ރިޔާސީ އިންތިޚާބު ޕީއެންސީ އިން ކާމިޔާބު ކުރީ ދޮގުތަކެއްގެ މައްޗަށް، އޭގެ ހިތި ރަހަ އަދިވެސް ދިވެހިންގެ ކަރު ބުޑުގައި އެބަ ލާ: ނިޒާރު
ޕީއެންސީގެ ވެރިކަމުގެ ދެ އަހަރަކީ އައްޑޫ ސިޓީ އަށް މާޔޫސްކުރުވަނިވި ދެ އަހަރު ކަމަށް ވެސް ނިޒާރު ވިދާޅުވި.
އައްޑޫ ސިޓީގެ މޭޔަރު އަލީ ނިޒާރު | ރާއްޖެއެމްވީ
ރިޔާސީ އިންތިޚާބު ޕީއެންސީ އިން ކާމިޔާބު ކުރީ ދޮގުތަކެއްގެ މައްޗަށް ކަމަށާއި އޭގެ ހިތި ރަހަ އަދިވެސް ދިވެހިންގެ ކަރު ބުޑުގައި އެބަ ލާ ކަމަށް އައްޑޫގެ މޭޔަރ އަލީ ނިޒާރު ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީގެ ޖަލްސާގައި އޮންލައިންކޮށް ބައިވެރިވެވަޑައިގެން ވާހަކަދައްކަވަމުންނެވެ.
ނިޒާރު ވަނީ ސަރުކާރަކީ ވެރިކަމަށް ވެސް ލާމަރުކަޒީ ނިޒާމަށް ވެސް ތަސައްރަފު ފުދޭ ބައެއް ނޫން ކަމަށް ވިދާޅުވެފަ އެވެ.
އޭނާ ވިދާޅުވި މާދަމާ ރާއްޖޭގެ ހާލަތު ދާނީ ކިހާ ހިސާބަކަށް ކަން ދިވެހިންނަށް މިއަދު ސާފު ނުވާ ކަމަށެވެ. މި ސަރުކާރު އައި ފަހުން ހުރިހާ ކަމެއް އޮތީ އޮޅުން ބޮޅުމެއްގެ ތެރޭގައި ކަަމަށް ވެސް ނިޒާރު ވިދާޅުވި އެވެ. ޕީއެންސީގެ ވެރިކަމުގެ ދެ އަހަރަކީ އައްޑޫ ސިޓީ އަށް މާޔޫސްކުރުވަނިވި ދެ އަހަރު ކަމަށް ވެސް އޭނާ ވިދާޅުވި އެވެ. މި އިންތިޚާބުގައި ސަރުކާރަށް މެޖޯރިޓީ ދިނުމަކީ ބިރުވެރިކަމަކަށް ވެގެން ދާނެ ކަަމަށް ވެސް އޭނާ ވިދާޅުވި އެވެ.
"ދެ އަހަރު ތެރޭގައި އައްޑޫގެ ރައްޔިތުންނަށް ކޮށްދިން ކަމެއް ނެތް. ކައުންސިލްތަކުގެ ކަންކަން ހުއްޓުވަނީ. އިގްތިސާދާއި ގުޅިފައި ހުރި ކަންކަން ހުއްޓުވާލާފައި ލަދެއް ހަޔާތެއް ނެތި އިންތިޚާބަށް ނުކުންނަތަން މި ފެންނަނީ." ނިޒާރު ވިދާޅުވި އެވެ.
ނިޒާރު ވިދާޅުވީ، ރައްޔިތުން ބާރުވެރިކޮށް، ގާތުން ވެރިކަން ކުރުމަކީ މި ސަރުކާރަށް ކަމުދާ ކަމެއް ނޫން ކަމަށެވެ. މީގެ އިތުރުން މި ނިޒާމު ބައްޓަން ކޮށްދިނީ އެމްޑީޕީ އިން ކަމަށާއި އެ ނިޒާމު ދެމެހެއްޓޭނީ ވެސް އެމްޑީޕީ އަށް ކަމަށް އޭނާ ވިދާޅުވި އެވެ. ކައުންސިލްތަކުގެ ސިޔާސަތު އޮތީ ވެސް އެމްޑީޕީގެ ތަސައްވުރާއި އެކުގައި ކަމަށް އޭނާ ވިދާޅުވި އެވެ. މި ސަރުކާރުން ކައުންސިލް އިންތިޚާބަށް ނުކުންނަނީ ކައުންސިލްތަކުގެ ބާރު ކޮށާ ކުޑަކުރުމަށް ފަހުގައި ކަމަށް ވެސް އޭނާ ވިދާޅުވި އެވެ. ކައުންސިލްތަކަށް ފައިސާ ދޭ ގޮތާއި މެދު އޭނާ ވަނީ ކަންބޮޑުވުން ފާޅުކުރައްވާފަ އެވެ.
އޭނާ ވަނީ ރައްޔިތުން އެމްޑިޕީ އަށް އަދިވެސް އިތުބާރު ކުރާނެ ކަމަށް ވިދާޅުވެފަ އެވެ.
