މިނިސްޓަރ ޝިޔާމް ވަނީ ބޮޑުކަންނެލި ގަންނަ ކުންފުނި ތަކުގެ ދަށުވެފަ؛ ބޭނުމަކީ ބޮޑު ކަންނެލި މަސްވެރިން މަގުމަތިކޮށް ލޭނުގެ މަސްވެރިކަމަށް ހުއްދަ ދިނުން: އިމްރާން

ފިޝަރީޒް މިނިސްޓަރު އަހުމަދު ޝިޔާމް ވަނީ ބޮޑުކަންނެލި ގަންނަ ކުންފުނިތަކުގެ ދަށުވެފައި ކަމަށާއި އެބޭފުޅާގެ ބޭނުމަކީ ބޮޑުކަންނެލި މަސްވެރިން މަގުމަތިކޮށް ލޭނުގެ މަސްވެރިކަމަށް ހުއްދަ ދިނުން ކަމަށް ބޮޑުކަންނެލި މަސްވެރިންގެ ޔޫނިއަން (ބީކޭއެމްޔޫ) ގެ ނައިބު ރައީސް އަދި ގައުމީ ޓީމުގެ ކުރީގެ ގޯލްކީޕަރު އިމްރާން މުހައްމަދު ވިދާޅުވެއްޖެ އެވެ.

ބޮޑުކަންނެލި މަސްވެރިންގެ ފަރާތުން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އިމްރާން ވިދާޅުވީ ޝިޔާމް މަސައްކަތް ކުރައްވަނީ ބޮޑުކަންނެލި މަސްވެރިކަން އެއްކޮށް ހަލާކުކޮށްލުމަށްފަހު ލޭނުގެ މަސްވެރިކަމަށް ފުރުސަތު ދެއްވަން ކަމަށެވެ.

ބޮޑުކަންނެލި މަސްވެރިން މަގުމަތިކޮށްފައި ލޭނުގެ މަސްވެރިކަމަށް ހުއްދަ ދިނުމުގެ މަސައްކަތް ޝިޔާމް އިސްވެ ހުރެގެން ފެއްޓެވީ، ބޮޑުކަންނެލި ގަންނަ ޕްރައިވެޓް ކުންފުނިތަކާ ގުޅިގެން ކަމަށް އިމްރާން ވިދާޅުވި އެވެ.

މީގަ މި ވާގޮތަކީ މިނިސްޓަރު ޝިޔާމް އެ ހުންނެވީ ބޮޑުކަންނެލި ގަންނަ ކުންފުނި ތަކުގެ ދަށުވެފަ، މިއީ ހަގީގަތަކީ، ބޮޑުކަންނެލި ގަންނަ ޕްރައިވެޓް ކުންފުނި ތަކުގެ ދަށުވެގެން ޝިޔާމް ފެއްޓެވި މަސައްކަތަކީ ބޮޑު ކަންނެލި މަސްވެރިން މަގުމަތިކޮށްފަ ލޭނުގެ މަސްވެރިކަމަށް ހުއްދަ ދިނުން. ލޭނުގެ މަސްވެރިކަމަށް ހުއްދަ ދޭން ބޮޑުކަންނެލި މަސްވެރިން މަގުމަތިކޮށްފަ ފެށީ މިނިސްޓަރު ޝިޔާމް އިސްވެ ހުރެގެން ޕްރައިވެޓް ބޮޑުކަންނެލި ގަންނަ ކުންފުނިތަކާ ގުޅިގެން. 

