ރައީސް މުއިއްޒު ގެ ދަތުރުފުޅާ ދިމާކޮށް އަވަސް އަރުވާލާފަ މިސްކިތް ތަޅާލިޔަސް، އެތަނުގައި އަޅާ އިސްލާމިކް ސެންޓަރު ގެ މަސައްކަތް ހުއްޓިފައި: މިލަންދޫ ކައުންސިލް
ށ. ފޯކައިދޫ ގައި ވެސް މީހުން ނަމާދުކުރަމުން ދިޔަ މިސްކިތެއް ވަނީ ރައީސް މުއިއްޒުގެ ދަތުރުފުޅާ ދިމާކޮށް އަވަސްއަރުވާއިގެން ތަޅާލުމަށްފަހު އެތަނުގައި އިސްލާމިކް ސެންޓަރެއްގެ ބިންގާ އަޅާފައި ނަމަވެސް އެ މަސައްކަތް ވެސް ވަނީ ހުއްޓިފައި.
ށ. މިލަންދޫ އިސްލާމިކް ސެންޓަރު ގެ މަސައްކަތް އެކަށީގެންވާ ގޮތަކަށް ކުރިޔަށް ނުދާ ކަމުގެ ކަންބޮޑުވުން އެރަށު ރައްޔިތުން ފާހަގަ ކުރޭ. | ރާއްޖެ އެމްވީ
ރައީސް މުއިއްޒު ށ. މިލަންދޫ އަށް ކުރެއްވި ދަތުރުފުޅާ ދިމާކޮށް ށ. މިލަންދޫ ގައި އެއާކޮންޑިޝަން ކޮށް ހަދާފައިވާ މިސްކިތް އަވަސް އަރުވާލައިގެން ތަޅާލުމަށްފަހު، ބިންގާ އެޅި އިސްލާމިކް ސެންޓަރުގެ މަސައްކަތް އެކަށީގެންވާ ގޮތަށް ކުރިޔަށް ނުދާ ކަމަށާއި މަސައްކަތް ގާތް ގަނޑަކަށް ހުއްޓިފަ ވާކަމަށް މިލަންދޫ ކައުންސިލުން ބުނެފި އެވެ.
އިސްލާމިކް ސެންޓަރު ގެ މަސައްކަތާ ގުޅޭގޮތުން ރާއްޖެ އެމްވީ އަށް މައުލޫމާތު ދެއްވަމުން މިލަންދޫ ކައުންސިލްގެ މެމްބަރު އަޙްމަދު ޝިޔާމް ވިދާޅުވީ ރައީސް މުއިއްޒުގެ ދަތުރުފުޅާ ދިމާކޮށް ބިންގާ އިސްލާމިކް ސެންޓަރު ގެ ބިންގާ އަޅަން ވެގެން ކުރިން ހުރި މިސްކިތް 24 ގަޑި އިރު ތެރޭ ތަޅާލާ ތަން ސާފުކޮށްފައި ވާކަމަށެވެ. ނަމަވެސް އަވަސް އަރުވާލާފަ މިސްކިތް ތަޅާލިޔަސް، މަސައްކަތް ކުރިޔަށް ދާގޮތުން އިސްލާމިކް ސެންޓަރުގެ މސައްކަތް ސަރުކާރުން ބުނާ މުއްދަތުގެ ތެރޭ ނިންމާނެ ކަމުގެ އެއްވެސް އުއްމީދެއް ނެތް ކަމަށެވެ.
މތަން މިހާރު އެމްޓީސީސީ އާއި ހަވާލުކޮށްފަ މި އޮތީ، މިތަނަކީ ކުރިން ނަމާދު ކޮށްކޮށް ހުރި ވަރަށް ރީތި މިސްކިތެއް. މިތަނުގަ ހަމަ ނަމާދުކޮށްކޮށް ހުއްޓަ މިސްކިތް މިވަނީ ތަޅާލާފަ އިސްލާމިކް ސެންޓަރެއް އަޅަންށޭ ކިޔާފަ. ބިންގާ އަޅާ ރަސްމިއްޔާތަށް މުޅި ތަން ސާފުކޮށް ނިންމާފަ. 24 ގަޑި އިރުތެރޭ މުޅި ތަން ސާފު ކޮށްލާފާ އޮތީ، ރީއްޗަށް އޭސީ ކޮށް ހަދާފަ އިން މިސްކިތެއް. ރައީސް ވަޑައިގެން ބިންގާ އަޅުއްވަން ވެގެން ކޮށްފަހުރި މަސައްކަތް މިއީ. މިތަނުގެ މަސައްކަތް ކީކޭ ބުނާނީ. މުޅިން ހުއްޓިފައޭ ބުންޔަސް މައްސަލައެއް ނެތް. މި ފެންނަ މަންޒަރަކުން ހިޔެއް ނުވޭ ސަރުކާރުން އެބުނާ މުއްދަތު ތެރޭ މިތަން ނިމޭނެ ހެނެއް.ށ. މިލަންދޫ ކައުންސިލްގެ މެމްބަރު އަޙްމަދު ޝިޔާމް
މިލަންދޫ ގެ އިތުރުން ށ. ފޯކައިދޫ ގައި ވެސް މީހުން ނަމާދު ކުރަމުން ދިޔަ މިސްކިތެއް ވަނީ ރައީސް މުއިއްޒުގެ ދަތުރުފުޅާ ދިމާކޮށް އަވަސްއަރުވާއިގެން ތަޅާލުމަށްފަހު އެތަނުގައި އިސްލާމިކް ސެންޓަރެއްގެ ބިންގާ އަޅާފަ އެވެ. މިސްކިތް ތަޅާލުމަށް ފަހު އޭރު އެރަށު ރައްޔިތުން ނަމާދުކަން ވަގުތީގޮތުން އެރަށު ސްކޫލަށް ވަނީ ބަދަލުކޮށްފަ އެވެ.
ފޯކައިދޫ އިސްލާމީ މަރުކަޒުގެ މަސައްކަތް ހަވާލުކުރިތާ 10 މަސް ދުވަސް ވީ އިރުވެސް މަސައްކަތް ކުރިޔަށް ނުދާ ކަން އެރަށު ކައުންސިލުން ވެސް ވަނީ ފާހަގަކޮށްފަ އެވެ.
ރައީސް މުއިއްޒު ވެރިކަމާ ހަވާލުވިފަހުން ރަށްރަށުގައި ތަރައްގީގެ މަޝްރޫޢެއް އެކަށީގެންވާ ގޮތަކަށް ކުރިޔަށް ނުދާ ކަމުގެ ކަންބޮޑުވުން ގިނަ އަދަދެއްގެ ރަށުކައުންސިލުން ދަނީ ފާޅުކުރަމުންނެވެ.
