އިނގިރޭސިވިލާތުގައި ސްކޫލް ނިމޭ ދަރިވަރުންނަށް، "ގޭޕް އިޔަރ"ގެ ނަމުގައި އަސްކަރީ ސްކީމެއް ފަށަނީ

އިނގިރޭސިވިލާތުގައި ސްކޫލް އާއި ކޮލެޖު ނިންމާ ދަރިވަރުންނަށް އަމާޒު ކޮށްގެން އަސްކަރީ، ރޯޔަލް ނޭވީ އަދި އާރުއޭއެފްގެ ތަޖުރިބާ ލިބިގަތުމަށް "ގޭޕް އިޔަރ"ގެ ނަމުގައި ސްކީމެއް ފަށަން ނިންމައިފި އެވެ.

އެކަން ހާމަ ކޮށްފައި ވަނީ އިނގިރޭސިވިލާތުގެ ޑިފެންސް މިނިސްޓްރީ އިންނެވެ. އެ މިނިސްޓްރީ އިން ހާމަ ކޮށްފައިވާ ގޮތުގައި، މި ސްކީމަކީ ދިގު މުއްދަތަކަށް ބައިވެރިވުމުގެ ޒިންމާއެއް ނެތި، ސިފައިންގެ ތަޖުރިބާ ލިބޭނެ ފުރުސަތެކެވެ. 

އެގޮތުން މި ޕްރޮގްރާމް އަކީ އުމުރުން 25 އަހަރުން ދަށުގެ ޒުވާނުންނަށް ޚާއްސަކޮށްގެން ހިންގާ 12 މަސް ދުވަހުގެ ކޯހެކެވެ. މިއީ ސިފައިންގެ ދާއިރާގައި ދިގު މުއްދަތަކަށް މީހުން ހޯދުމުގައި ހުރި ދަތިތަކާއި، މީހުން ހިފެހެއްޓުމުގެ މައްސަލަ އަށް ހައްލު ހޯދުމުގެ މަޤުސަދުގައި ކުރިއަށް ގެންދާ ކޯހެކެވެ. 

މި ކޯހުގައި ބައިވެރިވުމަށް ފުރުސަތު ހުޅުވާލުމަށް ހަމަޖެހިފައި ވަނީ 2026 ވަނަ އަހަރުގެ ކުރީ ކޮޅު ކަމަށްވާއިރު، ފުރަތަމަ ބެޗުގައި 150 ފަރާތަކަށް ފުރުސަތު ދިނުމަށް ވަނީ ހަމަޖެހިފަ އެވެ. އިނގިރޭސިވިލާތުގެ ސަރުކާރުން ރާވާފައި ވަނީ، މި ޕްރޮގްރާމްގެ ދަށުން އަހަރަކު 1000 ޒުވާނުންނަށް ފުރުސަތު ހޯދައިދިނުމަށެވެ. މި ޕްރޮގްރާމްގައި ބައިވެރިވާ ފަރާތްތަކަށް މުސާރައެއް ދިނުމަށް ވެސް ނިންމާފައިވާއިރު، އެކަމުގެ ތަފްސީލެއް އަދި ހާމަކޮށްފައި ނުވެ އެވެ. 

އިނގިރޭސިވިލާތުގެ ޑިފެންސް މިނިސްޓްރީ އިން ބުނާ ގޮތުގައި "ގޭޕް އިޔަރ" ޕްރޮގްރާމްގައި ބައިވެރިވާ ފަރާތްތަކަށް ލީޑަރޝިޕް، ޓީމު ވާރކް އަދި އެކި ކަހަލަ މައްސަލަތައް ހައްލު ކުރުމުގެ ހުނަރު ދަސްވެގެން ދާނެ އެވެ. އަދި ސިފައިންގެ ދާއިރާގައި ކެރިއަރެއް ބިނާ ކުރަން ބޭނުންވާ ނަމަ، އެ  ބޭނުންވާ ދާއިރާ އަކުން ވެސް ކުރިއަށް ދިޔުމުގެ ފުރުސަތު އޮންނާނެ އެވެ. އަދި ހަމަ އެހެންމެ، ދިރިއުޅުމަށް ބޭނުންވާ ހުނަރުތައް ލިބިގެން ދާނެ ކަމަށް ވެސް ބުނެފައިވެ އެވެ. 

