށް ބަލާއިރުގައި އިތުރު ގަޑީގެ ފައިސާ ދޭންޖެހޭ ވަރަށް ވުރެ އިތުރަށް އެ އިދާރާގެ މުވައްޒަފަކަށް 1448 ރުފިޔާ ދީފައިވާކަން ވަނީ ފާހަގަކޮށްފަ އެވެ.
އެ މުވައްޒަފުގެ އިތުރު ގަޑީގެ ފައިސާގެ ހިސާބުކުރުމުގައި އިތުރުގަޑީގެ ގޮތުގައި އެ މުވައްޒަފު ރެކޯޑްކުރާ ޝީޓުތަކުގައި މަސައްކަތް ފެށި ގަޑިއާއި މަސައްކަތް ނިންމި ގަޑީގެ ގޮތުގައި ލިޔެފައިވާ ގަޑިތަކަށް ބިނާކޮށް އިތުރު ގަޑީގައި މަސައްކަތް ކުރި ގަޑިތަކުގެ އަދަދު ހިސާބު ނުކޮށް ހަމަ އެކަނި މަސައްކަތް ކުރި ޖުމުލަ ގަޑިއިރުގެ ގޮތުގައި މުވައްޒަފު ލިޔެފައިވާ ޖުމުލަ ގަޑިއިރަށް ބަލައިގެން އިތުރު ގަޑީގެ ފައިސާ ހިސާބުކޮށްފައި ވުމުން 2023 ވަނަ އަހަރުގައި މި މުވައްޒަފުގެ ހަތަރު މަހެއްގެ އިތުރު ގަޑީގެ ފައިސާ ހިސާބުކުރުމުގައި އުނިއިތުރު އައިސްފައިވާކަން އޮޑިޓް ރިޕޯޓުގައި ފާހަގަކޮށްފައި ވެއެވެ.
މީގެ އިތުރުން ބަންދު ދުވަސްތަކުގައި މަސައްކަތް ކޮށްފައިވާ ޖުމުލަ ގަޑިއިރު ރަސްމީ ދުވަސްތަކުގެ ގޮތުގައި ރެކޯޑް ކޮށްފައި ވާއިރު ރަސްމީ ދުވަސްތަކުގައި މަސައްކަތް ކޮށްފައިވާ ގަޑިތަކަށް ބަންދު ދުވަހުގެ ރޭޓުން ފައިސާ ދީފައިވާ ކަމާއި އަދި ބަންދު ދުވަސްތަކުގައި މަސައްކަތް ކޮށްފައިވާ ދުވަސް ތަކަށް ރަސްމީ ދުވަސްތަކުގެ ރޭޓުން އިތުރު ގަޑީގެ ފައިސާ ދީފައި ވުމުން އެ މުވައްޒަފަށް ދޭންޖެހޭ އިތުރު ގަޑީގެ ފައިސާ ހިސާބުކުރުމުގައި އުނިއިތުރު އައިސްފައިވާ ކަން ވެސް ރިޕޯޓުގައި ފާހަގަކޮސްފައި ވެއެވެ.
ރިޕޯޓުގައި ފާހަގަކޮށްފައިވާ ގޮތުގައި މިގޮތަށް ކަންކަމަށް މަގުފަހިވުމަށް މެދުވެރިވެފައި ވަނީ މުވައްޒަފުންގެ އިތުރު ގަޑީގައި މަސައްކަތް ކުރި ވަގުތުތަކުގެ ގޮތުގައި މުވައްޒަފުން ރެކޯޑްކުރާ ލޮގްތައް އެކަށީގެންވާ ވަަރަށް ޗެކް ނުކޮށް އިތުރު ގަޑީގެ ފައިސާ ހިސާބުކޮށްފައި ވުމުންނެވެ.
އޭދަފުށީ ކައުންސިލުން ހުއްދަ ނުހޯދައި އިތުރުގަޑީގެ މަސައްކަތް ކުރުވައި ލިމިޓެއް ނެތި ފައިސާ ދީފައިވާކަން އޮޑިޓަރ ޖެނެރަލްގެ ރިޕޯޓުން ފާހަގަކޮށް މިކަން އިސްލާހުކުރުމަށް ވެސް ރިޕޯޓުގައި ވަނީ ލަފާދީފައެވެ.
އެގޮތުން އިތުރުމަސައްކަތަށް ހުއްދަ ދޭއިރު ހުއްދަދެވެނީ އިތުރު ގަޑީގައި ކުރެވުނު މަސައްކަތައް ތޯ ޔަގީން ކުރުމަށާއި މުސާރަ ޝީޓްތަކުގެ އިތުރު ގަޑީގެ ފައިސާ ހިސާބުކުރާއިރު، ހިސާބުކުރެވެނީ ހުއްދަ ދީފައިވާ އިތުރު ގަޑިއަށްތޯ ޗެކް ކުރުމަށް ވަނީ ލަފާ ދީފައެވެ.
އަދި ދައުލަތުގެ މާލިއްޔަތުގެ ގަވާއިދުގެ 7.15 މާއްދާގެ ހ ގައި ބަޔާންކޮށްފައިވާ ގޮތުގެ މަތިން މުސާރައާއި އެކިއެކި އެލަވަންސާއި، އިތުރު ގަޑީގެ ފައިސާ އާއި މި ނޫންވެސް މުވައްޒަފުންނަށް ދޭންޖެހޭ އެއްވެސް ފައިސާއެއް ދިނުމުގައި ދޭންޖެހޭ ވަރަށް ވުރެ އިތުރަށް ކައުންސިލް އިދާރާއިން ދިން ފައިސާގެ އަދަދު މުވައްޒަފުންގެ އަތުން އަނބުރާ ހޯދުމަށް ވެސް ވަނީ ލަފާ ދީފައެވެ.
