އިނގިރޭސިވިލާތުގެ ރައްޔިތުންނަށް ވިސާ އާ ނުލައި ޗައިނާ އަށް ދަތުރުކުރެވޭ ގޮތް ހަދައިފި

އިނގިރޭސިވިލާތުގެ ރައްޔިތުންނަށް ވިސާއާ ނުލައި 30 ދުވަހުގެ މުއްދަތަށް ޗައިނާ އަށް ދަތުރުކުރެވޭ ގޮތަށް އެ ގައުމުން އެއްބަސްވެފައިވާ ކަމަށް ޑައުނިންގް ސްޓްރީޓުން ބުނެފި އެވެ.

މިކަން އިއުލާނުކޮށްފައި ވަނީ އިނގިރޭސި ބޮޑުވަޒީރު ސަރ ކިއަރ ސްޓާމަރ، ޗައިނާގެ ރައީސް ޝީ ޖިންޕިން އާ ބެއިޖިންގައި ބައްދަލުކުރެއްވުމަށްފަހުގަ އެވެ. މިއީ ފާއިތުވި އަށް އަހަރުގެ ތެރޭގައި އިނގިރޭސި ލީޑަރަކު ޗައިނާ އަށް ކުރެއްވި ފުރަތަމަ ދަތުރުފުޅެވެ.

އިނގިރޭސި ސަރުކާރުން މަސައްކަތް ކުރަމުންދަނީ ޗައިނާއާ އެކު އޮންނަ ވިޔަފާރީގެ ގުޅުން ބަދަހިކޮށް، ގައުމުގެ އިގްތިސާދީ ކުރިއެރުމަށް ބާރުވެރިކަން ހޯދުމަށެވެ.

ނަމަވެސް، ގައުމީ ސަލާމަތަށް ހުރި ނުރައްކާތަކާއި ޗައިނާގެ އިންސާނީ ހައްގުތަކުގެ ރެކޯޑަށް ބަލައި، އެ ގައުމާއެކު އޮންނަ ގުޅުމުގައި އިނގިރޭސިވިލާތުން މިއަށްވުރެ ބޮޑަށް ސަމާލުވާންޖެހޭނެ ކަމަށް ބުނެ ބައެއް ފަރާތްތަކުން ދަނީ ފާޑުކިޔަމުންނެވެ.

ވިސާގެ މި އެއްބަސްވުމަށް އަމަލުކުރަން ފަށާނެ ވަކި ތާރީޚެއް އަދި ކަނޑައަޅާފައި ނުވި ނަމަވެސް، ވީ އެންމެ އަވަހަކަށް މި އުސޫލަށް އަމަލުކުރަން ފެށޭނެ ކަމަށް ސަރުކާރުން އުންމީދު ކުރެ އެވެ.

ޑައުނިންގް ސްޓްރީޓުން ބުނި ގޮތުގައި މި ނިންމުމާ އެކު، ފްރާންސް، ޖަރުމަނުވިލާތް، އިޓަލީ، އޮސްޓްރޭލިއާ އަދި ޖަޕާން ހިމެނޭހެން ދުނިޔޭގެ އެހެން 50 ގައުމަކަށް ޗައިނާ އިން ދީފައިވާ ލުއިތަކާ އެއް ހަމައަކަށް އިނގިރޭސިވިލާތް އަންނާނެއެވެ.

ސަރ ކިއަރ ވިދާޅުވީ މި ބަދަލުގެ ސަބަބުން އިނގިރޭސި ކުންފުނިތަކަށް ޗައިނާގައި ވިޔަފާރި ފުޅާކުރުމަށް ފަސޭހަވެގެންދާނެ ކަމަށާއި، އަދި އާންމު ރައްޔިތުންނަށް ޗުއްޓީ ހޭދަކުރުމަށް ވިސާއާ ނުލައި ޗައިނާ އަށް ދަތުރުކުރުމުގެ ފުރުސަތު ލިބިގެންދާނެ ކަމަށެވެ.

"ދުނިޔޭގެ އިގްތިސާދީ ބާރެއްގެ ގޮތުގައި އޮތް ޗައިނާގައި ވިޔަފާރި ފުޅާކުރެވޭނެ މަގުތަކަށް އިނގިރޭސި ކުންފުނިތަކުން ތިބީ ވަރަށް ބޮޑަށް ބޭނުންވެފައި،" ބޮޑުވަޒީރު ވިދާޅުވި އެވެ.

