މަންމައާ ބައްޕަ އަދި ދައްތައަށް އަނިޔާކުރި މައްސަލައެއްގައި މީހަކު ޖަލަށް ލާން ހުކުމް ކޮށްފި
އަނިޔާ ދިނުމުގެ ތުހުމަތާ ގުޅިގެން ދައުލަތުން އެމީހާގެ މައްޗަށް 3 ދައުވާއެއް އުފުލާފައިވޭ. ރައްކާތެރިކުރުމުގެ އަމުރާ ހިލާފުވުމުގެ ދައުވާ ސާބިތުވުމާ ގުޅިގެން މާލެއަށް ނިސްބަތްވާ އެމީހާގެ މައްޗަށް އިއްވާފައިވަނީ 3 މަސް ދުވަހުގެ ޖަލު ހުކުމެއް.
ކްރިމިނަލް ކޯޓު | ރާއްޖެއެމްވީ
މައިންބަފައިންނަށް އަނިޔާކޮށް، ދައްތަގެ ކަރުގައި ހިފައި އަނިޔާކުރި މައްސަލައެއްގައި ދިވެހި ފިރިހެނަކު ޖަލަށްލުމަށް ކްރިމިނަލް ކޯޓުން ހުކުމް ކޮށްފި އެވެ.
އަނިޔާ ދިނުމުގެ ތުހުމަތާ ގުޅިގެން ދައުލަތުން އެމީހާގެ މައްޗަށް 3 ދައުވާއެއް އުފުލާފައިވެ އެވެ. އެއީ އަނިޔާއެއް ދިނުމުގެ ދެ ދައުވާއާއި، ރައްކާތެރިކުރުމުގެ އަމުރާ ހިލާފުވުމުގެ ދައުވާ އެވެ.
އަނިޔާކުރުމުގެ ދެ ދައުވާ އުފުލީ ބައްޕަ އާއި ދައްތައަށް ޖިސްމާނީ އަނިޔާ ދީފައިވާތީ އެވެ. ރައްކާތެރިކުރުމުގެ އަމުރާ ހިލާފުވުމުގެ ދައުވާ އުފުލާފައިވަނީ މަންމައަށް ގެވެށި އަނިޔާ ކުރާތީ އެކަން ހުއްޓުވުމަށް 2025 ވަނަ އަހަރުގެ ސެޕްޓެމްބަރު މަހު ނެރުނު އަމުރާ ހިލާފަށް އަމަލުކޮށްފައިވާތީ އެވެ.
މި މައްސަލަތައް ނިމުނު ގޮތުގެ ރިޕޯޓުން އެނގޭގޮތުގައި، އޭނާ ކޯޓުގައި ވަނީ މައްސަލަތަކަށް އިއުތިރާފްވެފަ އެވެ.
ރައްކާތެރިކުރުމުގެ އަމުރާ ހިލާފުވުމުގެ ދައުވާ ސާބިތުވުމާ ގުޅިގެން މާލެއަށް ނިސްބަތްވާ އެމީހާގެ މައްޗަށް އިއްވާފައިވަނީ 3 މަސް ދުވަހުގެ ޖަލު ހުކުމެކެވެ. ނަމަވެސް ކޯޓުން ވަނީ އެ ހުކުމް 29 ދުވަހަށް ލުއިކޮށްދީފަ އެވެ. އަދި އަނިޔާއެއް ދިނުމުގެ 2 ދައުވާގެ ތެރެއިން ބައްޕައަށް އަނިޔާކުރި މައްސަލައި ގައި އިއްވާފައިވަނީ 1 މަހާއި 6 ދުވަހުގެ ޖަލު ހުކުމެވެ. އަދި ދައްތައަށް އަނިޔާކުރި މައްސަލައިގައި އިއްވާފައިވަނީ 2 މަހާއި 12 ދުވަހުގެ ޖަލު ހުކުމެކެވެ.
އާއިލީ ހަމަ ނުޖެހުންތަކެއްގެ ތެރެއިން ގޭގައި މާރާމާރީ ހިންގައި އަނިޔާ ކުރާ މައްސަލަތައް ދޭތެރެއިން ފެންމަތިވެގެންދެ އެވެ.
