2 އަހަރުވި އިރު ވެސް ބޮޑުކަންނެލި މަސްވެރިންގެ ކަންބޮޑުވުންތައް ހައްލު ނުވާކަމަށް ފިޝަރީޒް މިނިސްޓަރު އެއްބަސްވެއްޖެ

2 އަހަރުވި އިރު ވެސް ބޮޑުކަންނެލި މަސްވެރިންގެ ކަންބޮޑުވުންތައް ހައްލު ނުވާކަމަށް ފިޝަރީޒް މިނިސްޓަރު އަހުމަދު ޝިޔާމް އެއްބަސްވެވަޑައިގެންފި އެވެ.

10 ޑިސެމްބަރުގައި ފާހަގަކުރާ މަސްވެރިންގެ ދުވަހާއި ގުޅިގެން ބޮޑުކަންނެލި މަސްވެރިން ވަނީ ކަނޑުމަތީގައި އިހިތިޖާޖު ފަށާފަ އެވެ. 49 ދޯންޏާއެކު ފެށި އިހުތިޖާޖުގައި ބޮޑުކަންނެލި މަސްވެރިން ޑިމާންޑް ކުރަމުން އަންނަނީ މި ސަރުކާރުން އެ މަސްވެރިންނަށް ވި ވައުދުތައް ފުއްދައިދިނުމަށާއި މަސްވެރިންގެ ޑިމާންޑްތައް ފުރިހަމަ ކޮށްދިނުމަށެވެ.

Advertisement

ފިޝަރީޒް މިނިސްޓަރު އަހުމަދު ޝިޔާމް އެކްސްގައި ކުރި ޕޯސްޓެއްގައި ވިދާޅުވީ ބޮޑު ކަންނެލި މަސްވެރިންގެ އެންމެ ބޮޑު ކަންބޮޑުވުމަކީ ބޮޑު ކަންނެލި ގަންނަ ކުންފުނިތަކަށް ވިއްކާފައި ހުރި ކަންނެއްޔަށް ފައިސާ ނުލިބި ދިގުލައިގެންދާ މައްސަލަ އާއި މަސްވެރިކަން ރަނގަޅުވާ ވަގުތު ކަންނެލީގެ އަގު ދަށްވާ މައްސަލަ ކަމަށެވެ.

މިނިސްޓަރު ވިދާޅުވީ މިކަން ހައްލުކުރުމަށް ބޮޑުކަންނެލި މަސްވެރިން ޕްރޮޕޯސް ކުރަނީ ސަރުކާރުން މިކަމަށް ސަރުކާރުން ވަދެ ކަންނެލި މަހުގެ ވިޔަފާރީގައި ސަރުކާރުގެ ދައުރު ފުޅާ ކުުރުމަށް ކަމަށެވެ. އަދި ސަރުކާރުން ބޮޑު ކަންނެލި މަސްވެރިންނަށް ވެފައިވާ ވައުދު ވީހާވެސް އަވަހަށް ތަންފީޒު ކުރުމަށް ވެސް މަސްވެރިން ޕްރޮޕޯސް ކުރާ ކަމަށެވެ.

މިނިސްޓަރު ވިދާޅުވީ ސަރުކާރުން ދަނީ ހުޅުމާލޭގައި ބޮޑު ކަންނެލި މަސް ޕްރޮސެސް ކުރުމަށް ގާއިމްކުރާ ފެސިލިޓީގެ އަމަލީ މަސައްކަތް ޖެނުއަރީ މަސްތެރޭ ފެށުމަށް ވާންޖެހޭ ހުރިހަ ތައްޔާރީތަކެއް ވަމުން ކަމަށެވެ. އަދި މިދިޔަ އަހަރު ޖޫން މަހުން ފެށިގެން ކަންނެލި މަސްވެރިން އެންމެ ބޮޑަށް އެދެމުން ދިޔަ ގޮތަށް ރައީސް ގެ ހާއްސަ އިރުޝާދުފުޅާ އެކު މާލެ އޭރިއާ އިން ވަނީ ތެލަށް ހެޔޮ ބަދަލެއް ގެނެވި ބޭސް ރޭޓުގައި ތެޔޮ ފޯރުކޮށްދިނުމުގެ އިންތިޒާމް އެސްޓީއޯ މެދުވެރިކޮށް ހަމަޖައްސާފައި ކަމަށެވެ.

މިނިސްޓަރު ވިދާޅުވީ ރާއްޖޭގެ ކޮންމެ އަތޮޅަކުން މަޑުވެގެން 1 ރަށުން އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ އިންތިޒާމު ވެސް އަންނަ އަހަރުގެ މާޗް މަހުގެ ނިޔަލަށް ހަމަޖެހޭނެ ކަމުގެ އުފާވެރި ހަބަރު ވެސް މީގެ ކުރިން ވެސް ރައީސް ވަނީ އެކި ރަސްމިއްޔާތުތަކުގައި ހިއްސާ ކުރައްވާފައި ކަމަށެވެ. އަދިވެސް ސިނާއަތުގެ ތަރައްގީ އަށް ގިނަ ކަންކަން ހުރިކަމަށް މިނިސްޓަރު ވިދާޅުވި އެވެ.

ކުރިއަށް އޮތީ މަސްވެރި އާއިލާތަކަށް އުފާވެރި ދުވަސްތަކެއް ކަމަށާއި، މި ސަރުކާރަކީ ރާއްޖޭގެ ހުރިހާ ބާވަތެއްގެ މަސްވެރިންގެ ހުރި ކަންބޮޑުވުންތަކަށް މައުނަވީ ހައްލެއް ހީދައިދޭނެ ސަރުކާރުކަން ޔަގީން ކަމަށެވެ.

މުއިއްޒު ވެރިކަމަށް ވަޑައިގެންނެވީ ބޮޑު ކަންނެލީގެ އަގު 80ރ އާއި 100ރ އާ ދެމެދު ހިފައްހައްޓާނެ ކަމަށާއި، މިފްކޯ އަށް ބޮޑު ކަންނެލި ކިރޭނެ އިންތިޒާމު ހަމަޖައްސާނެ ކަމަށާއި، އަދި ހެޔޮ އަގުގައި މަސްވެރިންނަށް ތެޔޮ ލިބޭނެ އިންތިޒާމު ހަމަޖައްސާނެ ކަމުގެ ވައުދާ އެކުގައެވެ. ސަރުކާރަށް ދެ އަހަރު ފުރި 3 ވަނަ އަހަރުގެ ދުވަސްތައް ގުނަމުންދާ އިރު މިއިން އެެއްވެސް ކަމެއް ފުރިހަމަވެފައެއް ނުވެއެވެ.