 ބޮޑު ކަންނެލި މަސްވެރިންގެ ޔޫނިއަން ގެ ނައިބު ރައީސް އިމްރާން މުހައްމަދު

އެކަން ކުރުމަށް މިނިސްޓަރު ނިންމާފައި އޮއްވައި ރައީސް މުއިއްޒު އެ ނިންމުން ބާތިލު ކުރުމަކީ، ޝިޔާމް އެކަމުގެ ރުޅި ބޮޑުކަންނެލި މަސްވެރިންނަށް ބާލަން ޖެހޭ ސަބަބެއް ނޫން ކަމަށް އިމްރާން ވިދާޅުވި އެވެ. ޝިޔާމް އާއި ރައީސް މުއިއްޒު އާ ދޭތެރޭ ޖެހިގެން އުޅޭ މައްސަލަ އެއްގެ ހަސަދަވެރިކަން މަސްވެރިންނަށް ބޭލުމަކީ އެއްވެސް ވަރަކަށް ބަލައިގަނެވޭނެ ކަމެއް ނޫން ކަމަށް އިމްރާން ވިދާޅުވި އެވެ.

ޝިޔާމް މިހާރުވެސް މަސައްކަތް ކުރައްވަނީ ބޮޑުކަންނެލި މަސްވެރިންނަށް ގޮތް ހުސްކުރުވާ ލޭނުގެ މަސްވެރިކަމަށް ހުއްދަ ދިނުމަށް ކަމަށާއި ކޮންމެ ގޮތެއް ހަދާފައި ވެސް އެކަން ކުރާނެ ކަމަށް ޝިޔާމް ވިދާޅުވެފައިވާ ކަމަށް އިމްރާން ވިދާޅުވި އެވެ. އެގޮތުން މީގެ ކުރިން 300 އަށް ވުރެ ގިނަ އޮޑިފަހަރު ބޮޑުކަންނެލީގެ މަސްވެރިކަމުގައި ހަރަކާތްތެރި ވަމުން ދިޔަ ކަމަށާއި ނަމަވެސް މިހާރު މި ދާއިރާގައި ހަރަކާތްތެރިވާ އޮޑިފަހަރުގެ އަދަދު 100 އަށް ވެސް ނާރާ ކަމަށް އިމްރާން ވިދާޅުވި އެވެ. މިއީ ޝިޔާމް ކުރައްވާ ވަރަށް ނާތަހުޒީބު އަމަލެއް ކަމަށް އިމްރާން ވިދާޅުވި އެވެ.

ބޮޑުކަންނެލި މަސްވެރިންނަށް މި ސަރުކާރުން ވީ ވައުދުތައް ފުއްދައިދިނުމަށް ގޮވާލާ މަސްވެރިން އިހުތިޖާޖަށް ނުކުތީ މިދިޔަ ބުދަ ދުވަހު އެވެ. އިހުތިޖާޖުގެ ބައިވެރިންގެ ޑިމާންޑުތަކަށް ސަރުކާރުން އިޖާބަނުދިނުމުން މަސްވެރިން ވަނީ މާލެ ކައިރިއަށް ގޮސް ވެސް އަޑު އުފުލާފަ އެވެ.

އިހުތިޖާޖުގައި މަސްވެރިން ސަރުކާރަށް ތިން ޑިމާންޑެއް ކުރެ އެވެ. އެއީ ރައީސް މުއިއްޒުގެ ރިޔާސީ ވައުދުފުޅާ އެއްގޮތަށް ސަރުކާރުން ކަންނެލި ގަންނަން ފެށުމާއި ކަންނެލީގެ އަގު 80 ރުފިޔާ އާއި 100 ރުފިޔާ އާ ދެމެދު ހިފެހެއްޓުމާއި ބޭސް ރޭޓުގައި ތެލާއި އައިސް ލިބޭނެ ގޮތް ހެދުމެވެ.

ރައީސް މުއިއްޒުގެ އެންގެވުމަށް ފުލުހުން ވަނީ އިހުތިޖާޖުގެ ބައެއް ބައިވެރިން ހައްޔަރުކޮށް، ބައެއް ދޯނިތައް ވެސް ފުލުހުންގެ ބެލުމުގެ ދަށަށް ގެންގޮސްފަ އެވެ. ނަމަވެސް އިހުތިޖާޖުގެ ބައިވެރިން ބުނަމުން ދަނީ ސަރުކާރުގެ ފަރާތުން އެދެވޭ ޖަވާބެއް ނުދެއްވަނީސް އިހުތިޖާޖު ހުއްޓާނުލާނެ ކަމަށެވެ.