އޭނާ އިތުރަށް ވިދާޅުވީ، ކުރު މުއްދަތުގެ ދަތުރުތަކަށް ވިސާގެ އުސޫލުތައް ލުއިކޮށްދިނުމުން، ކުންފުނިތަކަށް ބޭރު ގައުމުތަކުގައި ފައިތިލަ ސާބިތުކުރުމަށް ފަސޭހަވެ، އޭގެ ސަބަބުން ގައުމުގެ އިގްތިސާދު ކުރިއަރައި ވަޒީފާގެ ފުރުސަތުތައް އިތުރުވެގެންދާނެ ކަމަށެވެ.

ޑައުނިންގް ސްޓްރީޓުން ހާމަކުރި ގޮތުގައި، އިނގިރޭސި ކުންފުނިތަކުން ޗައިނާގައި ވިޔަފާރިކުރުމުގައި ގާނޫނީ ގޮތުން ސާފު އުސޫލުތަކެއް ކަނޑައެޅުމަށްޓަކައި، ޚިދުމަތްތަކާ ބެހޭ އެއްބަސްވުމެއް (ސާވިސަސް އެގްރީމަންޓް) އެކުލަވައިލުމުގެ މަޝްވަރާތައް ކުރިއަށް ގެންދިއުމަށް ދެ ގައުމުން ވަނީ އެއްބަސްވެފަ އެވެ.

އިނގިރޭސިވިލާތަކީ މާލީ، ސިއްހީ އަދި ގާނޫނީ ޚިދުމަތްތައް ހިމެނޭހެން، ދުނިޔޭގައި ދެވަނައަށް އެންމެ ގިނައިން ޚިދުމަތްތައް އެކްސްޕޯޓް ކުރާ ގައުމެވެ. ބޮޑުވަޒީރުގެ އޮފީހުން ބުނީ މި ދާއިރާތަކުން އިނގިރޭސިވިލާތުގެ ޚިދުމަތްތަކަށް ޗައިނާގައި އޮތް ޑިމާންޑް އިތުރުވަމުންދާ ކަމަށެވެ.

މިފަދަ އެއްބަސްވުމެއްގެ ސަބަބުން، އިނގިރޭސިވިލާތުގެ ފަންނީ ސަނަދުތައް ޗައިނާގައި ބަލައިގަތުން ފަދަ ކަންކަން މެދުވެރިކޮށް، ޗައިނާގެ މާކެޓްތަކުން އިނގިރޭސި ވިޔަފާރިތަކަށް ފުރުސަތުތައް ހުޅުވިގެންދާނެ ކަމަށް ސަރުކާރުން ބުނެ އެވެ.

މީގެ އިތުރުން، އިނގިރޭސިވިލާތުން އެކްސްޕޯޓްކުރާ ވިސްކީން ނަގާ އިމްޕޯޓް ޓެކްސް 10 އިންސައްތައިން 5 އިންސައްތައަށް ކުޑަކުރުމަށް ވެސް ޗައިނާއިން އެއްބަސްވެފައިވާ ކަމަށް ޑައުނިންގް ސްޓްރީޓުން ބުންޏެވެ.

މި ދަތުރުފުޅުގެ ތެރެއިން، ބޭސް އުފައްދާ ކުންފުނި އެސްޓްރާޒެނެކާއިން 2030 ވަނަ އަހަރާ ހަމައަށް ޗައިނާގައި 15 ބިލިއަން ޑޮލަރު އިންވެސްޓްކޮށް، އާ ފެކްޓްރީތައް ބިނާކޮށް މުވައްޒަފުން އިތުރު ކުރާނެކަން ވަނީ ހާމަކޮށްފަ އެވެ.

ބެއިޖިންގެ ގްރޭޓް ހޯލް އޮފް ދަ ޕީޕަލްގައި ރައީސް ޝީ އާ އެކު ބޭއްވި ގަޑިއެއްހާއިރުގެ ބައްދަލުވުމަށް ފަހު ސަރ ކިއަރ ވިދާޅުވީ، ޗައިނާ ގައި ހުރި ބޮޑެތި ފުރުސަތުތަކުގެ ފައިދާ އިނގިރޭސި ރައްޔިތުންނަށް ހޯދައިދެވޭނެ ގޮތްތަކާ މެދު ދެ ބޭފުޅުން މަޝްވަރާ ކުރެއްވި ކަމަށެވެ.

އަދި ގަވާއިދާ ޚިލާފަށް ހިޖުރަކުރާ މީހުން ހުއްޓުވުމަށް ކުރާ މަސައްކަތުގައި ވެސް ދެ ގައުމުގެ ދެމެދުގައި ރަނގަޅު ކުރިއެރުންތަކެއް ލިބިފައިވާ ކަމަށް އޭނާ ވިދާޅުވި އެވެ.