މި ޕްރޮގްރާމްގެ ސަބަބުން ސިފައިންގެ ދާއިރާ އިތުރަށް ފުޅާވެ، އެ ދާއިރާ އަށް ވަންނަ މީހުން އިތުރު ވަމުން އަންނާނެ ކަމަށް ވަނީ ލަފާ ކޮށްފަ އެވެ. އަދި އެއީ އެތައް ބަޔަކަށް ފައިދާ ވާނެ، އަދި ޤައުމުގެ މުސްތަޤުބަލަށް ވެސް ބޭނުންތެރި ޕްރޮގްރާމެއް ކަމަށް ޑިފެންސް މިނިސްޓްރީގެ އޮފިޝަލުން ވަނީ ހާމަ ކޮށްފަ އެވެ. 

އިނގިރޭސިވިލާތުގެ ޑިފެންސް ސެކްރެޓަރީ ޖޯން ހީލޭ ވިދާޅުވީ، އެއީ ދިފާއީ ދާއިރާ އަށް އައު ޒަމާނެއް ގެނެސް ދޭނެ، އަދި ޒުވާނުންނަށް އަސްކަރީ ދާއިރާ އިން ފުރިހަަމ ތަޖުރިބާ ތަކެއް ލިބިގެން ދާނެ ކަމެއް ކަަމަށް ޤަބޫލު ކުރައްވާ ކަމަށެވެ. މި ޕްރޮގްރާމްގައި ބައިވެރިވާ ފަރާތްތަކަށް އިނގިރޭސިވިލާތުގެ އަސްކަރިއްޔާ އާއި، ރޯޔަލް ނޭވީ އަދި އާރުއެފްގައި ލިބޭ ހުނަރުތަކައި ތަމްރީނު ތަކުގެ ތަޖުރިބާ ލިބިގެން ދާނެ ކަމަށް ވެސް ޑިފެންސް ސެކްރެޓަރީ ވަނީ ވިދާޅުވެފަ އެވެ. 

އިތުރަށް ޑިފެންސް ސެކްރެޓަރީ ވިދާޅުވީ އެއީ އިނގިރޭސިވިލާތުގެ އަސްކަރީ ބާރުތަކާއި، ޤައުމުގެ މުޖުތަމައު އަލުން ގުޅުވައި ދޭނެ ކަމެއް ކަމަށެވެ. އަދި ޤައުމީ ސަލާމަތަށް ހުރިހާ ފަރާތްތަކުގެ ބައިވެރިވުން ހޯދުމުގެ ގޮތުން ކުރާ އެ މަސައްކަތަކީ، ވަރަށް ބޭނުންތެރި އަދި އެހާމެ ފައިދާ ހުރި މަސައްކަތަކަށް ވާނެ ކަމަށް ވެސް އޭނާ ވިދާޅުވެފައިވެ އެވެ. 

އިނގިރޭސިވިލާތުގެ ޝެޑޯ ޑިފެންސް ސެކްރެޓަރީ ޖޭމްސް ކާޓިލްޖް ވިދާޅުވީ، ވެރިކަން ކުރާ ލޭބާ ޕާޓީ އިން ދައްކަމުން އަންނަ ވާހަކަ ތަކާއި، ހަގީގަތް ދިމާ ނުވާ ކަމަށެވެ. އެގޮތުން 250 ފަރާތަކަށް ހުޅުވާލާ ކަމަށް ބުނާ އެ ޕްރޮގްރާމް އަކީ ޕައިލެޓް ޕްރޮގްރާމް އަކަަށް ނުވާނެ ކަމަށާއި، އެއީ އެންމެންގެ ބައިވެރިވުން އޮންނާނެ ޕްރޮގްރާމް އަކަށް ނުވާނެ ކަމަަށް ވެސް އޭނާ ވިދާޅުވި އެވެ. 

މި ޕްރޮގްރާމް އަކީ އޮސްޓްރޭލިއާގައި ހިންގަމުން އަންނަ "ގޭޕް އިޔަރ" ޕްރޮގްރާމް ނަމޫނާ އަކަށް ބަަލައިގެން ހިންގަން މަަސައްކަތް ކުރާ ޕްރޮގްރާމް އެކެވެ. އޮސްޓްރޭލިއާގައި އެ ޕްރޮގްރާމް ހިންގަމުން އަންނަތާ 10 އަހަރަށް ވުރެ ގިނަ ދުވަސްވެފައިވާއިރު، ޕްރޮގްރާމްގައި ބައިވެރިވާ ފަރާތް ތަކަށް އެހެން އެއްވެސް ތަނަކު ނުލިބޭ ޚާއްސަ ތަޖުރިބާ އާއި އަސްކަރީ ތަޖުރިބާ އަންނަނީ ދެމުންނެވެ.