ޓްރަމްޕް: އިނގިރޭސިވިލާތުން ޗައިނާ އާ މުއާމަލާތް ކުރުމަކީ "ނުރައްކާތެރި" ކަމެއް

އިނގިރޭސިވިލާތުގެ ބޮޑުވަޒީރު ކިއަރ ސްޓާމަރ، ޗައިނާގެ ލީޑަރު ޝީ ޖިންޕިން އާ ބައްދަލުކުރައްވައި މަޝްވަރާތައް ބޭއްވުމަށް ބެއިޖިން އަށް ކުރައްވަމުން ގެންދަވާ ދަތުރުފުޅާ ގުޅިގެން، އެމެރިކާގެ ގާތް އެކުވެރި ގައުމެއް ކަމަށްވާ އިނގިރޭސިވިލާތުން ޗައިނާއާ އެކު މުއާމަލާތް ކުރުމަކީ "ވަރަށް ނުރައްކާތެރި" ކަމެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު ވިދާޅުވެއްޖެ އެވެ.

ޓްރަމްޕް މިހެން ވިދާޅުވީ އެމަނިކުފާނުގެ އަނބިކަނބަލުން އަދި ފަސްޓް ލޭޑީ މެލަނިއާ ޓްރަމްޕްގެ ހަޔާތުގެ މައްޗަށް ތައްޔާރުކޮށްފައިވާ ޑޮކިއުމެންޓްރީ އެއް އިފްތިތާހު ކުރުމަށް ބޭއްވި ރަސްމިއްޔާތުގައި ނޫސްވެރިންނާ ވާހަކަދައްކަވަމުންނެވެ.

އިނގިރޭސިވިލާތުން ޗައިނާ އާ އެކު ވިޔަފާރީގެ ގުޅުންތައް ބަދަހިކުރަމުންދާ ދިއުމާ މެދު ނޫސްވެރިން ސުވާލު ކުރުމުން، ރައީސް ޓްރަމްޕް ވިދާޅުވީ އެގޮތަށް އަމަލު ކުރުމަކީ އެ ގައުމަށް އޮތް ވަރަށް ބޮޑު ނުރައްކަލެއް ކަމަށެވެ.

ޓްރަމްޕްގެ މި ވާހަކަތަކާ ގުޅިގެން ހުކުރު ދުވަހު ނޫސްވެރިން ސުވާލު ކުރުމުން، ޗައިނާގެ ފޮރިން މިނިސްޓްރީގެ ތަރުޖަމާނު ގުއޯ ޖިއާކުން ވިދާޅުވީ، ދެ ފަރާތަށް ވެސް ފައިދާވާނެ ފަދަ ގޮތަކަށް ހުރިހާ ގައުމުތަކާ އެކު ވެސް އެއްބާރުލުން އިތުރުކުރުމަށް ޗައިނާ އޮތީ ތައްޔާރަށް ކަމަށެވެ.

ބޮޑުވަޒީރު ސްޓާމަރ ޗައިނާ އަށް ކުރައްވާ މި ދަތުރުފުޅަކީ 2018 ވަނަ އަހަރުގެ ފަހުން އިނގިރޭސި ބޮޑުވަޒީރަކު އެ ގައުމަށް ކުރައްވާ ފުރަތަމަ ދަތުރުފުޅެވެ. މިއީ އެމެރިކާގެ ސިޔާސަތުތަކަށް އަންނަމުންދާ ބަދަލުތަކާ ގުޅިގެން، ހުޅަނގުގެ ގައުމުތަކުގެ ލީޑަރުން ޗައިނާ އާ އެކު އޮތް ގުޅުން އަލުން ބަދަހިކުރުމަށް ކުރައްވަމުންދާ މަސައްކަތްތަކުގެ ތެރެއިން ކުރައްވާ ދަތުރުފުޅެއް ކަމަށް ގިނަ ބަޔަކު ދެކެ އެވެ.

ބުރާސްފަތި ދުވަހު ސްޓާމަރ ވަނީ ޝީ ޖިންޕިން އާއި ޗައިނާ ސަރުކާރުގެ އިސް އޮފިޝަލުންނާ ބައްދަލުކުރައްވައި، އެކި ދާއިރާތަކުން އެއްބާރުލުން ދިނުމުގެ އެއްބަސްވުންތަކެއްގައި ސޮއިކުރައްވާފަ އެވެ.

ކެނެޑާގެ ބޮޑުވަޒީރު މާކް ކާނީ ވެސް މި މަހު ޗައިނާ އަށް ޒިޔާރަތްކުރައްވައި، ވިޔަފާރި އާއި ފަތުރުވެރިކަމުގެ ދާއިރާ އިން އެއްބަސްވުންތަކެއް ގައި ވަނީ ސޮއިކުރައްވާފަ އެވެ.

ކާނީ ޗައިނާ އާ އެކު އިތުރު އެއްބަސްވުންތައް ގާއިމުކުރައްވައިފި ނަމަ، ކެނެޑާ އިން އެމެރިކާ އަށް އެތެރެކުރާ މުދަލުން 100 އިންސައްތައިގެ ޓެރިފް ނަގާނެ ކަމުގެ އިންޒާރު ޓްރަމްޕް ވަނީ ދެއްވާފަ އެވެ. ނަމަވެސް ކެނެޑާގެ ލީޑަރު ވަނީ އިންޒާރު ބަލައިނުގަންނަކަން ހާމަކުރައްވާފަ އެވެ.

އިނގިރޭސިވިލާތާ ބެހޭގޮތުން ބުރާސްފަތި ދުވަހު ވާހަކަދައްކަވަމުން ޓްރަމްޕް އިތުރަށް ވިދާޅުވީ، ކެނެޑާ އިން ޗައިނާ އާ އެކު ވިޔަފާރީގެ މުއާމަލާތް ކުރުމަކީ މާ ނުރައްކާތެރި ކަމެއް ކަމަށެވެ. އަދި ކެނެޑާގެ އިގްތިސާދީ ހާލަތު މިހާރު އޮތީ ވަރަށް ދަށުގައި ކަމަށާއި، އެކަމުގެ ހައްލަކީ ޗައިނާ ކަމަށް ބަލައިގެން ނުވާނެ ކަމަށް ވެސް ޓްރަމްޕް ވިދާޅުވި އެވެ.