ބުރާސްފަތި ދުވަހު ސޮއިކުރި އެއްބަސްވުމެއްގެ ދަށުން، ކަނޑު ހުރަސްކޮށް މީހުން އުފުލުމަށް ކުށްކުރާ ގްރޫޕްތަކުން ބޭނުންކުރާ ކުދި ބޯޓުފަހަރުގެ އިންޖީނާއި ސާމާނު ސަޕްލައިކުރުން ހުއްޓުވުމަށް، އިނގިރޭސިވިލާތާއި ޗައިނާގެ ތަންފީޒީ އިދާރާތަކުން ގުޅިގެން މަސައްކަތް ކުރާނެ އެވެ.

ފާއިތުވި އަހަރު މީހުން ބޭރުކުރުމަށް ބޭނުންކުރި އިންޖީނުތަކުގެ 60 އިންސައްތައަށްވުރެ ގިނަ އިންޖީނަކީ ޗައިނާގައި އުފައްދާފައިވާ އިންޖީނުތައް ކަމަށް ރެކޯޑްތަކުން ދައްކަ އެވެ.

މި އެއްބަސްވުމަކީ އެކްސްޕޯޓް، ތައުލީމު އަދި ކާބޯތަކެތީގެ ރައްކާތެރިކަން ހިމެނޭހެން ދެ ގައުމުގެ ދެމެދުގައި ސޮއިކުރި 10 އެއްބަސްވުމުގެ ތެރެއިން އެއް އެއްބަސްވުމެވެ.

ބޮޑުވަޒީރު ވިދާޅުވީ، ޑިމޮކްރަސީ އަށް ވަކާލާތުކުރާ ޖިމީ ލައި ޖަލަށްލާފައިވާ މައްސަލަ އާއި، ޒިންޖިއާންގް ގައި ދިރިއުޅޭ އުއިގޫރު މުސްލިމުންނާ މެދު އަމަލުކުރާ ގޮތް ފަދަ ހައްސާސް މައްސަލަތައް ވެސް ރައީސް ޝީއާ ހިއްސާކުރެއްވި ކަމަށެވެ.

"މިފަދަ ގުޅުންތައް ބޭއްވުމުގެ ބޭނުމަކީ ލިބެން ހުރި ފުރުސަތުތަކުގެ ބޭނުން ހިފުމާއެކު، އަޅުގަނޑުމެންގެ މެދުގައި ޚިޔާލުތަފާތުވުން ހުރި ކަންކަމުގައި ވެސް ފުޅާ ދާއިރާއެއްގައި މަޝްވަރާކުރުން،" ބޮޑުވަޒީރު އިތުރަށް ވިދާޅުވި އެވެ.

ސަރ ކިއަރ ބެއިޖިން އަށް ވަޑައިގެންނެވީ އިނގިރޭސިވިލާތުގެ ވިޔަފާރިވެރިންނާއި ސަގާފީ ދާއިރާގެ އިސް ބޭފުޅުންގެ ވަފުދަކާއެކުގަ އެވެ.

ރައީސް ޝީ އާ އެކު ބޭއްވި ބައްދަލުވުމުގެ ފެށުމުގައި ބޮޑުވަޒީރު ވިދާޅުވީ، ޗައިނާ އާ އެކު މި އަށްވުރެ "ހަރުދަނާ އަދި ފުން" ގުޅުމެއް ބާއްވަން ބޭނުންފުޅުވާ ކަމަށެވެ.

މި ގުޅުމުގެ ސަބަބުން އިނގިރޭސި ރައްޔިތުންނަށް ކުރާނެ ފައިދާތަކަށް ބާރުއަޅުއްވަމުން އޭނާ ވިދާޅުވީ، ބޭރު ގައުމުތަކުގައި ހިނގާ ކަންކަމުގެ އަސަރު، ފިހާރަތަކުގެ ހަރުތަކުގައި ހުންނަ ތަކެތީގެ އަގުން ފެށިގެން ގައުމުގެ ސަލާމަތާ ހަމައަށް ފޯރާ ކަމަށެވެ.

މި ބައްދަލުވުމުގައި ރައީސް ޝީ ވިދާޅުވީ، އިނގިރޭސިވިލާތާއި ޗައިނާގެ ގުޅުމަށް މީގެ ކުރިން ކުރިމަތިވި ހުރަސްތަކަކީ ދެ ގައުމުގެ މަސްލަހަތަށް ވެސް އޮތް ގެއްލުމެއް ކަމަށެވެ.

އަދި ދުނިޔޭގެ މަސްރަހު ހަލަބޮލިވެފައިވާ މި ދަނޑިވަޅުގައި، ދެ ގައުމުގެ ދެމެދުގައި އޮންނަ މަޝްވަރާތަކަކީ "ކޮންމެހެން ބޭނުންތެރި" ކަމެއް ކަމަށް އޭނާ ވިދާޅުވިއެވެ.

