އައު އަހަރާ ދިމާކޮށް ސްޓާމާ ވިދާޅުވީ ބައިބައިވުން ބަލިކޮށް، ރައްޔިތުންނަށް ބަދަލުތައް ފާހަގަ ވާނެ ކަމަށް

މި ފެށުނު އައު އަހަރުގެ ތެރޭގައި އެކި ފަރާތްތަކުން ކުރިމަތި ކުރަމުން އަންނަ ބައިބައިވުންތައް ބަލިކުރައްވާނެ ކަމަށް އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ވިދާޅުވެއްޖެ އެވެ. 

ސްޓާމާ މިހެން ވިދާޅުވެފައި ވަނީ، 2026 ވަނަ އަހަރަށް މަރުޙަބާ ކިޔުމުގެ ގޮތުން އިނގިރޭސިވިލާތުގެ ރައްޔިތުންނަށް ފޮނުވި ޚިތާބުގަ އެވެ. އެގޮތުން ސަރުކާރާ ދެކޮޅަށް މަސައްކަތް ކުރާ ފަރާތްތަކާއި، ބައިބައިވުން އުފައްދަން މަސައްކަތް ކުރާ ފަރާތްތައް ބަލި ކުރައްވާނެ ކަމަށް ވިދާޅުވި އެވެ. އަދި މިއަހަރުގެ ތެރޭގައި އިނގިރޭސިވިލާތުގެ ރައްޔިތުންނަށް، އެމީހުންގެ ދިރިއުޅުމުން ޕޮޒިޓިވް ބަދަލު ތަކެއް ފާހަގަ ކުރެވޭނެ ކަމަށް ވެސް ބޮޑު ވަޒީރު ވިދާޅުވި އެވެ. 

ސްޓާމާ ވިދާޅުވީ އިނގިރޭސިވިލާތުގައި ކަންކަން ދަތި ދުވަސް ކޮޅަކާ ދިމާވެފައި ވީ ނަމަވެސް، މިހާރު އެ ޤައުމުގެ ރައްޔިތުންނަށް ކުރިއެރުން ތަކެއް ފެންނަން ފަށަން ޖެހޭ ކަމަށެވެ. އެގޮތުން ރައްޔިތުންގެ ދިރިއުޅުމުގެ ބިލުތައް ކުޑަ ވުމާއި، ބޯޑަރު ތަކުގައި ފުލުހުން އިތުރުވުމާއި، އައި ޞިއްޙީ ޚިދުމަތް ދޭ ސެންޓަރުތައް ޤާއިމު ކުރުމުގެ އިތުރުން، ރައްޔިތުންގެ އަސާސީ ކަންކަމުގެ އަގު ކުޑަވުން ހިމެނޭ ކަމަށް ސްޓާމާ ވިދާޅުވި އެވެ. 

އިނގިރޭސިވިލާތުގެ ބޮޑު ވަޒީރު ސްޓާމާ އާއި އޭނާގެ ސަރުކާރަށް ވަނީ ޕްރެޝަރާ ކުރިމަތިލާން ޖެހިފަ އެވެ. އެގޮތުން އިނގިރޭސިވިލާތުގެ އިޤްތިޞާދީ ޙާލަތު ދަށްވެ، އިޤްތިޞާދީ ކުރިއެރުން ލަސްވުމުގެ ސަބަބުން، ސްޓާމާގެ ސަރުކާރުގެ މަޤުބޫލުކަަން ދަނީ ދަށްވަމުންނެވެ. އެހެންކަމުން، މި ފެށުނު 2026 ވަަނަ އަހަރަކީ ވެސް ސަރުކާރަށް ޕްރެޝަރު ބޮޑު އަދި ޗެލެންޖިން އަހަރަކަށް ވާނެ ކަމަށް ލަފާ ކޮށްފައިވެ އެވެ. 