މީގެ ކުރިން އޮތް ލޭބަރ ސަރުކާރުތަކުން ދެ ގައުމުގެ ގުޅުން ބަދަހިކުރުމަށް ކޮށްފައިވާ މަސައްކަތްތަކަށް ރައީސް ޝީ ތައުރީފު ކުރެއްވިއެވެ. އަދި ޚިޔާލުތަފާތުވުންތަކަށްވުރެ ބޮޑަށް ގުޅުން އިސްކޮށްފިނަމަ، ދެ ބޭފުޅުންގެ މަސައްކަތް ތާރީޚުގައި ފާހަގަކުރެވޭނެ ކަމަށް ސަރ ކިއަރއަށް ވިދާޅުވިއެވެ.

ބައްދަލުވުމަށްފަހު، ހަދިޔާއެއްގެ ގޮތުން ސަރ ކިއަރ ވަނީ މިދިޔަ ހަފުތާ ބަންދުގައި މެންޗެސްޓަރ ޔުނައިޓެޑާއި އާސެނަލް ކުޅުނު ޕްރިމިއަރ ލީގު މެޗުގައި ބޭނުންކުރި ފުޓުބޯޅަ އެއް ރައީސް ޝީ އަށް އަރުވާފަ އެވެ.

ބޮޑުވަޒީރަކީ އާސެނަލްގެ ސަޕޯޓަރެކެވެ. ރައީސް ޝީއަކީ މެންޗެސްޓަރ ޔުނައިޓެޑަށް ސަޕޯޓްކުރައްވާ ބޭފުޅެއް ކަމަށް ރިޕޯޓްތައް ބުނެ އެވެ.

ރައީސް ޝީ ވަނީ ސަރ ކިއަރ އަށް ލޮއިން ހަދާފައިވާ އަހެއްގެ ބުދެއް ހަދިޔާކުރައްވާފަ އެވެ. 

މި ދަތުރުފުޅު މި ކުރެއްވީ، ޗައިނާ އާ އެކު "ސްޓްރެޓީޖިކް ޕާޓްނަރޝިޕް" އެއްގައި ސޮއިކުރުމާ ގުޅިގެން ކެނެޑާ އިން އެތެރެކުރާ މުދަލުން 100 އިންސައްތައިގެ ޓެރިފް ނަގާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވާފައިވާ، ވިޔަފާރީގެ ނުތަނަވަސްކަން ބޮޑުވެފައިވާ ދަނޑިވަޅެއްގަ އެވެ.

އިދިކޮޅު ޕާޓީތަކުން ވަނީ މި ދަތުރުފުޅަށް ފާޑުކިޔާފަ އެވެ. ކޮންޒަވޭޓިވް ޕާޓީގެ ލީޑަރު ކެމީ ބޭޑެނޮކް ވިދާޅުވީ އޭނާ ބޮޑުވަޒީރުކަމުގައި ހުންނެވި ނަމަ މި ދަނޑިވަޅުގައި ޗައިނާ އަށް ވަޑައިނުގަންނަވާނެ ކަމަށެވެ.

އޭނާ ވިދާޅުވީ އިނގިރޭސިވިލާތުން ވާހަކަ ދައްކަން ޖެހޭނީ ގައުމުގެ މަސްލަހަތާ އެއްގޮތަށް މަސައްކަތް ކުރާ ގައުމުތަކާ ކަމަށާއި، އިނގިރޭސި އިގްތިސާދަށް ގެއްލުންދޭން މަސައްކަތްކުރާ ގައުމަކާ ނޫން ކަމަށެވެ.

ލިބަރަލް ޑިމޮކްރެޓްސްގެ ފޮރިން އެފެއާޒް ތަރުޖަމާނު ކެލަމް މިލަރ ވިދާޅުވީ، ސަރ ކިއަރގެ މި ސިޔާސަތަކީ ހުރިހާ އެއްޗެއް ދޫކޮށްލައި، ބަދަލުގައި އެއްވެސް ކަމެއް ހާސިލުނުވާ ސިޔާސަތެއް ކަމަށެވެ.

"އިނގިރޭސި ކުންފުނިތަކާއި ޔުނިވަރސިޓީތަކުން ޗައިނާގެ ވިޔަފާރި ބޭނުންވޭ. އެކަމަކު އިނގިރޭސި ރައްޔިތުން ބޭނުންވަނީ ބޮޑުވަޒީރަކީ ގައުމީ ސަލާމަތަށް އިސްކަންދޭ ބޭފުޅެއްކަން ޔަގީންކުރަން،" އޭނާ ވިދާޅުވި އެވެ.