އިދިކޮޅު ކޮންޒަވޭޓިވް ޕާޓީގެ ލީޑަރު ކެމީ ބެޑެނޯޗް ދެއްވި ތަޤުރީރުގައި ވިދާޅުވެފައި ވަނީ، 2025 ވަނަ އަހަރަކީ އިނގިރޭސިވިލާތުގެ ރައްޔިތުންނަށް ދަތި އަހަރެއް ކަަމަށެވެ. އެގޮތުން އެއްވެސް ކުރިއެރުމެއް ހޯދިފައި ނުވާ ކަމަށާއި، ޓެކްސް އިތުރުވެފައިވާއިރު، ވަޒީފާ ނެތުމުގެ މައްސަލަ އިންތިހާ އަށް ބޮޑުވެފައިވާ ކަމަށް އޭނާ ފާހަގަ ކުރެއްވި އެވެ. ނަމަވެސް، އިނގިރޭސިވިލާތުގެ ރައްޔިތުންނަކީ ދަށް ފެންވަރަށް ދާން ޖެހޭ ބައެއް ނޫންކަން ފާހަގަ ކުރައްވައި އޭނާ ވިދާޅުވީ، ޤައުމުގެ އިޤްތިޞާދު ރަނގަޅޫކޮށް، ސިފައިންނާއި، ފުލުހުން އަދި އެންއެޗްއެސް އަށް ފަންޑު ކުރެވޭނެ އޮތް އެ ޕާޓީގެ ޕްލޭންގައި ހިމެނިފައިވާ ކަމަށެވެ. 

ސަރުކާރުން ގެނައި ބަދަލުގެ ސަބަބުން ކަންބޮޑުވުން އެފެދި، ނުތަނަވަސްކަން އޮތް ކަމަށް ޤަބޫލު ކުރައްވާ ކަމަށް ސްޓާމާ ވެސް ވިދާޅުވި އެވެ. އަދި އޭނާ ވިދާޅުވީ އިނގިރޭސިވިލާތުގެ ކުރިމަތީގައިވާ ގޮންޖެހުންތައް އުފެދުނީ ދިހަ މަސް ދުވަހުން ނޫން ކަމަށާއި، އެންމެ ރެޔަކުން އެކަންކަން ރަނގަޅު ނުކުރެވޭނެ ކަމަށެވެ. އެކަން ފާހަގަ ކުރައްވައި އޭނާ ވިދާޅުވީ މިހާރުގެ ފިޔަވަޅު ތަކުގެ މަތީގައި ދެމި ތިބެން ޖެހޭ ކަމަށާއި، އެއާ އެކު ހަލުވިކަމާ އެކު ފެތުރެމުން އަންނަ ބައިބައިވުންތައް ވެސް ބަލި ކުރައްވާނެ ކަމަށެވެ. 

ކުރިއަށް އޮތް އަހަރުގެ ތެރޭގައި ކަންކަން ފަސޭހަ ކުރަން މަސައްކަތް ކުރައްވާނެ ކަމަށް ސްޓާމާ ވިދާޅުވި އެވެ. އެގޮތުން ރޭލު ތަކުގެ ކުލި ހިފެހެއްޓުމާއި، ބޭސް ފަރުވާގެ އަގުތައް ކުޑަކޮށް، ބޭހުން ނަގާ ޗާޖު ކުޑަ ކުރުމުގެ އިތުރުން، ތެލުން ނަގާ ޑިއުޓީ ހިފެހެއްޓުމާއި، އެންމެ ކުޑަ އުޖޫރަ އިން މުސާރަ ދިނުން އިތުރު ކުރުމުގެ ކަންކަން ފާހަަގަ ކުރެއްވި އެވެ. 

މިދިޔަ އަހަރުގެ ތެރޭގައި އިނގިރޭސިވިލާތުގެ ބޮޑު ވަޒީރު ކަމަށް ވަޑައިގެންނެވި ސްޓާމާގެ ސަރުކާރުގެ މަޤުބޫލުކަން ދަނީ ދަށްވަމުންނެވެ. އެގޮތުން އިނގިރޭސިވިލާތުގައި ނަގަމުން އަންނަ، ރައްޔިތުންގެ ޚިޔާލު ހޯދުމުގެ ޕޯލު ތަކުގައި ސްޓާމާގެ މަޤުބޫލުކަން ދަށްވަމުން އަންނަ ކަމަށް ވަނީ ފާހަގަވެފަ އެވެ.